Ruta na Naomi

Oko mughulu mulebe, muhabya enzala nene omo Israeli. Omuisraeli oyukahulawa mo Naomi mwahumira e Moabu, iye n’omwira wiwe, n’abaghala biwe babiri. Enyuma w’aho, omwira wiwe mwahola. Abaghala biwe mubatahya Ruta na Oripa, Abamoabu. Eky’obulighe, abaghala ba Naomi nabo mubahola.

Naomi abere abyowa ngoko enzala yabirihwa omo Israeli, mwayisogha erisuba ewabo. Ruta na Oripa mubaghenda naye, aliwe babere ibane omo nzira, Naomi mwababwira ati: ‘Mwabya bakali babuya ba baghala baghe kandi balyana baghe babuya. Nanzire imwatasyatahibwa. Musube ewenyu e Moabu.’ Abakali mubabugha bati: ‘Tukwanzire! Sitwanzire erikuleka.’ Naomi mwabahatikana ati baghende. Oko nduli, Oripa iye mwasubula, aliwe Ruta mwamughanirako. Naomi mwamubwira ati: ‘Oripa amabisuba eyiri abandu biwe, n’emiungu yiwe. Naghu usubule na mulikyenyu, usube omo nyumba ya mama waghu.’ Aliwe Ruta mwabugha ati: ‘Sinendikuleka. Abandu baghu bakendisyabya bandu baghe, n’oMungu waghu akendisyabya Mungu waghe.’ Ukalengekanaya uti Naomi mwayowa ati Ruta akamubwira atya?

Ruta na Naomi mubahika e Israeli ekisusu kikatsuka erigheswa. Kiro kighuma, Ruta mwaghenda eriyabota-bota oko misighalira y’engano omw’irima ly’omulume oyukahulawa mo Boazi, mughala wa Rahabu. Abya iniabiriowa ngoko Ruta ni Mumoabu oyo wabya iniabiribya mutaleghula oko Naomi. Mwabwira abakoli biwe ati ibanasigha enyuma y’engano nge eyo Ruta angakuma-kuma.

Erigholo eryo, Naomi mwabulya Ruta ati: ‘Munabwire mukahingira omo ririma lyandi?’ Ruta mwabugha ati: ‘Omo ririma ry’omulume oyukahulawa mo Boazi.’ Naomi mwamubwira ati: ‘Boazi ni mutunga wa mwira waghe. Ubye ukahingira omo ririma liwe n’abandi bakali. Eyo, ukendibya buholo.’

Ruta mwalola embere erihingira omo ririma rya Boazi erihika aho erighesa lyahwera. Boazi mwalangira ngoko Ruta abya akakola kutsibu kandi ini mukali mubuya. Oko mughulu oyo, omulume iniakabya amahola kandi isyawite oko bana b’obulume, omutunga wiwe iniakasighalaya omukali wiwe. Neryo Boazi mwatahya Ruta. Mubabuta omwana w’obulume n’erimwahula mo Obedi, oyo wahikira eribya sokulu w’Omwami Daudi. Abira ba Naomi mubatsema. Mubabugha bati: ‘Yehova mwatsuka erikuha Ruta, oyo wabiribya mwalyana mubuya okw’iwe, kandi na lino wamabibana omwitsikulu. Yehova apipawe.’