Inywe mukekeluhire, muli b’omughaso munene omo ndeko

Naghu kutya bwanganabya ibwabirihwamo busana n’erikekeluha. Nibya nomo wangabya iwabirikolera Yehova butaleghula omo myaka mingyi, wanganabya ukayighonera busana n’emyatsi eyo utakitoka erikola. Kwa muhwa wanganabya ukalingirirania ebyo ukakola lino n’ebyo wabya ukokola kera, neryo iwabunika mutima. Byamabya bitya, ekyangakuwatikya erilwa n’amalengekania ng’ayo niki?

EBYO YEHOVA AKAKULINDIRIRAKO

Uyibulaye uti, ‘Yehova akanilindirirakoki?’ Ebinywa ebiri omo Eryibuka Ebihano 6:5, byanganakusikya mutima. Bibughire biti: “Litolere iwanza Yehova oMungu waghu n’omutima waghu wosi, n’enafsi yaghu yosi, n’akaghala kaghu kosi.”

Erikwamana n’erisako eryo, Yehova akakulindirirako erimukolera n’omutima waghu wosi, n’enafsi yaghu yosi, n’akaghala kaghu kosi. Ekyo kyanganakuwatikya eritendibya ukayilingirirania n’abandi, kutse erilingirirania ebyo ukakola lino n’ebyo wabya ukakola kera.

Terilengekania oko kino: Omughulu wabya mulwana, wabya ukaha Yehova yoki? Abangyi b’oko baghombe ba Yehova ibanganasubirya bati babya ibakamuha ekyuwene kundu ekyo babya bawiteko. Naghu ebyo wabya ukakolera Yehova kyo kyabya ekyuwene kundu erikwamana n’emibere eyo wabyamo oko mughulu oyo. Niki kyo wangatoka eriha Yehova yo lino? Erikwamana n’embirere eyo ulimo lino, ebyo ukakolera Yehova ky’ekyuwene kundu ekyo ukamuha, kundi ekyo kyo wangatoka erikola lino. Wamabilangira emyatsi yo utya, iwanganalangira ngoko ekyo ukaha Yehova lino ni kighumerera n’ekyo wabya ukamuha ighukinawite akaghala. Wabya ukamuha ekyuwene kundu oko mughulu oyo, na lino unemumuha ekyuwene kundu.

WANGANAWATIKYA ABANDI BO KUTSIBU

Oghundi mwatsi w’ono: Omo mwanya w’eribya ukalangira olubwa lwaghu nga lwabiribya lukakukakirya erikola bingyi ngoko wabya ukakola, ulangirelo mo kanya k’eriwatikya abandi. Eribugha ekwenene, olubwa lwaghu lwa lino, lwanganaleka iwakola emyatsi milebe eyo wabya isiwangatoka erikola omughulu wabya ighukine mulwana kutse mumbesa. Ng’emyatsi eyikwamire eno:

Ubye ukakanirya abandi oko ebyo wabirilolako. Lebaya ebyo eBiblia ikabugha omo masako awakwamire:

Omwami Daudi: “Nabya mulere, na lino niri mundu mukulu, aliwe sindinatalangira omutunganene akalekeranibwa, kutse abana biwe bakasabirirya akalyo.”​—Esy. 37:25.

Yosua: “Neryo lino, mulebaye! Nikisiya inahola. N’emitima yenyu yosi n’esyonafsi syenyu sinasi ndeke-ndeke ngoko sihali n’ekinywa n’ekighuma oko milaghe yosi eyuwene eyo Yehova Mungu wenyu abalagha, ekyabiribula eribererera. Ebyosi byabiribererera busana nenyu, sihali n’ekighuma ekyabula eribererera.”​—Yos. 23:14.

Wanganabya imuwanakolesya ebinywa ebi ighukine mulwana kutse mumbesa erisikya abandi bo mutima. Ye Daudi na Yosua mubabugha ebyo balabamo omo ngebe. Obuli mughuma w’oko baghombe bataleghula ba Yehova aba abya inyanasi ebyo akabugha, kundi babya bakakania oko myatsi eyo bayilangirira n’eryowa.

Wamabya iwabiribugha emyaka mingyi ighunemukolera Yehova, naghu, erilabira ebyo wabiriyilolerako wanganakania oko ndundi eyikaluira omw’ikolera Yehova. Unibukire omughulu mulebe ogho wayilangirira Yehova akawatikya abaghombe biwe omo nzira eyikaswekaya? Hamabya ihane omwatsi mulebe ogho wabiriyilangirira, uyowe bwiranda erikanirya kugho kw’abandi! Ekyo kyanganatulerya abandi, alinga naghu wanabiriyilangirira ekyo. Kutya omughulu ukakaniraya abandi oko myatsi eyo wabiriyilangirira ukakolera Yehova, aho iwanganabasikya mutima kutsibu.​—Rom. 1:11, 12.

