Wanganalola embere erigha esyosomo omo makangirirya w’omusingi w’eBiblia

1. Amakangirirya w’omusingi w’eBiblia agho wigha ukatsuka erigha eBiblia mwakuwatikya ati?

AMAKANGIRIRYA w’omusingi w’eBiblia abiribindula engebe yetu. Ng’eky’erileberyako, omughulu twigha ngoko erina ly’oMungu ni Yehova, mutwatsuka eriyitunda hakuhi naye. (Isa. 42:8) Omughulu twaminya emibere eyo abaholi balimo, mutwaleka eribya tukayibulya nga bakaghalawa kutse iyehe. (Omug. 9:10) N’omughulu twaminya endaghane y’oMungu y’eriyira ekihugho mo Paradiso, mutwaleka eribya tukahangya-hangya busana n’ebiro byetu ebikasa. Mutwikirirya ngoko engebe yetu siyendisyabya y’emyaka 70 kutse 80 misa, aliwe ikendisyabya engebe ya kera na kera.​—Esy. 37:29; 90:10.

2. Erisako lye 2 Petro 1:12, 13 likakanganaya liti ngoko nibya n’Abakristo abakulire banganabana endundi omo makangirirya w’omusingi w’eBiblia?

² Situtolere erilengya-lengya amakangirirya w’omusingi w’eBiblia. Omukwenda Petro mwahandikira ebaruha yiwe y’akabiri Abakristo ababya ‘ibabirihanda emirihi omo kwenene.’ (Soma 2 Petro 1:12, 13.) Oko mughulu oyo, omo ndeko mwabya abandu babi ababya banzire erilusya abandi omo kwenene. (2 Pet. 2:1-3) Petro mwanza eriwatikya abaghala n’abali babo eriyiteya oko makangirirya w’amabehi agho abandu abo babya bakakangirirya. Erikola atya, mwibukyabo amakangirirya malebe w’omusingi agho babya ibabirigha. Amakangirirya ayo mwawatikyabo erisighala bataleghula erihika oko nduli.

3. Teka eky’erileberyako ekikakanganaya nga ni busanaki Abakristo batolere ibalola embere erilengekania oko makangirirya w’omusingi w’eBiblia.

³ Nomo twabiribugha emyaka mingahi omo kwenene, hane esyosomo nyihya esyo twangigha omo makangirirya w’omusingi w’eBiblia. Tuteke eky’erileberyako. Omundu oyo wasi erihuka n’omwigha, abosi banganakolesya ebiungo bighumerera erihuka akalyo kalebe. Aliwe, oyo wasi erihuka ndeke oyo anganakolesya ebiungo bighumerera ebyo n’erihuka akandi kalyo kandi, akasihire kutsibu. Kutya ababirikolera Yehova oko myaka mingyi n’abigha bahya b’eBiblia banganigha emyatsi eyisighene omo makangirirya w’omusingi w’eBiblia. Emibere yetu n’ebyo tukakola omo mubiiri wa Yehova byanganabya ibyabiribinduka erilua ekiro twabatisibawa. Neryo omughulu tukalengekanaya oko makangirirya w’omusingi w’eBiblia agho twigha kera, twanganafumbula esyosomo nyihya esyanganatuwatikya. Tukanaye oko syosomo esyo Abakristo abakulire banganigha erilua omo makangirirya asatu w’omusingi w’eBiblia.

YEHOVA YO MUHANGYIKI

4. Eriminya ngoko Yehova yo Muhangyiki mulyatuwatikya liti?

⁴ “Oyo wahimba ebindu byosi ni Mungu.” (Ebr. 3:4) Tunasi ngoko Omuhangyiki w’amenge n’Omutoki w’ebyosi yo wahangyiki ekihugho kyetu n’ebyosi ebirimo. Kundi n’iye yo watuhangyika, atwasi ndeke-ndeke, n’ekikulu kutsibu atutsomene. Anasi emyatsi eyuwene eyitutolere. Eriminya ngoko Yehova yo Muhangyiki, mulyabindula engebe yetu n’erituha amaha.

