Abandu munani mubasabuka

Noa, ekihanda kiwe, n’esyonyama mubingira omo bwato. Yehova mwakinga omulango, neryo embula yamatsuka eriwa. Muyawa kutsibu obwato bwamatsuka erileleta oko maghetse. Oko nduli, ekihugho kyosi mukyusula mw’amaghetse. Ehihya sy’obwato, abandu babi bosi mubahola. Aliwe Noa n’ekihanda kiwe babya ibane ndeke omo bwato. Terilengekania obutseme obo babya nabo kundi mubowa Yehova!

Embula muyawa omo biro 40 omo kiro n’omw’itungyi, neryo muyakya. Amaghetse mwaghenda akakeha lyolo-lyolo. Oko nduli, obwato mubwayiteka oko kitwa. Aliwe amaghetse abya inyakine manene ehosi, neryo Noa n’ekihanda kiwe babya isibangalua omo bwato mw’aho n’aho.

Lyolo-lyolo, amaghetse ayo mwahikira eryuma. Noa n’ekihanda kiwe mubabugha omo bwato mo biro bingyi oko mwaka mughuma. Neryo Yehova mwababwira ati balue omo bwato n’eringira omo ekyabya nga ni kihugho kihya-kihya. Mubasima Yehova yo kutsibu busana n’eribasabula, kandi mubakangania ekyo omw’iherera Yehova y’obuhere.

Yehova mwatsemera obuhere obo. Mwalagha ati syendisyasyatoghotya ekihugho omo maghetse. N’erikangania ngoko endaghane eyo ni y’ekwenene, mwaleka ekima ky’erimbere ikyalangirika omo bitu. Une watalangira ekima?

Neryo Yehova mwabwira Noa n’ekihanda kiwe ati babute, busulaye ekihugho.