Akalyo k’erigholo-gholo k’omwiso ka Yesu

Obuli mwaka Abayahudi ibakibuka Ekiro Kikulu ky’Epasaka omo kiro kye 14 ky’omwisi we Nisani. Eki kyabya kikabibukya ngoko Yehova abalusaya omo bukobe bwe Misri n’eribaleta omo Kihugho Ekyalaghawa. Omo mwaka 33 M.W., Yesu n’abakwenda biwe mubibuka Ekiro Kikulu ky’Epasaka omo kyumba ky’endata e Yerusalema. Babere babugha erirya, Yesu mwabugha ati: ‘Omughuma w’okw’inywe akendinyihotera.’ Abakwenda mubasweka, neryo mubabulya Yesu bati: ‘Nindi?’ Yesu mwabugha ati: ‘Yo mulume oyo ngendiha omukati oyu.’ Neryo mwaha Yuda Iskariota y’omukati. Yuda mwalw’iniahangana, amahuluka.

Neryo Yesu mwasaba, amatsutsanga omukati n’erihagho abandi bakwenda. Mwabugha ati: ‘Mulye omukati oyu. Akasosekanaya omubiri waghe, ogho ngendiherera busana nenyu.’ Kandi mwasaba busana n’edivai n’erihayo abakwenda biwe. Mwabugha ati: ‘Munywe edivai eyi. Yikasosekanaya omusasi waghe, ogho ngendiherera amalolo atoke erighanyirwa. Ngabalagha niti mukendisyabya bami haghuma naghe elubula. Mubye mukakola eki obuli mwaka erinyibuka.’ Abigha ba Yesu bakahindana haghuma obuli mwaka, omw’igholo-gholo ry’ekiro 14, omwisi we Nisani. Omuhindano oyo akahulawa mo Akalyo k’Omukama ak’Erigholo-gholo.

Babere babugha erirya, abakwenda mubakuba obuhaka omukulu nga nindi. Aliwe Yesu mwababwira ati: ‘Oyukayilangira mo mulere kutsibu omw’inywe, oyo y’omukulu kutsibu.

‘Muli bira baghe. Ngababwira ebyosi ebyo Tata waghe anzire inababwira. Hakisigha hake inaghenda eyiri Tata waghe elubula. Ngendibasigha, n’abandu bakendisyaminya ngoko muli bigha baghe busana n’olwanzo oluli omo kati-kati kenyu. Mwanzane ngoko naghe nabiribanza.’

Oko nduli, Yesu mwasaba, eribwira Yehova ati ateghaye abigha biwe bosi. Kandi ati abawatikaye bakole omo bughuma n’omo buholo. Mwasaba ati erina lya Yehova libye libuyirire. Neryo, Yesu n’abakwenda biwe mubimba esyonyimbo sy’eripipa Yehova neryo bamahulukira ehihya. Endambi y’erihamba Yesu yabya iyikisigha iyahika.