Yesu amakangirirya abigha biwe erisaba

Obuli kindu ekyo Abafarisayo bakola, ibakakolakyo busana n’eritsemesya abandu. Ibakabya bamabikola ekindu ekyuwene, ibakakolakyo batoke erilangirika n’abandu. Ibakasabira ahali abandu obuli mundu atoke eribalangira. Abafarisayo ibakahamba emisabe miri-miri y’omo mitwe yabo kandi ibakasubirira muyo omo syosinagogi n’oko syonzira aho abandi babya ibanganabowa. Neryo abandu mubasweka Yesu akababwira ati: ‘Isimwasaba ng’Abafarisayo. Bakalengekanaya bati oMungu akendibatsemera busana n’ebinywa byabo bingyi, aliwe syalitsema. Omusabe ni waghu na Yehova. Isiwasubirira omo binywa bighumerera. Yehova akanza iwamubwira ngoko ukayowa.

‘Neryo litolere imwabya mukasaba mutya: “Tata wetu oyuli elubula, erina ryaghu riyirawe mo libuyirire. Obwami bwaghu bwase. Erisonda ryaghu rikoleke oko kihugho ng’omo lubula.’” Kandi Yesu mwababwira ati ibasaba busana n’akalyo k’obuli kiro, busana n’erighanyirwa ry’ebibi byabo, na busana n’ebindi bindu ebyo balaghireko.

Yesu mwatasyabugha ati: ‘Isimwaleka erisaba. Mulole embere erisaba Tata wenyu Yehova y’ebindu ebyuwene. Obuli mubuti akanza eriha omwana wiwe y’ebyuwene. Omwana waghu amakusaba omukati, wanganamuha eribwe? Amakusaba esamaki, wanganamuha enzoka?’

Neryo Yesu mwakania oko somo eno: ‘Mwamabya imukaha abana benyu b’ebyuwene, kwesi, oko kwenene, Tata wenyu iniakendibaha ekirimu kibuyirire. Ekyo utolere erikola ry’erimusaba.’ Ukanakolesaya erihano rya Yesu eri? Ubeghere erisaba busana n’emyatsi yahi?