Obwami obukendisyabyaho kera na kera

Kiro kighuma omo kiro, Omwami Nebukadneza mwalota enzoli eyikaswekaya. Muyamuhandabukya kutsibu amabula n’otughotseri. Mwabirikira abakumu biwe n’eribabwira ati: ‘Munyikumbulire enzoli yaghe.’ Mubabugha bati: ‘Mwami, tubwire ebyo ulyalota.’ Aliwe, Nebukadneza mwababwira ati: ‘Iyehe! N’inywe mukendimbwira ebyo niryalota, bite bitya ingabita.’ Kandi mubamubwira bati: ‘Tubwire ebyo ulyalota mo tukenditoka erikukumbulirabyo.’ Mwabugha ati: ‘Mukasonda eriniteba. Mumbwire ebyo niryalota!’ Mubamubwira bati: ‘Sihali omundu oyo wangakola ekyo. Ebyo ukasaba sibyangatokekana.’

Nebukadneza mwahitana kutsibu, neryo amahamula ati abalume bosi b’amenge bitawe. Omo bandu abo mwabya kutya ye Danieli, Shadraki, Meshaki, na Abednego. Danieli mwasaba omwami ati amuhe endambi. Neryo Danieli n’abira biwe mubasaba Yehova abawatikaye. Yehova mwakolaki?

Omo nzoli, Yehova mwakangania Danieli ebyo Nebukadneza alota n’ekyo bikamaanisaya. Ekiro ekyakwama, Danieli mwaghenda eyiri omughombe w’omwami n’erimubwira ati: ‘Isiwiita omulume wosi-wosi w’amenge. Ngendikumbula enzoli y’omwami.’ Omughombe mwatwala Danieli eyiri Nebukadneza. Danieli mwabwira omwami ati: ‘OMungu abirikubisulira omughulu owakasa. Enzoli y’eno: Muwalangira esanamu nene, omutwe wayo ini w’ehoro, ekikuba n’amaboko wayo byabya by’efeza, enda yayo n’embindi yayo byabya by’ekwivre, emihimbi yayo yabya y’ekyuma, n’ebisando byayo byabya ekitswe ky’ekyuma n’ekitswe ky’eribumba. Neryo eribwe mulyalua oko kitwa n’eritsutsanga ebisando by’esanamu. Esanamu eyo muyatulangika, muyabya lututu n’erihunga mulyaghulukya olututu olo. Eribwe mulyabya kitwa kinene, mukyusulya ekihugho.’

Neryo Danieli mwabugha ati: ‘Enzoli yaghu yikamaanisaya kino: Obwami bwaghu w’omutwe w’ehoro. Efeza bw’obwami obukendisyakusubuka. Neryo hakendisyabya obundi obuli ng’ekwivre obukendisyatabala ekihugho kyosi. Obundi bwami bukendisyakala ng’ekyuma. Oko nduli, hakendisyabya obwami obughabene obuwite ekitswe ekiwite akaghala ng’ekyuma n’ekindi ekyoloberere ng’eribumba. Eribwe eryabya kitwa ni Bwami bw’oMungu. Bukendisyatulanga amami wosi aya neryo ibwabyaho kera na kera.’

Nebukadneza munamya obusu bwiwe oko kitaka embere sya Danieli. Mwabugha ati: ‘OMungu waghu abirikubisulira enzoli yaghe. Sihali oMungu oyuli nga ye.’ Omo mwanya w’eriita Danieli, Nebukadneza mwamuyira mo mukulu w’abalume bosi b’amenge kandi mutabali omo Babiloni. Wanamalangira Yehova ngoko asubiraya oko musabe wa Danieli?