Obwato bwa Noa

Endambi muyahika abandu bamabya bangyi oko kihugho. Abandu bangyi babya babi. Nibya n’abamalaika balebe mubabya babi. Mubasighania obwikalo bwabo bw’elubula bamasa oko kihugho. Unasi ekyaleka ibakola ekyo? Mubakola ekyo batoke eryambala emibiri y’abandu n’eriyimirya abakali.

Abamalaika n’abakali abo mubabuta abana. Abana abo mubakula bamabya n’akaghala kanene kutsibu kandi ini b’omwagha. Ibakahutalaya abandu. Yehova abya isyangalighira ebindu ng’ebyo erilola embere. Neryo mwabugha ati akenditoghotya abandu babi omw’Ibwagha ly’Amaghetse.

Aliwe habya omulume mughuma oy’utabya ng’abandi. Aby’anzire Yehova. Erina liwe lyabya Noa. Abya awite omukali n’abaghala basatu, ye Semu, Hamu, na Yafeti, kandi obuli mughala wiwe abya inianawite oko mukali. Yehova mwabwira Noa ati ahimbe obwato bunene kutsibu iye n’ekihanda kiwe batoke erisyasabuka okw’Ibwagha ly’Amaghetse. Obwato obo bwabya ng’erisanduku rinene kutsibu eryanganaleleta oko maghetse. Kandi Yehova mwabwira Noa ati ingiraye esyonyama nyingyi sy’omo bwato nasyo sitoke erisyasabuka.

Neryo Noa mwalw’inyatsuka erihimba obwato. Noa n’ekihanda kiwe mubabugha hakuhi emyaka 50 ibanemuhimbabo. Mubahimbabo ngoko Yehova anababwira. Oko mughulu oyo, Noa iniakabya inianemubwira abandu ngoko hakendibya Eribwagha ly’Amaghetse. Aliwe muhatabya n’omughuma oyo wamuhulikirira.

Oko nduli, endambi y’eryingira omo bwato muyahika. Tulebaye ekyakwama nga niki.