Mubasala babuta omwana!

Abrahamu na Sara babya ibabiribugha emyaka mingyi omo bunyumba. Babya ibabirisighania enyumba yabo eyuwene e Uru eriyikala omo mahema. Aliwe Sara mwatayilungumula, kundi abya ayiketere Yehova.

Sara abya alaghire oko mwana ko kutsibu, mwabwira Abrahamu ati: ‘Omughombe waghe Hagari amabikubutira omwana, omwana oyo iniakendibya nga ni waghe.’ Endambi muyahika, Hagari amabuta omwana. Mwahulwa mo Ismaeli.

Emyaka mingyi enyuma w’aho, omughulu Abrahamu abya n’emyaka 99 na Sara iniawite emyaka 89, mubapokera abagheni basatu. Abrahamu mwababwira ati bikale omo ndina y’omuti batoke erilya haghuma. Unasi abagheni abo nga babya bahi? Babya bamalaika! Mubabwira Abrahamu bati: ‘Oko mwaka owakasa, oko ndambi eyiri ng’eno, iwe n’omukali waghu mukendisyayira oko mwana w’obulume.’ Sara abya iniane omo hema inianahulikirire. Mwayisekako n’erilengekania ati: ‘Kwe lero, ingye mukekulu-kekulu nanganayira oko mwana?’

Oko mwaka owakwama, Sara mwabuta omughala, ngoko omumalaika wa Yehova anabugha. Abrahamu mwamwahula mo Isaka, erina erikamaanisaya “Amaseka.”

Omughulu Isaka abya n’emyaka hakuhi itano, Sara mwalangira Ismaeli akamusekererya. Abya anzire eriteya omughala wiwe, neryo mwaghenda eyiri Abrahamu, amamusaba ati atibite oko Hagari na Ismaeli. Oko mwanzo, Abrahamu mwatanza erikola ekyo. Aliwe kundi Yehova naye abya anzire eriteya Isaka, mwabwira Abrahamu ati: ‘Hulikirira Sara. Ngenditeya Ismaeli. Aliwe esyondaghane syaghe sikendisyabererera erilabira Isaka.’