Eyindi nzira eyo wangabya ukasikyamo abandi mutima ry’eribya ukakola ngoko wangatoka eriya oko mihindano y’endeko ko kibiri-biri. Oko mihindano kw’eyo, wanganasikya abandi bo mutima naghu kutya iwasikibwa mutima. Connie, oyo twabirikaniako akabugha ati: “Eriya oko mihindano ko kibiri-biri kikaniwatikaya eritendibunika mutima. Sinangabunika mutima kundi oko Kisenge ky’Obwami abaghala n’abali betu bakanikanganaya olwanzo. Erikangania erisima lyaghe oko bandi, ngabya ngahabo ehindu hike-hike mo bihembo. Kandi ngayikasa eribya ininemusangira oko mibiiri y’obunya-kirimu n’abaghala n’abali betu.”

YEHOVA AKATSEMERA EBYO UKAMUKOLERA

Omo Biblia mune eby’erileberyako by’abandu abatabya bakakola bingyi ngoko babya bakakola kera, aliwe Yehova abya anzirebo. Terilengekania oko mulume Muisraeli oyukahulawa mo Simeoni. Omughulu Yesu abutawa, Simeoni abya inyabiribya musyakulu. Omughulu Simeoni abya akaya oko hekalu, kitokekene abya inyakalangira abalwana bakakolayo emibiiri y’omughaso. Ibwa Simeoni naye inyakayakolayo wahi? Oko malengekania w’abandu, Simeoni anganalengekanirye ati syakiwite mughaso omo meso wa Yehova. Aliwe Yehova iye kw’atabya akamulangira atya. Inyakalangira Simeoni mo “mundu oyutunganene n’oyukubaha oMungu.” N’ekindi, Yehova mwatsumula Simeoni. Mwamuha olusunzo lw’erilangira Yesu inyakine mwana. Ibwa kandi, Yehova mwakolesya Simeoni eribugha omo buminyereri ngoko Yesu yukendisyabya Masiya! (Luka 2:25-35) Kilangirikire ndeke-ndeke ngoko ekyo Yehova abya akalangira oko Simeoni, si bo busyakulu bwiwe, aliwe abya akalangira omulume w’obwikirirya obuwatire ‘n’oyuliko ekirimu kibuyirire.’

Naghu kutya, wikiriraye ngoko ebyo ukakolera Yehova omo butaleghula, Yehova akalangirabyo mo by’obughuli nomo wangabya isighukikola bingyi ng’embere. Ebyo omundu akakola, “oMungu akalighabyo, kundi anzire omundu oyukateka ebyangabana, butsira ebyo ate angabana.”​—2 Kor. 8:12.

Neryo kwesi, ubye ukahira amalengekania oko ebyo wangatoka erikola. Ng’eky’erileberyako, terilengekania nga ukinawite obutoki bw’erikolako oko muhanda wahi w’eritula engulu mbuya! Hamabya ihane omuhanda mulebe, ubye ukatulira omo nzira eyo nibya nomo kyangabya omo katambi kake. N’ekindi wanganasikya abaghala n’abali betu bo mutima omw’ibya ukababirikira kutse eribatumira akabaruha. Ehyatsi hike-hike, kutsibu-tsibu hyamabya ihikakolawa n’abandu ababirikolera Yehova omo myaka mingyi, hyanganatula oko mitima y’Abakristo balikyenyu ko kutsibu.

Obutoki bw’abandi bukakeha busana n’omubiri eryoloba. Ulebaye omwatsi owalolawako omo Afrika y’oko luhande lw’eyo eryuba likasira. Omwatsi oyo akanibweko omo kasanduku “Mulyasabula engebe yiwe.”

Isimwibirirawa ngoko abandi banganasikibwa mutima bakabalangira mukakolera Yehova butaleghula omo myaka mingyi. Bakabalangirirako eriyiyinia; kandi muminye ngoko “OMungu si mundu mubi, neryo syendisyibirirwa ebyo mukakola n’olwanzo olo mwakanganaya busana n’erina riwe omw’ikolera ababuyirire n’eritendileka eribakolera.”​—Ebr. 6:10.

UYITSINGE ERIKOLA BINGYI NGOKO WANGATOKA ERIWATIKYA ABANDI

Abasomi bakakanganaya ngoko abasyakulu n’abakekulu abakawatikaya abandi bakabya n’emibiri eyikalire, bakalengekanaya ndeke oko myatsi, kandi bakabugha ebiro bingyi.

Ni kwenene, erikola ebibuya sikyangabughaho amaligho wosi awakaluira omw’ikekeluha. Obwami bw’oMungu busa bo bukendisyakola ekyo. Bukendisyabughaho ekikaleka itwakekeluha n’erihola, ni bugha ambu erilolo.​—Rom. 5:12.

Nomo bine bitya, erikola ebyo Yehova akakusaba erikola, ekihiriremo n’eriwatikya abandi, kyanganakuwatikya nibya na lino eribya n’amaha awawatire n’eribya n’omubiri owakalire. Neryo kisi baghala n’abali betu inywe mwamabikekeluha, muminye ngoko Yehova akalangira ebyo mukamukolera mo kindu ky’obughuli, kandi ngoko abaghala n’abali benyu abo muli nabo omo syondeko bakabalangira mo bandu b’obughuli kundi muli bataleghula.