Esyosomo esyo twangigha oko buminyereri obo Yakobo abugha akasonda erihola​—Ekitswe 1

1-2. Yakobo mwakolaki akasonda erihola, kandi busanaki? (Ulebaye n’epitsa y’oko kijalada.)

YAKOBO iniabirikekeluha kutsibu, iye n’ekihanda kiwe kyosi mubalua e Kanana bamaya e Misri. Eyo mwalola embere erikolera Yehova butaleghula omo myaka 17. (Enz. 47:28) Oko mughulu oyo, Yakobo mwatsema kutsibu akatasyalola oko mughala wiwe mwanzwa Yozefu, n’erilangira ekihanda kiwe kyosi kikatasyabya haghuma. Aliwe Yakobo mwaminya ngoko hakisiya hake iniahola. Neryo mwabwira abaghala biwe bosi ati basyamubane kundi abya n’omwatsi w’omughaso w’eribabwira.​—Enz. 49:28.

² Omo biro ebyo, tata w’ekihanda oyukasonda erihola iniakahindanaya ab’omo kihanda kiwe atoke eribabwira ebyalayiro biwe by’enduli. (Isa. 38:1) N’oko muhindano oyo inianganababwira nga nindi yukendibya mukulu w’ekihanda abihola.

3. Ngoko kiri omo Enzuko 49:1, 2, busanaki ebinywa bya Yakobo byabya by’embaghane kutsibu?

³ Soma Enzuko 49:1, 2. Aliwe omuhindano ono abya w’embaghane. Yakobo mwabugha ebikendisyabya omo biro ebikasa. Oko muhindano oyo Yehova mwasondola Yakobo abughe emyatsi y’omughaso eyendihikira abana biwe n’ebihanda byabo omo mughulu owakendisyasa. Busana n’ekyo, ndambi silebe ebinywa bya Yakobo bikahulawamo obuminyereri obo abugha akasonda erihola.

4. Ni binywa byahi ebyo Yakobo abugha, n’ebinywa ebyo byanganatwighisyaki? (Ulebaye n’akasanduku “Ekihanda kya Yakobo.”)

⁴ Omo mwatsi ono tukendikania oko binywa ebyo Yakobo abwira abaghala biwe bani: Rubeni, Simeoni, Lawi, na Yuda. N’omo mwatsi owakwamire tukendisyakania oko binywa ebyo Yakobo abwira abandi baghala biwe 8. Ngoko tukendilangira, ebinywa bya Yakobo sibyabya bilebirye abaghala biwe basa aliwe n’ebihanda byabo, abangabere ekihanda kye Israeli. Omughulu tukalengekanaya oko ebyahikira ekihanda kye Israeli, tukalangira ngoko ebinywa bya Yakobo mubyabererera. Kandi tukatsopolya ebinywa biwe, tukendigha esyosomo sy’omughaso esyangatuwatikya eritsemesya Tata wetu w’elubula, Yehova.

RUBENI

5. Rubeni anganabya iniabya akalindiriraki erilua oko tata wiwe?

⁵ Okw’itsuka, Yakobo mwakania na Rubeni. Mwamubwira ati: “Iwe kambere kaghe.” (Enz. 49:3) Alinga Rubeni mwalengekania ati kundi n’iye kambere ka Yakobo akendibana omwandu ngendo kabiri, kandi alinga abya akalengekania ati n’iye yukendibya mukulu w’ekihanda baba wiwe abihola. Kandi alinga abya akalengekania ati ab’omo kihanda kiwe bo bakendisyabya bakasondola ekihanda kye Israeli.

6. Busanaki Rubeni mwatahabwa omwandu owabya atolere erihabwa akambere? (Enzuko 49:3, 4)

⁶ Aliwe Rubeni mwatabana omwandu w’eribya kambere. (1 Emya. 5:1) Busanaki? Emyaka milebe embere sy’aho, Rubeni mwaghotsera na Bila, oghundi mukali wa Yakobo. Bila abya mughombe w’omukali mwanzwa wa Yakobo, ye Rakeli, oyo wahola. (Enz. 35:19, 22) Rubeni abya mughala wa Yakobo oko ghundi mukali, ye Lea. Alinga engumbu nene y’emyatsi y’engyingo yo yaleka Rubeni iniaghotsera na Bila. Kutse alinga mwaghotsera naye kinyanganga busana n’erikakirya Yakobo eryanza Bila yo kutsibu omo mwanya wa mama wiwe. Nomo myatsi yabya yiti, ebyo Rubeni akola mubitatsemesya Yehova na baba wiwe, ye Yakobo.​—Soma Enzuko 49:3, 4.

7. Niki kyo kyahikira Rubeni n’ab’omo kihanda kiwe? (Ulebaye n’akasanduku “Obuminyereri obo Yakobo abugha akasonda erihola.”)

⁷ Yakobo mwabwira Rubeni ati: “Siwendisyabya mukulu.” Ebinywa ebyo mubyabererera. EBiblia siyirikanganaya ow’omo kihanda kya Rubeni nga mwanabya mwami, omuhereri, kutse omuminyereri. Aliwe, Yakobo mwaha Rubeni y’omwandu, kandi ekihanda kya Rubeni mukyabya kighuma ky’oko bihanda bye Israeli. (Yos. 12:6) Rubeni mwakangania emibere eyuwene omo yindi mighulu, kandi sihali ahakakanganaya hati Rubeni mwasubira omo rilolo ry’obusingiri.​—Enz. 37:20-22; 42:37.

