Okutaho Omutima Kukakiza Amagara Gaabo
HAKIRIKUBURAYO obwire, Yesu Kristo akarabura aha muheru gw’obusingye bw’Abayudaaya obwabaire nibwesiga munonga hekalu ey’omuri Yerusaalemu. Tarahaire kiro obu eki kyabaire nikiza kubaho. Kureka akashoborora ebyabaire nibiza kubaho okucwekyerera kutakabaireho. Akeehanangiriza abakuratsi be okuguma nibareeba kandi n’okuruga omu mwanya ogwo ogw’akabi.
Yesu akaragura ati: “Ku murireeba Yerusaalemu eyehinguririziibwe engabo, obwo muryamanya ngu okuhwerekyerera kwayo kuri haihi.” Kandi yaagira ati: “Ku murireeba ekirikuzira ekirikuhwerekyereza, . . . kyemereire omu mwanya ogurikwera, . . . abo abariba bari Buyudaaya omu bunaku obwo bahungire aha nshozi.” Yesu akeehanangiriza abakuratsi be okutagarukayo kujuna ebintu. Okuhunga n’obwira kukaba nikwetengyesa okubaasa kukiza amagara gaabo.—Luka 21:20, 21; Matayo 24:15, 16.
Okubaasa kumaraho obugomi bw’omwanya muraingwa, Cestius Gallus akeebembera amahe g’Abarooma okuzinda Yerusaalemu omu 66 C.E. Akataaha omu rurembo kandi yaayehinguririza hekalu. Orurembo rwona rukaza omu kahurikano. Abo abaabaire beteekateekire bakaba nibareeba ngu akabi kakaba kari haihi. Kwonka shi kikaba nikibaasika okuhunga? Batari kukiteekateeka, Cestius Gallus akagarurayo amahe ge yaagyenda. Abayudaaya abagomi bakabakuratira. Obu nibwo bwabaire buri obwire bw’okuhunga kuruga omu Yerusaalemu na Buyudaaya!
Omu mwaka ogwakuratiireho, amahe g’Abarooma gakagaruka gebeembeirwe Vespasian hamwe n’omutabani Tito. Eihanga ryona ryayeshanga omu rugamba. Omwaka ogwa 70 C.E. gurikutandika, Abarooma bakehinguririza Yerusaalemu n’amacumu. Hakaba hatariho oku omuntu yaabaire naabaasa kuhunga kwona. (Luka 19:43, 44) Ebigombe by’abantu omu rurembo abaabaire batarikwikirizana bakatemagurana. Abantu abaatsigaireho bamwe bakaitwa Abarooma kandi abandi batwarwa omu bukwatwa. Orurembo hamwe na hekalu byahwerekyererezibwa kimwe. Okurugiirira aha w’ebyafaayo by’Abayudaaya omwe orikwetwa Josephus ow’omu kyasha ky’okubanza, Abayudaaya abarikurenga aha kakaikuru bakabonabonesibwa kandi baafa. Egyo hekalu tekagarukaga kwombekwa.
Ku ogire ngu Abakristaayo bakaba bakiri omuri Yerusaalemu omu gwa 70 C.E., bakaba nibaija kwitwa nari batwarwa n’abandi omu buhuuku. Kwonka ab’ebyafaayo aba ira nibakyoreka kurungi ngu Abakristaayo bakakuratira okurabura kwa Ruhanga, baahunga kuruga Yerusaalemu n’omuri Buyudaaya, baaza omu bibungo by’omu burugwa-izooba bw’Omugyera Yorudaani. Abamwe bakatuura omuri Pella, omu kyanga kya Perea. Bakaruga Buyudaaya kandi tibaragarukireyo. Okuta omutima aha kwehanangiriza kwa Yesu kukakiza amagara gaabo.
Noota Omutima aha Kuhaburwa Okurikuruga aha Burugo Oburikwesigwa?
Ahabw’okugira ngu okurabura aha bintu bingi nikuheebwa kwonka bibura kubaho, abantu baingi tibaakitwara okurabura nka kikuru. Kwonka kandi, okukuratira okurabura nikibaasa kukiza amagara gaawe.
Omu gwa 1975, omuri China, hakabaho okurabura ngu hakaba nihaza kubaho omutsitsa. Abakuru omu gavumenti baagira eki baakoraho. Abantu baakwatanisa nabo. Amagara g’abantu baingi gaakira.
Omu gwa 1991, omuri Philippines, abatuuzi ba haihi n’Orushozi Pinatubo bakagira ngu omwika n’eiju bikaba nibituumuuka nibiruga omu rushozi. Bwanyima y’okwetegyereza embeera kumara emyezi ebiri, ekigombe ky’abakugu abarikwetegyereza emiriro y’omunda omu nshozi n’emitsitsa n’okutengyeta kw’ensi bakarabura aha kabi kaabaire kari haihi kubaho. Batarikweziringa, obukumi n’obukumi bw’abantu bakooherezibwa baaruga omu mwanya ogwo. Ebiro 15 by’okwa Mukaaga omu kasheeshe, n’okubaruka kw’amaani, orwongoto rw’eiju rukeejuguta ahaiguru nka mailo ibiri bwanyima byagwa ahansi. Okuta omutima aha kurabura kukakiza amagara g’enkumi n’enkumi z’abantu.
Baibuli neerabura aha muheru gw’obusingye obu. Hati turi omu biro by’aha mperu. Nk’oku emperu erikwirira haihi, buzimazima nooreeba? Haine eki oriyo nookora kubaasa kuruga omu mwanya ogw’akabi? N’obwira, noohabura abandi nabo okukora ekyo?
[Ekishushani ekiri aha rupapura 20]
Okuta omutima aha kurabura kukakiza amagara ga baingi obu Orushozi Pinatubo rwatanaka orwongoto rw’omuriro.
[Ekishushani ekiri aha rupapura 21]
Abakristaayo abaagyendeire aha kurabura kwa Yesu bakakira obu Yerusaalemu yaahwerekyerezibwa omu gwa 70 C.E.