5. Ni kwenene yahi eyangatuwatikya eribya n’omubere w’eriyikehya? (Isaya 45:9-12)

⁵ Eryibuka ngoko Yehova yo Muhangyiki lyanganatuwatikya eribya n’omubere w’eriyikehya. Yobu abere abihwerya amalengekania wiwe okw’iye n’oko bandi, Yehova mwamwibukya ngoko n’iye Muhangyiki kandi Mutoki w’ebyosi. (Yobu 38:1-4) Ekyo mukyibukya Yobu ngoko mughulu wosi Yehova akakola ekyuwene. Erikwamana n’ekwenene eyi, omuminyereri Isaya naye mwahandika ati: “Eribumba lyanganabwira omubumbi liti: ‘Ukakokotayaki kwe?’”​—Soma Isaya 45:9-12.

6. Ni mughulu wahi ogho tutolere itwalengekania oko bukulu bwa Yehova, Omuhangyiki wetu? (Ulebaye n’esyopitsa.)

⁶ Omughulu Omukristo anemulola embere erikula bunya-kirimu, anganatsuka eriyiketera kutsibu amalengekania wiwe omo mwanya w’eriyiketera Yehova n’Ekinywa kiwe. (Yobu 37:23, 24) Aliwe amabilengekania kutsibu oko menge n’oko bukulu b’Omuhangyiki wiwe, ekyo ikyanganamuwatikya kiti? (Isa. 40:22; 55:8, 9) Ekyo ikyanganamuwatikya eriyikehya n’eritendibya akayiketera amalengekania wiwe.

7. Mwali wetu Rahela mwakolaki eriligha obusondoli buhya?

⁷ Erilengekania oko Muhangyiki lyabiriwatikya mwali wetu Rahela, oyo wikere e Sloveni, eribya akaligha esyombinduka sy’endondeka. Akabugha ati: “Ndambi silebe, ikikanikalako eriligha emyatsi eyo abakatusondola balyayisogha. Ng’eky’erileberyako, nibya n’enyuma w’erikwama Omwatsi muhya wo 8 owe Kyaghanda Ekikasondola owe 2023, munahitana ngalangira engendo y’erimbere mughala wetu mughuma akalabya omukania inianeko esyonderu. Neryo munasaba Yehova aniwatikaye eriligha embinduka eyo.” Rahela mwaminya ngoko Yehova, Omuhangyiki w’olubula n’ekihugho, ali n’obutoki bw’erisondola endondeka omo nzira eyuwene. Naghu kyamabya ikikakukalako eriligha eriminya rihya kutse erikwama obusondoli buhya bw’endondeka, kyanganuwana iwayikehya n’erilengekania oko menge manene n’obutoki b’Omuhangyiki wetu.​—Rom. 11:33-36.

BUSANAKI OMUNGU AKALEKERANAYA AMALIGHO?

8. Eriminya busanaki oMungu akalekeranaya amaligho lyabirikuwatikya liti?

⁸ Busanaki oMungu akalekeranaya amaligho? Abandu balebe abatasi ekisubiryo oko ribulyo eri babirihitana oko Mungu, n’abandi bakalw’ibabugha bati syali! (Misyo 19:3) Aliwe iwe, wabirigha ngoko Yehova siyo yukaleka itwaghalwa, aliwe tukaghalawa busana n’erilolo n’eritendihika-hikana. Kandi wabirigha ngoko erilindirira lya Yehova lyabiriwatikya amamilioni w’abandu erimuminya n’erilangira ngoko akendisyabughaho losi amaligho w’abandu. (2 Pet. 3:9, 15) Ekwenene eyi yabirikukirania n’erileka iwayitunda hakuhi naye.

9. Ni mughulu wahi ogho twanganayibulya nga ni busanaki Yehova akalekeranaya amaligho?

⁹ Tukalindirira Yehova abugheho amaligho, tutolere itwahanda omutima. Aliwe, omughulu twamaholerwa kutse erikolerwa omo nzira eyituwene, twanganayibulya nga ni busanaki Yehova akinalindirira. (Hab. 1:2, 3) Omo mughulu owali ng’oyo, ni ky’amenge erilengekania nga ni busanaki Yehova akalekeranaya abatunganene eryaghalwa.a (Esy. 34:19) Kandi twanganalengekania oko ndaghane yiwe ey’erisyabughaho losi amaligho.

10. Ekyabiriwatikya Anne erikiranibwa niki?

¹⁰ Eryibuka ekikaleka itwaghalwa lyanganatuwatikya eriyiyinia. Ye Anne, oyo wikire omo bitsira bye Mayotte, ebiri omo Ngetse Nene ye India, akabugha ati: “Munakwa obulighe bunene omughulu mama waghe ahola. Aliwe, kangyi-kangyi ngayibukaya ngoko Yehova siyo yukaleka itwaghalwa. Alindirire n’engumbu nene eribughaho amaligho wosi n’erilubukya abanzwa betu. Omughulu ngalengekanaya oko myatsi eyi ngakiranibawa n’eritekana omo bwenge.”

