Yesu amahulukira abasohi b’esyomaki

Mughulu muke enyuma sya Yesu erihulukira abakwenda, Petro mwayisogha eriyasoha oko syosamaki oko Ngetse ye Galilaya. Tomasi, Yakobo, Yohana, n’abandi bigha mubaghenda naye. Mubasoha omo kiro kyosi aliwe mubatahamba n’esamaki n’enguma.

Omo tututu, mubalangira omulume inianimene oko musike w’engetse. Mwababirikira ati: ‘Mwanahambire esyosamaki?’ Mubamubwira bati: “Iyehe!” Mwababwira ati: “Mughuse obutimba oko luhande lw’amali lw’obwato.” Babere bakola ekyo, obutimba mubusulamo esyosamaki. Esyosamaki musyabya nyingyi, bamataluka nibya n’erikurirabo omo bwato. Yohana mwalw’iniaminya ngoko omulume oyo abya ini Yesu neryo mwabugha ati: “Yo Mukama!” Aho n’aho, Petro mwayighusa omo maghetse amaghenda mugho erihika oko musike. N’abandi bigha mubamukwama omo bwato.

Babere bahika oko musike, mubalangira omukati n’amahere ibine oko muliro. Yesu mwababwira ati balete oko mahere wabo nagho bahiregho oko muliro. Neryo mwabugha ati: ‘Mwase, mulye.’

Babere babirya, Yesu mwabulya Petro ati: ‘Unanyanzire kwilaba erisoha esyosamaki?’ Petro mwabugha ati: “Inga, Mukama, unasi ngoko nikwanzire.” Yesu mwabugha ati: “Ulisaye ebyana byaghe by’esyombuli.” Kandi Yesu mwamubulya ati: ‘Petro, unanyanzire?’ Petro mwasubirya ati: “Inga, Mukama, unasi ngoko nikwanzire.” Yesu mwabugha ati: “Uteghaye esyombuli syaghe.” Yesu mwamubulya eribulyo righumerera engendo y’akasatu. Petro mwakwa obulighe. Mwamusubirya ati: “Mukama, unasi emyatsi yosi, unasi ngoko nikwanzire.” Yesu mwabugha ati: “Ulisaye ebyana byaghe by’esyombuli.” Mwatomekako ati: “Ulole embere erinikwama.”