ESOMO 61
Mubaghana eryunamira esanamu
Biro bike Omwami Nebukadeneza abilota enzoli yiwe, mwakokotya esanamu nene omo horo. Mwahirayo omo bwerere bwe Dura, neryo mwabirikira abakulu erihindana embere syayo. Shadraki, Meshaki, na Abednego nabo babya oko bakulu abo. Omwami mwabugha ati: ‘Omughulu mukendyowa emirenge y’esyongunga, enanga, n’enyabulera, muname ahisi n’eriramya esanamu eyo! N’oyutendyunama ahisi eriramyayo akendighuswa omo riko ry’omuliro munene.’ Abaebrania basatu abo mubakola bati? Mubaramya esanamu eyo, kutse mubaramya Yehova?
Omwami mwabugha ati omuziki awatawe. Obuli mundu munama ahisi amaramya esanamu, aliwe Shadraki, Meshaki, na Abednego mubatakola batya. Abandi balume mubabalangira, neryo mubabwira omwami bati: ‘Abaebrania basatu abo mubatitaramya esanamu yaghu.’ Nebukadeneza mwatuma abandu ati bayendebo n’eribugha ati: ‘Ngayabaha akandi kanya k’eriramya esanamu. Mwamatendiramyayo, ingendibaghusa omo riko ry’omuliro munene. Sihali oMungu oyukendibasabula omo muliro oyo.’ Mubamusubirya bati: ‘Situlaghire oko kandi kanya. OMungu wetu akenditusabula. Nibya amatendikola atya, mwami, sitwendiramya esanamu eyo.’
Nebukadeneza mwahitana kutsibu. Mwabwira abalume biwe ati: ‘Mwakaye omuliro w’engendo 7 kulenga ngoko akakibawa!’ Neryo mwabwira abasuda biwe ati: ‘Mubohe abalume aba mubaghuse omo muliro!’ Omuliro abya iniabiryaka kutsibu, abasuda abo babere baseghera hakuhi nagho, aho n’aho mubalw’ibahola. Abaebrania basatu mubaghuswa omo muliro. Aliwe Nebukadeneza abere asamalira omo muliro, mwalangira imuli abalume bani omo mwanya w’abasatu, ibanemulendera mugho. Mwakwa obuba neryo mwabulya abakulu ati: ‘Syalinga mutukaghusa abalume basatu basa omo muliro? Aliwe namalangiramo abalume bani, n’omughuma wa kubo asosire omumalaika!’
Nebukadeneza mwasa hakuhi n’omuliro n’eribirikira ati: ‘Mulue omo muliro, inywe baghombe b’oMungu ow’Endata Kutsibu!’ Obuli mundu mwasweka akalangira Shadraki, Meshaki, na Abednego bakalua omo muliro isibetahya. Omubiri, esyonzwiri, n’esyongyimba syabo mubitahya, babya isibakumbireko n’omuliro.
Nebukadeneza mwabugha ati: ‘OMungu wa Shadraki, Meshaki, na Abednego ni mukulu. Mwakatuma omumalaika wiwe erisabulabo. Sihali oMungu oyuli ng’owabo.’
Ng’Abaebrania basatu abo, naghu wanamayisogha eribya mutaleghula oko Yehova nomo hangabyaki?
“Yehova Mungu waghu yo litolere iwaramya, kandi iye musa yo litolere iwakolera omubiiri owabuyirire.”—Matayo 4:10