11. Eryibuka ekikaleka Yehova inialekerania amaligho likatuwatikaya liti erilola embere eritulira?

¹¹ Eryibuka ekikaleka oMungu inialekerania amaligho lyanganatuhiramo omuhwa w’erilola embere eritulira. Petro abere abikangania ngoko Yehova akalindirira kundi anzire abandu ibayisubako n’erisyabana engebe, mwabugha atya: “Mulengekanaye nga ritolere imwabya abandu abali bati. Ritolere imwabya n’emighendere mibuyirire n’erikola emyatsi eyikakanganaya ngoko mukamakirira oMungu.” (2 Pet. 3:11) Omubiiri w’eritulira ni mughuma w’oko ‘myatsi eyikakanganaya ngoko tukamakirira oMungu.’ Netu twanzire abandu nga Tata wetu w’elubula. Twanzire nabo ibasyingira omo kihugho kihya-kihya ky’oMungu. Omw’ilindirira, anemuha abandu b’eyo wikere b’akanya k’erimuramya. Ni lusunzo lunene erikola haghuma n’oMungu ngoko wangatoka eriwatikya abandu bangyi erimuminya embere enduli yihike!​—1 Kor. 3:9.

TULI OMO “BIRO BY’ENDULI”

12. Eriminya ngoko tuli omo “biro by’enduli” lyabirituwatikya liti?

¹² EBiblia yabya iyabirikangania ndeke-ndeke ngoko abandu bakendisyabya omo “biro by’enduli.” (2 Tim. 3:1-5) Emibere y’abandu munabwire inemulola embere eritsanda kutsibu. Ekyo kikakanganaya ngoko obuminyereri obu bunemubererera. Ebyo tukalangira munabwire bikaleka itwikirirya ndeke-ndeke ngoko Ekinywa ky’oMungu kikabugha ekwenene.​—2 Tim. 3:13-15.

13. Erikwamana n’omusyo wa Yesu owali omo Luka 12:15-21, ni mabulyo wahi agho tutolere eriyibulya?

¹³ Eryibuka ngoko tuli omo biro by’enduli likatuwatikaya erikolesya ndeke endambi yetu. Tukalangira omughaso w’erikola tutya omo musyo wa Yesu owali omo Luka 12:15-21. (Soma.) Busanaki omulume muteke oyo mwahulwa mo “mukiru”? Si busana abya muteke, aliwe lyabya busana n’eritendihira embere emyatsi y’omughaso. ‘Mwayilundikira ebindu aliwe isi muteke embere sy’oMungu.’ Eritendikolesya ndeke endambi yiwe yabya kosa eyikalire kundi oMungu mwamubwira ati: “Munabwire omo kiro bakendibughaho obuyingo bwaghu.” Enduli y’ekihugho ikaseghera hakuhi kutsibu, tutolere itwayibulya tuti: ‘Ebyo ngakwamirira erikola binemukangania ngoko ninemukolesya ndeke endambi yaghe? Ni miradi eyiri yiti eyo nganza abana baghe bakwamirire? Ninemukolesya akaghala kaghe, endambi yaghe, n’esyofranga syaghe busana n’eriyilundikira ebindu oko kihugho, kutse busana n’eribya muteke embere sy’oMungu?’

