Obwami obuli ng’omuti munene

Kiro kighuma omo kiro, Nebukadneza mwalota enzoli ayamwita obuba. Mwabirikira abalume biwe b’amenge erisyamukumbulirayo. Muhatabanika n’omughuma oyo watoka. Oko nduli, omwami mwabirikira Danieli.

Nebukadneza mwabwira Danieli ati: ‘Omo nzoli yaghe, mungalangira omuti. Alue ahikire elubula. Alue akalangirwa ehosi-hosi omo kihugho. Alue awite ebikoma ebyuwene n’amatunda mangyi. Esyonyama silue sikaluhukira omo kitsutsu kyagho, n’esyunyunyu silue sikahimba omo mitahi yagho mw’esyonyuto. Neryo omumalaika mwakakima erilua elubula n’eribugha omo mulenge muli ati: “Mukonde omuti oyo, mutweko n’ebitahi byagho. Aliwe musighe ekisiki n’emirihi omo kitaka, kandi mubohere kukyo k’omuliki w’ekyuma n’ekwivre. Omutima wakyo abindulawe, isyabya ng’ow’omundu, kandi kihabawe omutima w’enyama, n’emighulu 7 yilabe. Abandu bosi bakendisyaminya ngoko oMungu ni Mutabali kandi ngoko anganaha obwami oko wosi-wosi oyo anzire.”’

Yehova mwabisulira Danieli enzoli eyo nga yikamaanisayaki. Danieli abere aminya amaana w’enzoli eyo mwakwa obuba. Mwabugha ati: ‘Mwami, nilue ngalengekania niti enzoli yilebirye esyonzighu syaghu, aliwe iyehe, n’iwe yilebirye. Omuti munene owakondawa n’iwe. Siwenditasyabya mwami, kandi ukendirya ebiti ng’enyama y’omoli. Aliwe kundi omumalaika mwabughire ati uleke ekisiki n’emirihi, ukendisyatasyasuba oko bwami bwaghu.’

Enyuma w’omwaka mughuma, Nebukadneza mwalendera oko lutwe lw’enyumba yiwe y’obwami, inianemusamalira e Babiloni. Mwabugha ati: ‘Langira omuyi munene oyu owuwene ogho nabirihimba. Kwenene niwite akaghala!’ Abere anemubugha ebyo, omulenge mwalua elubula ati: ‘Nebukadneza! Lino wamalusibwako obwami bwaghu.’

Oko ndambi eyo, Nebukadneza mwabya musire, amabya ng’enyama y’omoli. Mwalusibwa omo nyumba yiwe y’obwami n’eriyikala n’esyonyama sy’omoli. Esyonzwiri sya Nebukadneza musyabya siri-siri ng’ebyeya by’erisamba, n’esyonyala siwe musyabya ng’ebinyala by’esyonyunyu.

Habere halaba emyaka 7, Nebukadneza mwalama. Kandi Yehova mwamuyira mo mwami we Babiloni. Neryo Nebukadneza mwabugha ati: ‘Ngapipa Yehova, Omwami w’elubula. Lino namaminya ngoko Yehova yo Mutabali. Akakehaya abakayiheka, kandi anganaha obwami oko wosi-wosi oyo anzire.’