ESOMO 59
Naghu wanganatoka eriyiyinia omughulu w’eryendereribwa
Hane ekiro obuli Mukristo akasyahikirawa n’abakamupinga, nibya n’abakamwendereraya. Ekyo kyanganaleka uwubaha?
1. Busanaki litolere itwayilindilira okw’endereribwa?
EBiblia ikatubwira ndeke ndeke yiti: “Abosi abanzire erikwama engebe y’erikenga oMungu n’erimatikana na Kristo Yesu, basyendereribwa.” (2 Timoteo 3:12) Yesu mwendereribwa busana mwatayingirya omo myatsi y’ekihugho kya Sitani kino. Netu kutya situliyingiraya omo myatsi y’ekihugho, busana n’ekyo situlisweka omughulu abatabali b’ekihugho kino n’abakulu b’ebisomo bakatwendereraya.—Yoane 15:18, 19.
2. Twangayiteghekania tuti okw’endereribwa?
Tutolere itwawatya eriyiketera Yehova omo mughulu owo tulimo lino. Obuli kiro tubye tukarondya endambi y’erimusaba n’erisoma eKinywa kiwe. Isitwabya tukabula oko mihindano y’endeko. Ebyo bikendikuha akaghala ako ulaghireko utoke eribya n’obutubaha omughulu w’eryendereribwa, nomo lyangasira oko bandu b’omo kihanda. Omukwenda Paulo iye naye mwendereribwa, mwahandika ati: “Yehova ni muwatikya wage, sindiendisyubaha.”—Abaebrania 13:6.
Omughulu tubeghere omubírí w’eritulira, nagho akatuwatikaya eribya n’obutubaha. Erihubirya likatwighisaya eriyiketera Yehova n’erikinda eryubaha lyosi-lyosi eryo twangabya nalyo oko bandu. (Emisyo 29:25) Lino twamabya n’omuhwa omo mubírí w’eritulira, iniakendituwatikya eritendileka eritulira n’omo abatabali bangaghania omubírí wetu.—1 Abanya Tesalonika 2:2.
3. Tukabana endundi yahi omughulu tukayiyinaya okw’endereribwa?
Okw’ibugha ekwenene, situlitsema omughulu tukendereribawa, aliwe omughulu tukayiyinaya okw’endereribwa, obwikirirya bwetu bukawata. Tukayitunda hakuhi na Yehova kundi tukayilangirira obuwatikya bwiwe omughulu tukayowa isitwangatoka erikola omwatsi wosi-wosi. (Soma Yakobo 1:2-4.) Yehova syaliyowa ndeke akalangira tukaghalwa, aliwe akatsema akalangira ngoko tunemuyiyinia. EBiblia ikabugha yiti: “mwamayiyinia omugulu mukagalawa busana n’erikola ebyuwene, oMungu akatsema busana nekyo.” (1 Petero 2:20, NWT) Twamayitsinga eribya bataleghula, Yehova akasyatuhemba akatuha engebe y’erikota omo kihugho kihya-kihya. Neryo, obuli mundu oyukendisyabya mukyo akendisyaramya Yehova butsira eryendereribwa.—Matayo 24:13.
WIGHE BINGYI
Wighe ekikaleka ikyatokekana eriyitsinga eribya mutaleghula oko Yehova nomo hangabya eryendereribwa, kandi ng’akendisyatuhemba ati.
4. Wanganayiyinia okw’endereribwa erikasira omo kihanda kyaghu
Yesu mwakangania ndeke-ndeke ngoko abandu balebe aboko kihanda kyetu banganapona kusangwa twamayisogha erikolera Yehova. Musome Matayo 10:34-36, neryo musubiraye oko ribulyo rino:
Omughulu omundu mulebe amayisogha erikolera Yehova, ab’oko kihanda kiwe banganabugha batiki kutse ibayira bati?
Eriminya ekyo, mulebaye EVIDEO, neryo musubiraye oko ribulyo erikwamire.
