Yesu amahambwa

Yesu n’abakwenda biwe mubalaba omo Musya we Kidroni bakaya oko Kitwa ky’Emizeituni. Bwabya kiro kutsibu kandi abya mughulu w’ekighoma. Babere babihika omo lirima lye Getesemani, Yesu mwababwira ati: “Mwikale hano, muteghaye.” Neryo Yesu mwaya omo lirima mo hali hake n’erikukama. Mwakwa obulighe bunene, neryo mwasaba ati: “Leka erisonda lyaghu likoleke.” Neryo Yehova mwatuma omumalaika erisyamusikya mutima. Yesu abere abisuba eyiri abakwenda biwe mweya ibabiriyato. Mwabugha ati: ‘Mubuke! Eno si ndambi y’erighotsera! Endambi yabirihika ingye erihirwa omo byala by’esyonzighu syaghe.’

Aho n’aho, Yuda mwasa n’abandu banene ibane n’emiyali n’emyigho. Yuda abya inianasi aho angasunga Yesu kundi ibabeghere eryasa omo lirima eryo. Yuda mwabwira abasuda ati akendibakangania Yesu. Yuda mwaghenda ahali Yesu n’eribugha ati: ‘Kuti, Mukangirirya,’ neryo mwamuha ebizu. Yesu mwabugha ati: ‘Yuda, ukanyihotera omw’imba ebizu?’

Yesu mwaseghera embere n’eribulya ekikumula ky’abandu ati: “Mukasonda-sondandi kwehi?” Mubabugha bati: “Yesu Omunazareti.” Neryo mwabasubirya ati: “N’ingye,” neryo abandu abo mubasuba enyuma n’eriwa ahisi. Kandi Yesu mwabulya abandu abo ati: “Mukasonda-sondandi kwehi?” Kandi mubabugha bati: “Yesu Omunazareti.” Yesu mwasubirya ati: ‘Mungababwira niti n’ingye. Muleke abandu aba baghende.’

Neryo Petro abere alangira emyatsi ngoko yiri, mwimya omuyali wiwe n’eritwa okutu kwa Malko, omughombe w’omuhereri mukulu. Aliwe Yesu mwatula oko kutu kw’omulume oyo, kw’amalama. Neryo Yesu mwabugha na Petro ati: ‘Subaya omuyali w’omo lubo lwagho. Wamalwa omo muyali, iwukendisyakwa omo muyali.’ Abasuda mubahamba Yesu n’eriboha amaboko wiwe, n’abakwenda mubatibita. N’abandu mubatwala Yesu eyiri Ana, omuhereri mukulu. Ana mwabulya Yesu neryo mwamutuma ewa Kayafa, omuhereri mukulu w’oko mwaka oyo. Aliwe niki kyo kyahikira abakwenda?