Omusondoli muhya n’abakali babiri batubaha

Yosua mwasondola abandu b’oMungu omo myaka mingyi. Neryo mwahola iniawite emyaka 110. Omughulu abya iniakineho, Abaisraeli babya ibanemuramya Yehova. Aliwe, Yosua abere abihola, mubatsuka eriramya esyosanamu ng’Abakanana. Kundi Abaisraeli mubaleka erikolera Yehova, mwalighira omwami we Kanana, ye Yabini eribanubya. Abandu mubasaba Yehova y’obuwatikya. Neryo Yehova mwahabo omusondoli muhya, ye Baraka. Angawatikirye abandu erisuba oko Yehova.

Debora, omuminyereri mukali mwatuma omundu ati ayende Baraka. Mwabwira Baraka ati: ‘Yehova ati wimaye abalume 10000, uyalwe n’abasuda ba Yabini oko lusi lwe Kishoni. Aho, ukendikinda Sisera omukulu w’abasuda ba Yabini.’ Baraka mwabwira Debora ati: “Wamaghenda haghuma naghe, ingendighenda.” Debora mwabugha ati: ‘Ngendighenda haghuma naghu. Aliwe uminye ngoko siwe ukendiita Sisera. Yehova abiribugha ati omukali yukendimwita.’

Debora mwaghenda na Baraka n’abasuda biwe oko Kitwa kye Tabori eriyateghekania amalwa. Sisera abere abyowa omwatsi oyo, mwahindania emitoka yiwe y’amalwa omo musya w’ekitwa ekyo. Debora mwabwira Baraka ati: “Munabwire Yehova akendikuwatikya erisinga.” Baraka n’abalume biwe 10 000 mubandaghala eriyahindana n’abasuda ba Sisera abakalire.

Neryo, Yehova mwaleka olusi lwe Kishoni ilusula n’eribwagha. Emitoka y’amalwa ya Sisera muyahatira omo byondo. Sisera mwasigha omutoka wiwe amatibita. Baraka n’abasuda biwe mubakinda abasuda ba Sisera, aliwe Sisera iye mwatibita! Mwatibita amayabisama omo hema y’omukali oyukahulawa mo Yaeli. Yaeli mwamuha amaziwa, neryo amamuswika obulangiti. Kundi abya aluhire, mwaghotsera. Neryo Yaeli mwasa aho ali akambomba, amingirya omusumari omo mutwe wa Sisera. Neryo mwahola.

Baraka mwasa akasondya Sisera. Yaeli mwahuluka omo hema yiwe n’eribugha ati: “Asa. Ngendikukangania omulume oyo ukaronda.” Baraka mwingira omo hema, amalangira Sisera iniabirihola. Baraka na Debora mubapipa Yehova omo lwimbo busana n’eriwatikya Abaisraeli erikinda esyonzighu syabo. Omo myaka 40 enyuma sy’aho, Abaisraeli mubabya omo buholo.