Wikiriraye ngoko Yehova akwanzire

1. Busanaki muwayiherera oko Yehova? (Ulebaye n’epitsa.)

WANAMIBUKA ekiro wayiherera oko Yehova? Muwayisogha ghutya kundi wabya iwabiriminya Yehova n’erimwanza. Muwamulagha uti ukendihira erisonda liwe ry’embrere omo ngebe yaghu, kandi uti ukendilola embere erimwanza n’omutima waghu wosi, n’obuyingo bwaghu bosi, n’obulengekania bwaghu bosi, n’akaghala kaghu kosi. (Mar. 12:30) Eritsukira aho, olwanzo lwaghu okw’iye mulwalola embere erikanya. Neryo wangasubirya omundu utiki amabikubulya ati, “Oko kwenene unanzire Yehova?” Butsira eritika-tika ighukendibugha uti, “Nimwanzire kutsibu kulenga omundu wosi-wosi n’ekindu kyosi-kyosi!”

2-3. Yehova anzire itwikiriryaki, kandi tukendikania okuki omo mwatsi ono? (Yeremia 31:3)

² Aliwe omundu amabikubulya ati, “Unikirirye ngoko Yehova akwanzire?” Kwa muhwa wanganatika-tika erisubirya uti inga, ukalengekania uti sighutolere eryanzwa na Yehova. Mwali wetu mughuma oyo watakanganibawa olwanzo omo bwana bwiwe mwabugha ati: “Ninasi ngoko nanzire Yehova. Siniritika-tikira ekyo n’ahake. Ekyo ngatika-tikira kangyi-kangyi ly’eriminya Yehova ng’ananianzire.” Aliwe, wangaminya ghuti ngoko Yehova akwanzire?

³ Yehova anzire iwikirirya ngoko akwanzire. (Soma Yeremia 31:3.) Yehova abirikuleta okw’iye. N’omughulu wayiherera okw’iye n’eribatisibwa muwabana ekindu ky’obughuli, ni bugha ambu olwanzo lwiwe oluteleghula. Ekyo ni bugha ambu akwanzire kutsibu kandi syendisyakulekerania n’ahake. Olwanzo olo oluteleghula lukaleka inialangira abaghombe biwe bataleghula, naghu ighuneko, mo “kindu [kiwe] ky’obughuli.” (Mal. 3:17) Omukwenda Paulo mwikirirya ngoko Yehova amwanzire. Yehova anzire naghu iwayowa ghutya. Paulo mwahandika ati: “Nikirirye kundu ngoko sihali eky’angaleka oMungu inialeka eritwanza. Lwangabya luholo, engebe, abamalaika, abatabali, emyatsi ya lino kutse eyikendisyasa, amaka wosi-wosi, ekyosi-kyosi eky’endata kutse eky’eyikwa, kutse ekindi kihangyikwa kyosi-kyosi.” (Rom. 8:38, 39) Omo mwatsi ono, tukendilangira busanaki ni ky’omughaso erikirirya ngoko Yehova atwanzire n’ekyo twangakola tutoke erikirirya ekyo.

BUSANAKI TUTOLERE ERIKIRIRYA NGOKO YEHOVA ATWANZIRE?

4. Twangakinda tuti ekighuma ky’oko bitegho bya Sitani?

⁴ Twanganakinda ekighuma ky’oko “bitegho” bya Sitani omw’ikirirya ngoko Yehova atwanzire. (Efe. 6:11) Sitani asyalola embere erikola ekyosi-kyosi eritukarirya erikolera Yehova. Ekighuma ky’oko bitegho biwe, ry’eribugha amabehi ati Yehova syatwanzire. Isiwibirawa ngoko kangyi-kangyi Sitani akalwa netu omughulu situwite akaghala. Anganakola atya kwa muhwa omughulu situwite akaghala busana n’ebyatuhikira kera, amaligho wetu wa lino, kutse busana n’erihangya-hangya busana n’omungya. (Misyo 24:10) Sitani ali ng’esimba eyikasonda erihamba enyama y’erirya eyiteyangayilwirako. Neryo akayikasa erituhamba omughulu situwite akaghala tutoke eribunika mutima. Aliwe twamabilola embere erikiriya kundu ngoko Yehova atwanzire, isitwangahambwa omo bitegho bya Sitani.​—1 Pet. 5:8, 9; Yak. 4:7.

