Gideoni mwakinda Abamidiani

Enyuma sy’omughulu mulebe, kandi Abaisraeli mubaleka erikolera Yehova, bamatsuka eriramya emiungu y’amabehi. Omo myaka 7, Abamidiani mubiba esyonyama sy’Abaisraeli n’eritsandya emimeya yabo. Eriyiteya oko Bamidiani, Abaisraeli ibakabisama omo myangalu n’oko bitwa. Mubasaba Yehova bati abawatikaye. Neryo Yehova mwatuma omumalaika oko mulwana oyukahulawa mo Gideoni. Omumalaika mwabugha ati: ‘Yehova abirikusombola eribya musuda w’amaka.’ Gideoni mwamubulya ati: ‘Ngendisabula niti Abaisraeli? Niri mundu bule!’

Gideoni angaminyire ati ngoko Yehova abirimusombola? Mwimya engobi y’embuli, amahirayo oko kitaka n’eribwira Yehova ati: ‘Omo tututu, engobi nyisa yamabyasako ekimi, aliwe ekitaka ekiri oho yiri ikyabya ikinumire, aho ingendiminya ngoko ukendinikolesya erisabula Abaisraeli.’ Omo tututu, engobi yabya iyabiritsapa n’ekitaka ikinumire! Aliwe kandi, Gideoni mwasaba ati ngambe omo tututu eyikwamire engobi iyabya iyinumire n’ekitaka ikinatsapire. N’emyatsi ko yanabya yitya. Neryo, Gideoni mwaligha ngoko Yehova abirimusombola. Mwahindania abasuda biwe eriyalwa n’Abamidiani.

Yehova mwabwira Gideoni ati: ‘Ngendiha Abaisraeli b’erisinga. Aliwe kundi uwite abasuda banene, wanganalengekania uti n’inywe mwamasinga amalwa omo kaghala kenyu. Ubwire owosi-wosi oyukwire buba uti asube ewiwe.’ Neryo abasuda 22 000 mubasuba ewabo, n’abasuda 10 000 bamasighala. Kandi Yehova mwabugha ati: ‘Abasuda baghu bakine banene. Ndaghalirayabo oko lusi, n’eribabwira uti banywe amaghetse. Usighale n’abakendinywa ibanayiteghirye oko syonzighu.’ Abalume 300 basa bo banywa ibanayiteghirye. Yehova mwalagha ati abalume bake abo bakendikinda abasuda Abamidiani 135 000.

Omo kiro ky’ekiro ekyo, Yehova mwabwira Gideoni ati: ‘Eno y’endambi y’erilwa n’Abamidiani!’ Gideoni mwaha abalume biwe b’amahembe n’amalegha manene-manene imunabisire ehiti ehiriko ekirimi. Mwababwira ati: “Mubye mukanilebya n’erikola ngoko ngakola.” Gideoni mwabuha omo rihembe riwe, amatula erilegha riwe, amahungya-hungya akati kiwe akaliko ekirimi n’eribirikira ati: “Omuyali wa Yehova n’owa Gideoni!” Abalume bosi 300 mubakola batya. Abamidiani mubakwa obuba, bamatibita obuli mundu omo nzira yiwe. Mubahandabuka kutsibu, neryo mubatsuka eriitana. Kandi Yehova mwawatikya Abaisraeli erikinda esyonzighu syabo.