14. Eky’erileberyako kya Miki, kyamakangania kiti ngoko ni ky’omughaso eribya tukibuka ngoko tuli omo biro by’enduli?

¹⁴ Eryibuka ngoko tuli omo biro by’enduli lyanganatuwatikya eriyisogha ndeke. Ekyo kyo kyahikira mwali wetu oyukahulawamo Miki. Akabugha ati: “Nabere nabibana ediplome, munanza erisyabana omubiiri owanganiwatikirye eriminya ndeke esyonyama. Aliwe, kandi nabya nanzire eribya mupainia w’omughulu wosi n’eriyakolera eyiri obwagha bunene bw’abatuliri. Abira baghe abakulire bunya-kirimu mubaniwatikya erilengekania ndeke nga nanganatoka erikola ebyosi ebyo, ni bugha ambu omubiiri ogho nabya nanzire n’erihikira emiradi yaghe y’obunya-kirimu. Mubanibukya ngoko enduli y’ekihugho kibi kino yiri hakuhi, mubanibwira ngoko omo kihugho kihya ngendisyaminya bingyi oko syama, kandi kera na kera. Neryo, munayisogha erisoma akalasi akatendinilira endambi nene. Ekyo mukyaniwatikya eribana omubiiri owaniwatikaya omo bupainia. N’enyuma w’aho, munahumira e Ekwatere eyiri obwagha bunene bw’abatuliri.” Munabwire, Miki na mwira wiwe bane omo mutimbo omo kihugho ekyo.

15. Eky’erileberyako kya Yakobo kyamakangania kiti ngoko situtolere eribunika mutima busana n’abandu abatebaligha engulu mbuya? (Ulebaye n’esyopitsa.)

¹⁵ Omughulu abandu bamaghana erihulikirira engulu mbuya, situtolere eribunika mutima. Abandu banganabinduka. Tukanaye oko ky’erileberyako kya Yakobo, omughala wabo Yesu. Mwalangira ngoko Yesu anemukula, amahikira eribya Masiya, kandi ngoko sihabya omundu oyo wabya akakangirirya ngaye. Aliwe Yesu nomo byanabya bitya, Yakobo mwatalw’iniakwama Yesu. Aliwe abere abilubuka, Yakobo mwabya mwigha wiwe, kandi ow’omuhwa!b (Yoh. 7:5; Gal. 2:9) Isiwalengekanaya uti ukaluhira busa eriwatikya abatunga baghu abatebatsuka erikolera Yehova kutse eritasyatulira abaghana erikuhulikirira. Wibuke ngoko tuli omo biro by’enduli, neryo omubiiri w’eritulira ni w’erikola luba. Ebyo unemubabwira munabwire byanganasyabawatikya nibya n’enyuma w’eryaghalwa rinene lyabitsuka.c

UBYE UKASIMA YEHOVA BUSANA N’EMYATSI EYO AKATWIBUKAYA

16. Yehova eribya akakwibukya amakangirirya wiwe, lyabirikuletera endundi yahi? (Ulebaye n’akasanduku “Ukolesaye amakangirirya w’eBiblia eriwatikya abandi.”)

¹⁶ Amakangirirya malebe agho tukahabawa, akateghekanibawa busana n’abandu abatasi amakangirirya w’omusingi w’eBiblia. Ng’eky’erileberyako, omukania w’abandu bosi ow’obuli yenga, emyatsi mbiriri-mbiriri n’esyovideo ebikabya oko jw.org, n’amagazeti w’abandu bosi, bikateghekanibawa kutsibu-kutsibu busana n’abate Bimiri ba Yehova. Aliwe eribya tukibukibwa amakangirirya ayo kikatuletera endundi. Ekyo kikatuwatikya eritasyanza Yehova yo kutsibu, eriwatya obwikirirya bwetu omo Kinywa kiwe, n’eriminya ndeke erikangirirya abandi ekwenene eyo.​—Esy. 19:7.

17. Ni mibere yahi eyanganaleka itwalengekania oko makangirirya w’omusingi w’eBiblia?

¹⁷ Itwe Bimiri ba Yehova tukatsema kutsibu omughulu hamabya eriminya rihya erilebirye ekwenene eyiri omo Biblia. Aliwe kutya tukasima kutsibu busana n’amakangirirya w’omusingi w’eBiblia awatuwatikaya eryasa omo kwenene. Omughulu tulimutsuka erikwama amalengekania wetu omo mwanya w’erikwama obusondoli bw’endondeka ya Yehova, tutolere itwayikehya n’eryibuka ngoko Omuhangyiki w’amenge wosi n’Omutoki w’ebyosi yukasondola endondeka yetu. Omughulu tunemwaghalwa kutse omwanzwa wetu, ngambe itwahanda omutima n’erilengekania oko ebikaleka Yehova inyalekerania amaligho. N’omughulu tunemulengekania oko nzira eyuwene ey’erikolesyamo endambi n’ebindu byetu, tutolere itwibuka ngoko tuli omo biro by’enduli. Neryo kwesi, emyatsi eyo Yehova akatwibukaya, yilole embere eriwatya obwikirirya bwetu n’erituwatikya erilola embere erimukolera butaleghula.