Wangakolaki ow’oko kihanda kyenyu kutse omwira waghu amasonda erikukakirya erikolera Yehova?
Musome Esyonyimbo 27:10 na Mariko 10:29, 30. Mwabisoma obuli risako, musubiraye oko ribulyo rino:
Omulaghe oyu angakuwatikya ati wamahikirwa n’eryendereribwa elyangasira oko bandu b’omo kihanda kyaghu kutse oko bira baghu?
5. Uyitsinge erikolera Yehova nomo hangabya eryendereribwa
Erikolera Yehova likasaba obutubaha omughulu abandi bakasonda eritukakirya erikola tutya. Mulebaye EVIDEO, neryo musubiraye oko ribulyo erikwamire.
Emyatsi eyo wamalangira omo video eno yamawatya yiti obutubaha bwaghu?
Musome Emibiri 5:27-29 ne Abaebrania 10:24, 25. Mwabisoma obuli risako, musubiraye oko ribulyo rino:
Busanaki ni ky’omughaso eriyitsinga erikolera Yehova nomo bangaghania omubírí wetu w’eritulira kutse emihindano yetu?
6. Yehova akendikuwatikya utoke eriyiyinia
Abimiri ba Yehova b’omo kihugho kyosi, abakulu n’abalere, mobayitsinga erikolera Yehova nomo banahikirawa n’eryendereribwa. Eriminya ekyabawatikaya, mulebaye EVIDEO. Neryo musubiraye oko ribulyo erikwamire.
Ngoko ulyalangira omo video, niki kyo kyawatikaya Abimiri abo eriyiyinia?
Musome Abanya Roma 8:35, 37-39 ne Abanya Filipi 4:13. Mwabisoma obuli risako, musubiraye oko ribulyo rino:
Erisako eri lyamakangania liti ngoko naghu wanganatoka eriyiyinia omughulu wamalengwako?
Musome Matayo 5:10-12, neryo musubiraye oko ribulyo rino:
Busanaki litolere iwabya n’obutseme nomo wangabya iwunemwendereribwa?
Abimiri ba Yehova bangyi mobayitsinga erikolera Yehova butaleghula nomo banahikirawa n’eryendereribwa. Naghu wanganatoka!
ABANDU BALEBE BAKABUGHA BATI: “Sinangatoka eriyiyinia okwendereribwa.”
Ni risako lyahi eryo wangakolesya eribawatikya balighe ngoko banganatoka eriyiyinia?
MUKIGHA MYATSI YAHI?
Yehova akatsema kutsibu akalangira tukayikasa erimukolera nomo hangabya eryendereribwa. Akaghala kiwe kanganatuwatikya eriyiyinia n’eritendileka eribya bataleghula!
Eriyibukya
Busanaki Abakristo bakayilindirira okw’endereribwa?
Wangakolaki lino eriyiteghekania ndeke okwendereribwa erikasa?
Niki kyo kyangaleka iwikirirya ngoko wanganayitsinga erikolera Yehova nomo hangabya eryendereribwa?
EBINDI EBY’ERIMINYA
Ulangire omulwana mughuma oyukakanaya ngoko Yehova amuwatikaya eriyiyinia omughulu abohawa omo ngomo busana n’eritendibya oko luhande lulebe lw’ekipolitike.
Ulangire ekyawatikaya omulume n’omukali wiwe erilola embere erikolera Yehova butaleghula omo miaka mingyi nomo banahikirawa n’eryendereribwa.
Wighe ngoko wangasikya omutima n’eribya n’obutubaha omughulu w’eryendereribwa.
“Uyiteghekanaye lino okw’endereribwa” (Munara wa Mulinzi, Mwezi wa 7, 2019)
Litolere iwalangira wuti eryendereribwa erikasira oko ab’omo kihanda kyaghu, kandi wangakolaki eribya iwune n’obuholo n’eritendisighania obutaleghula oko Yehova?
“Ekwenene siyirileta ‘Obuholo, Nikwa Omuyali’” (Munara wa Mulinzi, Mwezi wa 10, 2017)