5. Busanaki tutolere erikirirya ngoko Yehova atwanzire kandi ngoko akatulangira mo b’obughuli?

⁵ Erikirirya ngoko Yehova atwanzire lyanganaleka itwayitunda hakuhi naye. Busanaki tukabugha tutya? Yehova mwatubumba n’engumbu y’eryanza n’eryanzwa. Kyo kikaleka omundu amabitwanza netu tukamwanza. Neryo omughulu tukalangira ngoko Yehova atwanzire kandi ngoko akatulangira mo b’obughuli, ekyo kikaleka itwamwanza kutsibu. (1 Yoh. 4:19) Twamabimwanza kutsibu, naye iniakenditwanza kutsibu. EBiblia ikatubwiri yiti: “Museghere hakuhi n’oMungu, naye akendiseghera hakuhi nenyu.” (Yak. 4:8) Neryo twangakolaki tutoke erikirirya ngoko Yehova atwanzire?

NIKI KYO KYANGATUWATIKYA ERIKIRIRYA NGOKO YEHOVA ATWANZIRE?

6. Ni mwatsi wahi ogho twangahira omo musabe owangatuwatikya erikirirya ngoko Yehova atwanzire?

⁶ Ulole embere erisaba Yehova akuwatikaye erikirirya ngoko akwanzire. (Luka 18:1; Rom. 12:12) Obuli kiro wanganasaba Yehova ngendo nyingyi uti akuwatikaye eriyilangira ngoko iye akakulangira. Oko kwenene, ndambi silebe kyanganatukalako erilighisya omutima wetu owakatutsweba ngoko Yehova atwanzire. Aliwe, uminye ngoko Yehova ni mukulu kulenga omutima waghu. (1 Yoh. 3:19, 20) Akwasi ndeke kulenga ngoko uyasi; akalangira ebyuwene omw’iwe ebyo utewangalangira. (1 Sam. 16:7; 2 Emya. 6:30) Neryo kwesi isiwatika-tika ‘erimutulira’ ebyosi ebiri omo mutima waghu ukamusaba uti akuwatikaye erikirirya ngoko akwanzire. (Esy. 62:8, ebinywa by’eyikwa) Neryo enyuma w’aho uyikase erikola erikwamana n’emisabe yaghu omw’ikolesya amahano awakwamire ano.

7-8. Esyonyimbo sikatukanganaya siti ngoko Yehova atwanzire?

⁷ Wikiriraye ebyo Yehova akabugha. Yehova Mwasondola abahandika eBiblia erikangya nga ni mundu oyuli ati. Tulebaye ebinywa bilebe ebyuwene ebyo omuhandiki mughuma w’esyonyimbo, ye Daudi, abugha oko Yehova. Mwabugha ati: “Yehova ali hakuhi n’ab’emitima eyibunikire; akalamaya ab’ebirimu ebibunikire.” (Esy. 34:18) Omughulu obunikire mutima, wanganayowa nga uli ighuwene. Aliwe, Yehova ati omo mighulu eyiri ng’eyo akabya hakuhi naghu kundi ukabya ighulaghire oko buwatikya bwiwe ko kutsibu. Omo lundi lwimbo, Daudi mwahandika ati: “Ukuma-kumire emisonia yaghe omo tsupa yaghu y’engobi.” (Esy. 56:8) Omughulu ukaghalawa, Yehova akabya inianalangire. Akutsome kutsibu kandi syalitsema akalangira ukaghalwa. Akabya ng’amakuma-kuma emisonia yaghu n’eriyilangira mo y’obughuli, ngoko omundu oyukabalama akalangira amaghetse awali omo tsupa yiwe y’engobi mo y’obughuli. Esyonyimbo 139:3, sikabugha siti: “[Yehova] wasi esyonzira syaghe syosi.” Yehova akalangira esyonzire syaghu syosi, aliwe ebyo akayiteghereraya kutsibu by’ebyuwene ebyo ukakola. (Ebr. 6:10) Busanaki? Kundi akatsema akalangira ukayikasa erimutsemesya.a

⁸ Erilabira amasako awakasikaya mutima awali ng’ayo, aw’omo Kinywa kiwe, Yehova akabya ng’akakubwira ati: “Nanzire iwaminya ngoko nikwanzire kutsibu kandi ko nikutsomene kutsibu.” Aliwe, ngoko tulyalangira, Sitani akabugha amabehi ati Yehova syakwanzire. Neryo kyamabihika iwatika-tika Yehova ng’anakwanzire, utolere iwayibulya uti, ‘Ngendikirirya ndi, “baba w’amabehi” kutse “oMungu w’ekwenene”?’​—Yoh. 8:44; Esy. 31:5.

