Amakangirirya w’oko Kitwa

Yesu abere abisombola abakwenda 12, mwalua oko kitwa amandaghalira aho abandu bangyi babya ibabirihindana. Mubalua e Galilaya, e Yudea, e Tiro, e Sidoni, e Suria, ne Yordani. Mubaleta abakoni n’abandi ababya kw’esyombinga. Yesu mwalamya abosi. Neryo Yesu mwikala oko kitwa, amatsuka erikania. Mwakania oko ekyo tutolere itwakola twamanza eribya bira b’oMungu. Litolere itwaminya ngoko tulaghire oko Yehova n’erigha erimwanza. Aliwe sitwangatoka erianza oMungu twamabya isitwanzire abandi bandu. Litolere itwakolera abandu bosi b’ebyuwene n’eribakolera ndeke, nibya n’esyonzighu syetu.

Yesu mwabugha ati: ‘Sighutolere erianza abira baghu basa. Litolere iwanza n’esyonzighu syaghu n’erighanyira abandu erilua oko mutima. Omundu amakuhitania, ghenda eyo ali n’erimusaba obughanyiri. Kolera abandi ebyo wanzire ibakukolera.’

Kandi Yesu mwaha abandu b’amenge aghuwene awalebirye ebindu. Mwabugha ati: ‘Ni ky’omughaso munene eribya mwira wa Yehova kulenga kw’eribya n’esyofranga nene. Omwibi anganiba esyofranga syaghu, aliwe sihali oyo wangiba obwira bwaghu na Yehova. Uleke eribya ukahangya-hangya busana n’eky’erirya, eky’erinywa, kutse eky’eryambala. Uyiteghereraye esyonyunyu. Sisiribula akalyo kundi oMungu atsomenesyo. Erihangya-hangya siryangatomeka oko ngebe yaghu kw’ekiro n’ekighuma. Wibuke, Yehova anasi ebyo ulaghireko.’

Abandu aba babya isibalibatowa oyukakanaya nga Yesu. Abakangirirya babo b’ekisomo babya isibalibatabakangirirya emyatsi eyo. Busanaki Yesu abya mukangirirya mubuya atya? Kundi ebyosi ebyo abya akangiriraya ibikalua oko Yehova.