Yesu amalubukibwa

Yesu abere abihola, omulume mughuma muteke, oyukahulawa mo Yozefu mwasaba Pilato ati amulighire erilusya omubiri wa Yesu w’oko muti. Yozefu mwalingira oko mubiri wa Yesu k’olukimba lw’ekitani ekyuwene n’erihira kugho kw’amaghuta, neryo amahiragho omw’isinda nyihya-nyihya. Mwakumbaghalirya oko bwingiriro bwayo kw’eribwe rinene. Abahereri bakulu mubabwira Pilato bati: ‘Tukwire obuba tuti abaghuma b’oko bakwenda ba Yesu bakendiheka omubiri wiwe n’eribugha bati abirilubuka.’ Neryo Pilato mwababwira ati: “Mwimaye abateya; mughende muyateghaye eyisinda ngoko mwangatoka.”

Enyuma sy’ebiro bisatu, omo mitsange, abandi bakali mubaghenda eyiri eyisinda, neryo mubeya eribwe iryabirikumbaghalibwa. Omw’isinda, omumalaika mwabwira abakali abo ati: ‘Isimwasagha. Yesu abirilubuka. Mughende muyabwire abigha biwe muti bamweghaye e Galilaya.’

Maria Magdalene mwanguha eriya eyiri Petro na Yohana. Mwababwira ati: ‘Omundu abiriheka omubiri wa Yesu!’ Petro na Yohana mubasuba eyiri eyisinda ibanemutibita. Babere babilangira omw’isinda isimuliki, obuli mundu mwasuba ewiwe.

Maria mwabya abitasyasuba eyiri eyisinda, mwalangira abamalaika babiri ibanemo neryo mwabugha nabo ati: ‘Sinasi aho babiritwala Omukama waghe.’ Neryo mwalangira omulume mughuma, amalengekania ati mbino ni mulimi w’eririma, neryo amabugha naye ati: ‘Mukulu, kisi nibwire aho wabirimutwala.’ Aliwe, omughulu omulume oyo abugha ati, “Maria!” Maria mwaminya ngoko ni Yesu. Mwalaka kutsibu ati: “Mukangirirya!” Neryo amamumakirira. Yesu mwamubwira ati: ‘Ughende uyabwire abaghala betu uti wabirinyilolako.’ Aho n’aho, Maria mwatibita eyiri abakwenda n’eriyabwirabo ati abirilola oko Yesu.

Enyuma sy’aho, omw’itungyi, abakwenda babiri babya ibane omo nzira eyikalua e Yerusalema eriya e Emau. Omulume mughuma mwabahikako amaghendania nabo n’eribabulya ngabakakanaya okuki. Mubabugha bati: ‘Siwasi emyatsi eyiri? Bino ni biro bisatu abahereri bakulu ibabiriita Yesu. Esaha eno abakali balebe banemubugha bati Yesu abirilubuka!’ Omulume oyo mwababulya ati: ‘Inywe simwikirirye abaminyereri? Mubabugha bati Kristo akendisyahola kandi inialubuka.’ Mwalola embere eribakanirya oko myatsi eyiri omo Masako. Babere bahika e Emau, abakwenda mubasaba omulume oyo bati aghende nabo. Abere abisabira akalyo k’omwigholo, aho ho baminyira ngoko ni Yesu. Neryo mwabulirana.

Abigha babiri aba mubanguha, bamaya e Yerusalema omo nyumba eyo abakwenda babya bahindenemo, n’eribabwira ebyabere. Babere ibane omo nyumba, Yesu mwabahulukira abosi. Oko mwanzo, abakwenda mubataligha bati ni Yesu. Neryo mwabugha ati: ‘Mulebaye ebyala byaghe; munituleko. Mukyahandikwa kiti Kristo asyalubuka.’