9. Yehova akalaghaki abamwanzire? (Eriluayo 20:5, 6)

⁹ Ulengekanaye Yehova ng’akayowa ati busana n’abandu abamwanzire. Lengekanaya oko ebyo Yehova abwira Musa n’Abaisraeli. (Soma Eriluayo 20:5, 6.) Yehova akalagha ati akendisyalola embere erikangania abandu abamwanzire b’olwanzo oluteleghula. Ebinywa ebyo bikatulighisaya ngoko oMungu wetu mutaleghula syangaligha tukamwanza aliwe iye iniaghana eritwanza. (Neh. 1:5) Neryo omughulu wamatsuka eritika-tika Yehova ng’anakwanzire, uyibulaye uti, ‘Ninanzire Yehova?’ Neryo ulengekanaye oko kino: Wamabya iwanzire Yehova kandi ighunemuyikasa erikola ekyosi-kyosi erimutsemesya, wikiriraye ngoko akwanzire kutsibu. (Dan. 9:4; 1 Kor. 8:3) Ekyo ni bugha ambu, wamabya isighulitika-tikira ngoko wanzire Yehova, sihali ekyangaleka iwatika-tika Yehova ng’anakwanzire. Wanganikirirya ngoko akendisyalola embere erikwanza kandi syendisyakulekerania n’ahake.

10-11. Yehova anzire iwalangira ghuti embanulo? (Abanya Galatia 2:20)

¹⁰ Ulengekanaye oko mbanulo. Yehova mwatuha ekihembo kinene omughulu atuma Mughala wiwe, Yesu Kristo erisyahola busana netu. (Yoh. 3:16) Aliwe, Yehova mwanatuma mughala wiwe erisyahola busana naghu? Inga! Tukanaye oko ky’erileberyako ky’omukwenda Paulo. Wibuke ngoko mwakola amakosa malebe awakalire embere abye Mukristo, nibya n’enyuma w’aho mwalola embere erilwa n’eritendihika-hikana liwe. (Rom. 7:24, 25; 1 Tim. 1:12-14) Aliwe, mwalangira embanulo mo kihembo kiwe-kiwe ekyo Yehova amuha. (Soma Abanya Galatia 2:20.) Wibuke ngoko Yehova mwasondola Paulo erihandika ebinywa ebyo. N’ebyosi ebiri omo Biblia byahandikawa busana n’eritukangirirya. (Rom. 15:4) Ebinywa bya Paulo ebyo bikakanganaya ngoko Yehova anzire iwalangira embanulo. Anzire iwalangirayo mo kihembo kyaghu-kyaghu ekyo akuha. Wamabilangira embanulo yo ghutya, ekyo ikikendileka iwikirirya kundu ngoko Yehova akwanzire.

¹¹ Tukasima Yehova busana n’erituma Yesu oko kihugho erisyatuholera. Aliwe, ekindi ekyaleka Yesu iniasa oko kihugho ryabya eribwira abandi ekwenene oko Mungu. (Yoh. 18:37) Ekwenene eyo yihiriremo ngoko Yehova akayowa busana n’abana biwe.

NGOKO YESU AKATUWATIKAYA ERIKIRIRYA NGOKO YEHOVA ATWANZIRE

12. Busanaki twanganayiketera ebyo Yesu abugha oko Yehova?

¹² Omughulu Yesu abya oko kihugho mwakangania Yehova nga ni mundu oyuli ati. (Luka 10:22) Twanganayiketera ebyo Yesu abugha oko Yehova kundi iye musa yo wabya iniabiribugha emyaka mingyi haghuma naye omo lubula embere ase oko kihugho. (Kol. 1:15) Yesu mwayilangirira ngoko Yehova anzire kutsibu abaghombe biwe bataleghula. Yesu akatuwatikaya ati erikirirya ngoko Yehova atwanzire?

13. Yesu anzire itwalangira Yehova yo tuti?

¹³ Yesu anzire itwalangira Yehova ngoko iye akamulangira. Omo esyo Enjili Yesu mwahula Yehova mo “Tata” ngendo nyingyi oko 160. N’omughulu abya akakania n’abigha biwe, abya abeghere erikolesya ebinywa nga, “Tata wenyu” kutse “Tata wenyu w’elubula.” (Mat. 5:16; 6:26) Embere Yesu ase oko kihugho, abaghombe bataleghula ba Yehova ibakamwahula mo ‘Omutoki w’ebyosi,’ ‘Ow’endata kutsibu,’ Omuhangyiki mukulu,’ n’awandi mena w’erisikya ng’ayo. Aliwe, Yesu iniabeghere eryahula Yehova mo ‘Tata’ wetu. Ekinywa ekyo kikanganaya ngoko Yehova anzire abaghombe biwe ibayowa hakuhi naye ngoko omwana akayowa hakuhi na tata wiwe w’olwanzo.” Ekyo ni bugha ambu, Yesu abya akakangirirya ngoko Yehova atwanzire ngoko tata akanza abana biwe. Tukanaye oko by’erileberyako bibiri Yesu akakolesya ekinywa “Tata.”

14. Yesu mwakangania ati ngoko obuli mughuma w’okw’itwe ni w’obughuli bunene omo meso wa Tata wetu w’elubula? (Matayo 10:29-31) (Ulebaye n’epitsa.)

