Yesu amalisya abandu bangyi

Mughulu muke embere sye Pasaka y’oko mwaka 32 M.W., abakwenda mubalua omw’itulira. Babya ibabiriluha, neryo Yesu mwabatwala e Betesaida omo bwato batoke eriyaluhuka. Aliwe obwato bwabere bwahika oko musike w’engetse, Yesu mwalangira abandu banene ibabiribakwamirira eyo. Nomo Yesu anabya anzire eribya iyuwene n’abakwenda biwe, mwakolera abandu abo bo ndeke. Mwalamya abakoni babo kandi mwatsuka eribakangirirya. Omo musibo wosi, mwabakanirya oko Bwami bw’oMungu. Bwabere bwabibya igholo-gholo, abakwenda mubasyamubwira bati: ‘Abandu babirikwa enzala. Ubwirebo uti baghende bayayironderaye akalyo.’

Yesu mwabugha ati: ‘Sibendighenda. Mubahe akalyo.’ Abakwenda mubamubulya bati: ‘Wanzire itwayabaghulira emikati?’ Filipo, omughuma w’oko bakwenda mwabugha ati: ‘Nomo twangabya n’esyofranga nene, sitwangatoka erighula emikati busana n’abandu bosi aba.’

Yesu mwababulya ati: ‘Tuwite oko kalyo ki?’ Andrea mwamusubirya ati: ‘Tuwite oko mikati itano n’esyosamaki ibiri. Ebi ni bike kutsibu.’ Yesu mwabugha ati: ‘Muniletere emikati eyo n’esyosamaki.’ Mwabwira abandu ati bikale ahisi oko biti mo bikuto-bikuto by’abandu 50 na 100. Yesu mwimya emikati n’esyosamaki, mwasamalira elubula n’erisaba. Neryo mwaha abakwenda b’ebyalya, n’abakwenda mubahabyo abandu. Abalume 5 000, abakali, n’abana mubalya bamughuta. Enyuma w’aho, abakwenda mubakuma-kuma ebyasaka, hakasyabya ebikakwa busa. Ebitiri 12 by’ebyalya mubyasaka! Eki kyabya kitiko-tiko ekikaswekaya, ko bite bitya?

Abandu mubatsema kutsibu, mubamanza bati ngambe balyayira Yesu mo mwami wabo. Aliwe Yesu abya inianasi ngoko si w’omughulu wa Yehova erimuyira mo mwami. Neryo mwabwira abandu ati baghende, neryo mwabwira abakwenda biwe ati baghende oko musirya w’Engetse ye Galilaya. Abakwenda mubaghenda omo bwato, na Yesu mwaghenda oko kitwa kw’iyuwene. Busanaki? Kundi abya alaghire oko ndambi busana n’erisaba Tata wiwe. Nomo Yesu anabya n’ebingyi by’erikola, mwasondya endambi y’erisaba.