Wanamibuka?

Muwanasomire ndeke emyatsi yosi y’omo syogazeti Akaleberyo k’Omuteya esy’omwaka ono? Byamabya bitya, lebaya nga wanganasubirya oko mabulyo ano:

Ebikatukuna eriha Yehova y’olukengerwa

Tukaha Yehova y’olukengerwa kundi tumusikirye kutsibu kandi tumwanzire kutsibu. Kandi tukamuha olukengerwa kundi twanzire abandi nabo ibamuminya.​—w25.01, aka. 3.

Omundu mulebe amatukosera, ekyangatuwatikya erighanyira kundu niki?

Situliliba-libanaya ngoko tukayowa, sitwangatoka erikakirya ebyo balyatukolera, aliwe erighanyira n’eritendibika ekinigha kyanganatuwatikya eritendighalirwa omo mutima.​—w25.02, aka. 15-16.

Busanaki Mariko ni ky’erileberyako ekyuwene oko baghala betu balwana?

Butsira erikunwa Mariko mwaligha omubiiri ogho ahabawa. Kitokekene mwayowa muhanda n’eribunika mutima busana n’ebyamuhikira, aliwe nomo byanabya bitya, Mariko mwatalwika. Mwabetekerera obwira haghuma na Paulo n’abandi Bakristo abakulire bunya-kirimu.​—w25.04, aka. 27.

Yesu asond’ibugha atiki omughulu asaba ati: “Nabiriminyisyabo erina lyaghu”? (Yohana 17:26)

Abigha ba Yesu babya ibanasi erina ly’oMungu. Aliwe Yesu abya akasonda eribakangania Yehova nga ni Mungu oyuli ati. Mwabawatikya eriminya Yehova yo ndeke, eriminya emibiiri yiwe, n’emibere yiwe n’ebyo anzire erikolera ekihugho n’abandu.​—w25.05, aka. 20-21.

Twamabya n’omubere w’eriyikehya, itukendiminyaki?

Tukaminya ngoko hane emyatsi eyo tutasi. Eky’erileberyako, sitwasi enduli y’ekihugho kibi kino nga yikendisyasa mughulu wahi kutse oko mughulu oyo Yehova ng’anganasyatuwatikya ati. Kandi nibya sitwasi ebikendisyabya omungya kutse sitwangatoka eriminya Yehova ng’atwasi omo lulengo lungahi.​—w25.06, aka. 15-18.

Ekyangatuwatikya niki tutoke eribana endundi omo mwatsi mulebe kutse omo mukania w’abandu bosi?

Twanganayibulya tutya: Ni yindi myatsi yahi eyamakangania ngoko amakangirirya aya ni w’ekwenene? Nangakolesya niti eky’erileberyako eki omughulu ngakangiriraya? Omwatsi ono anganawatikya ndi?’​—w25.07, aka. 19.

Enzira eyo oMungu akoleramo Daudi, yikatuwatikaya eriminyaki oko bughanyiri bwiwe?

Daudi mwakola amalolo awakalire, aliwe kundi mwabindula omutima wiwe wo ndeke-ndeke, Yehova mwamughanyira. (1 Ab. 9:4, 5) Omughulu oMungu akatughanyira, akibirirawa amalolo wetu, ni bugha ambu, syangatasyatusuyira busana nagho. .​—w25.08, aka. 17.

Hamabya omwasi owamakala oko mwigha w’eBiblia eryowa, wangayira ghuti?

Wabimuwatikya eryowa omwatsi mulebe wo ndeke-ndeke erikwamana n’eBibilia, aliwe ikyabya ikikinamukalireko eryowa omwatsi oyo, mulabe oko mwatsi oyo, neryo upange erisyasuba kugho ko bolo.​—w25.09, aka. 24.

EBiblia ikabugha yiti erilolo riwite “obutoki . . . obukateba omundu.” (Ebr. 3:13) Ekyo ni bugha ambuki?

Erilolo ryanganaleka itwakola emyatsi eyituwene. Kandi nibya ryanganaleka itwabya tukatika-tika, itwatsuka eribya tukayibulya Yehova ng’anatwanzire.​—w25.10, aka. 16.

Ni myatsi isatu yahi eyangatuwatikya eribya tukasaba erilua oko mutima?

(1) Twanganabya tukalengekania buli oko mibere ya Yehova. (2) Twanganabya tukalengekania oko ebikatukenderaya neryo itwahulabyo omo musabe, ng’erisaba tuti atuwatikaye eribya tukaghanyira. (3) Twanganabya tukasaba omo ndambi nyiri. Ekyo ikyanganatuwatikya eribugha ebiri oko mutima.​—w25.10, aka. 19-20.

Twangawatikya tuti abandu abakulire omo myaka?

Twanganabya tukayabana abakulire omo myaka kutse eribirikirabo oko telefone. Kandi twanganatwalabo oko lupitali. Kutse twanganakola n’abakulire omo myaka omo mihanda mbiriri-mbiriri y’eritula engulu mbuya.​—w25.11, aka. 6-7.

Endwa y’Ekikristo eyiyisikirye, litolere iyaberererya emyatsi mikulu yahi?

Ngambe iyakwama emighambo y’Eleta. Iyabyamo akabembere akakakanganaya emibere eyikalua oko kirimu ky’oMungu. Isimwalabayaho kateho omo myambalo kandi muyikase eriyihighula oko mitsye eyitahambene n’Amasako. Mukaniranaye ndeke oko myatsi omughulu w’eriteghekania endwa.​—w25.12, aka. 21-24.