¹⁴ Okw’itsuka tulebaye ebinywa bya Yesu ebiri omo Matayo 10:29-31. (Soma.) Ebisukali ni hinyunyu hike-hike ehite hyanganza Yehova n’ahake kutse erimuramya. Aliwe, Tata wetu atsomene ebisukali kundi sihali n’ekighuma ekyangatoghera ahisi isyasi. Yehova amabya iniatsomene kutsibu akanyunyu kake ng’ako, twanganikirirya ngoko atsomene kutsibu obuli mughuma w’okw’itwe kundi tumwanzire kutsibu kandi tukamuramaya! Kandi Yesu mwabugha ati Tata wetu anasi emighanzo y’esyonzwiri syosi sy’oko mutwe w’obuli mughuma w’okw’itwe. Neryo Yehova amabya inianasi nibya n’ehyatsi hike-hike hy’okw’itwe, twanganikirirya kundu ngoko atutsomene kutsibu. Kwenene, Yesu anzire itwikirirya ngoko itwe bosi tuli b’obughuli omo meso wa Tata wetu w’elubula.

15. Ebinywa bya Yesu ebiri omo Yohana 6:44 bikakukangirirayaki oko Tata waghu w’elubula?

¹⁵ Tukanaye oko ky’erileberyako ky’akabiri Yesu akakolesya ekinywa “Tata.” (Soma Yohana 6:44.) Tata waghu w’elubula yo wakuleta omo kwenene. Busanaki mwakola atya? Ni kundi mwalangira omutima waghu inianzire eryangirira ekwenene. (Emib. 13:48) Omughulu Yesu abugha ebinywa ebiri omo Yohana 6:44, kitokekene abya akahula ebinywa bya Yehova ebiri omo risako erimanire omwatsi ono: ‘Munakuleta okw’ingye omo lwanzo oluteleghula [kutse, munataleka erikukangania olwanzo oluteleghula].’ (Yer. 31:3; ebinywa by’eyikwa; tasyalebya Hosea 11:4.) Lengekanaya oko binywa ebyo! Tata wetu w’elubula w’olwanzo anemulola embere erilangira emibere yaghu eyuwene eyo ute wangalangira.

16. (a) Yesu abya anzire eritukangiriryaki, kandi busana tutolere erimwikirirya? (b) Wangakolaki utoke erikirirya kundu ngoko Yehova yo Tata oyo ulaghireko? (Ulebaye akasanduku “Tata oyo itwe bosi tulaghireko.”)

¹⁶ Omw’ihula Yehova mo Tata, Yesu abya ng’akatubwira ati: “Yehova si Tata waghe ingyuwene; nenyu ni Tata wenyu. Kandi ngababwira ngoko abanzire kutsibu kandi abatsomene.” Neryo hamabya endambi iwatika-tika Yehova ng’anakwanzire, uyibulaye uti, ‘Sinangayiketera ebinywa bya Yesu oyo wasi Tata wetu yo ndeke kandi oyukabugha ekwenene mughulu wosi?’​—1 Pet. 2:22.

ULOLE EMBERE ERIKIRIRYA KUNDU NGOKO YEHOVA AKWANZIRE

17. Busanaki tutolere erilola embere erikirirya kundu ngoko Yehova atwanzire?

¹⁷ Tutolere itwalola embere erikirirya kundu ngoko Yehova atwanzire kundi ngoko tulyalangira, Sitani, enzighu yetu, asyalola embere erikola ekyosi-kyosi eritukarirya erikolera Yehova. Anzire itwabunika mutima. Neryo asyalola embere erikola ekyosi-kyosi tulengekanaye Yehova nga syatwanzire. Isitwalighirira Sitani eritusinga!​—Yobu 27:5.

18. Wangakolaki utoke erikirirya kundu ngoko Yehova akwanzire?

¹⁸ Eritoka erikirirya kundu ngoko Yehova akwanzire, ulole embere eribya ukamusaba akuwatikaye eriyilangira ngoko iye akakulangira. Ulengekanaye kutsibu oko masako w’omo Biblia awakakanganaya ngoko Yehova anzire kutsibu abamwanzire. Wibuke ngoko Yehova asyalola embere eryanza abamwanzire. Isiwibirirawa ngoko embanulo ni kihembo kyaghu-kyaghu ekyo akuha. Kandi wikiriraye ngoko Yehova ni Tata waghu w’elubula ngoko Yesu abugha. Neryo omundu amabikubulya ati: “Unikirirye ngoko Yehova akwanzire?”, ighukendimusubirya butsira eritika-tika uti: “Inga, anianzire! Kandi ninemukola ekyosi-kyosi erikangania ngoko ni mwanzire!”