Petro amabugha ati syasi Yesu

Omughulu Yesu abya n’abakwenda biwe omo kyumba ky’endata, mwababwira ati: ‘Inywe bosi mukendinyisighania.’ Petro mwabugha ati: ‘Ingye iyehe! Abandi nomo bangakusighania, ingye sinendisyakusighania.’ Neryo Yesu mwabwira Petro ati: ‘Engoko-lume siyendibika utewabugha ngendo isatu uti sighuniasi.’

Omughulu abasuda babya bakatwala Yesu ewa Kayafa, abangyi b’oko bakwenda ba Yesu babya ibabiritibita. Aliwe abakwenda babiri mubaghenda haghuma n’ekikumula ekyahamba Yesu. Omughuma wa kubo abya ini Petro. Mwaya omo kibugha ky’enyumba ya Kayafa, neryo mwayota oko muliro. Ekyakakala mukyakolerya obusu bwiwe. Neryo omughombe w’obukali mwamubwira ati: ‘Ninakwasi! Wabya na Yesu!’

Petro mwabugha ati: ‘Iyehe! Sinasi ebyo ukabugha nga ni bihi!’ Petro mwaya eyiri omulango. Neryo kandi oghundi mughombe w’obukali mwamulangira n’eribwira abandu ababyaho ati: “Omulume oyu abya na Yesu!” Petro mwabugha ati: ‘Nibya siniasi na Yesu oyo!’ N’omulume mughuma mwabugha ati: ‘Uli mughuma wa kubo! N’emibughire yaghu yikakanganaya ngoko uli we Galilaya, nga Yesu.’ Aliwe Petro mwalapa ati: ‘Sinimwasi!’

Oko ndambi eyo, engoko-lume muyabika. Petro mwalangira Yesu akamukebera. Petro mwibuka ebinywa bya Yesu, neryo mwaya ehihya amayalira kutsibu.

Enyuma w’aho, esanhedrini muyahindana ewa Kayafa batoke eritondesya Yesu. Babya ibabiriyisogha eriita Yesu, aliwe babya bakasondya eky’eriyihambulisaniamo. Mubatamubanako mwatsi wosi-wosi. Oko nduli, Kayafa mwabulya Yesu ati: ‘Uli Mughala w’oMungu?’ Yesu mwasubirya ati: ‘Inga.’ Kayafa mwabugha ati: ‘Situkilaghire oko bandi bimiri. Amabitsuma oMungu!’ Abosi b’omo tribinali mubalighirana n’eribugha bati: “Atolere iniakwa.” Mubamatangula Yesu, bamamutwira kw’amatande, bamaswika obusu bwiwe, n’erimuhunza ibane mubugha bati: ‘Wamabya ighuli muminyereri, tubwire oyo wamakuhunza!’

Bwabere bwabikya, kandi mubatwala Yesu y’omo kyumba kye sanhedrini n’eritasyamubulya bati: ‘Uli Mughala w’oMungu?’ Yesu mwasubirya ati: ‘Ighuwene-wene wamabibughakyo.’ Neryo mubabana eky’eriyihambulisaniamo bati amatsuma oMungu, neryo mubamutwala omo nyumba ya Pontio Pilato, omutabali Muroma. Emyatsi muyatasyabya yiti? Kyo tukendilangira.