8. Eky’erileberyako kya Rubeni kyamatwighisyaki?

⁸ Twamighaki? Litolere itwalwa n’esyongumbu nyibi kandi itwayisogha kundu eritendikola oburaghene. Twamabilengwako erikola erilolo, tutolere itwimya akatambi k’erilengekania ngoko emikolere yetu yanganahutalya Yehova, ekihanda kyetu, n’abandi. Kandi litolere itwibuka ngoko “ekyo omundu akahera, ky’anemwendisyasoloma.” (Gal. 6:7) Oko lundi luhande, ebyahikira Rubeni bikatwibukaya ngoko Yehova ni mughanyiri. Twanganabya itunemwaghalwa busana n’amakosa agho twakola, twamabibindula omutima wetu n’erikola ebyuwene Yehova iniakendisyatughanyira n’eritutsumula.

SIMEONI NA LAWI

9. Busanaki Yakobo mwatatsemera Simeoni na Lawi? (Enzuko 49:5-7)

⁹ Soma Enzuko 49:5-7. Enyuma sy’aho, Yakobo mwakania na Simeoni na Lawi. Aliwe, ebyo abugha mubyakangania ngoko mwatabatsemera. Emyaka milebe embere, omulume mughuma we Kanana, ye Shekemu, mwaghotsera kinyanganga na mwali wa Yakobo, ye Dina. Abaghala bosi ba Yakobo mubapona kutsibu, aliwe Simeoni na Lawi ibo mubatakakirya obuhitane bwabo. Mubateba Shekemu n’abalume be Kanana n’eribabwira bati bamabibanibwa ihakendibya obuholo omo kati-kati kabo n’ekihanda kya Yakobo. Abalume abo mubaligha. Ibakine omo bulumi busana n’eribanibwa, Simeoni na Lawi “mubimya obuli mundu omuyali wiwe, bamingira omo muyi isihali oyo wasi, n’eriita obuli mulume.”​—Enz. 34:25-29.

10. Ebinywa bya Yakobo by’obuminyereri ebilebirye Simeoni na Lawi mubyabererera biti? (Ulebaye n’akasanduku “Obuminyereri obo Yakobo abugha akasonda erihola.”)

¹⁰ Yakobo mwahitana kutsibu kundi abaghala biwe babiri mubita abandu bangyi. Mwabugha ati bakendisyapanza-panzirwa omo Israeli yosi. Ebinywa by’obuminyereri ebyo mubyabererera enyuma sy’emyaka mingyi oko 200 ekihanda kye Israeli ikyabiringira omo Kihugho Ekyalaghawa. Ekihanda kya Simeoni mukyahabwa emiyi omo kitaka ky’omwandu kya Yuda. (Yos. 19:1) Ekihanda kya Lawi mukyahabwa emiyi 48 eyipanzalikene omo Israeli yosi.​—Yos. 21:41.

11. Ni myatsi yahi eyuwene eyo ekihanda kya Simeoni n’ekya Lawi bakola?

¹¹ Abana ba Simeoni n’aba Lawi mubatasubirira omo malolo w’abotatakulu wabo. Kandi abangyi b’oko Balawi mubakolera Yehova butaleghula. Omughulu Musa aya oko Kitwa kye Sinai erihabwa Emighambo erilua oko Yehova, Abaisraeli bangyi mubaramya ekyana ky’ende, aliwe Abalawi ibo mubaghana eriramya omungu w’amabehi. Omo mwanya w’ekyo, oho nyuma, mubawatikya Musa eritoghotya abaramaya ekyana ky’ende ekyo. (Eril. 32:26-29) Yehova mwasombola Abalume b’omo kihanda kya Lawi eribya bahereri omo Israeli. (Eril. 40:12-15; Emig. 3:11, 12) Oho nyuma, ekihanda kya Simeoni mukyawatikya ekihanda kya Yuda erilwa n’Abakanana busana n’ekiharo kyabo omo Kihugho Ekyalaghawa.​—Abat. 1:3, 17.

12. Eky’erileberyako kya Simeoni na Lawi kyamatwighisyaki?

¹² Twamighaki? Isitwalighira obuhitane erisondola eriyisogha ryetu kutse emikolere yetu. Itwe bosi tukahitana twamabikolerwa muhanda kutse omundu oyo twanzire amabikolerwa muhanda. (Esy. 4:4) Tutolere eryibuka ngoko Yehova syangatutsemera twamabibugha kutse erikola omwatsi owangahutalya abalyatukolera muhanda. (Yak. 1:20) Omughulu omundu mulebe amatukolera muhanda, abye iniakakolera Yehova kutse iyehe, tukakola omo nzira eyikatsemesaya Yehova. Ekyo kikatuwatikaya eritendibugha kutse erikola omwatsi owakahutalaya abandi. (Rom. 12:17, 19; 1 Pet. 3:9) Nomo Ababuti baghu banganabya ibanemukola emyatsi eyitetsemesaya Yehova, wibuke ngoko wanganayisogha eritendikwama eky’erileberyako kyabo ekituwene. Isiwalengekanaya uti siwangatoka eritsemesya Yehova. Yehova akendisyakuwatikya erikola ebyuwene kandi akendisyakuhemba busana n’erikola ghutya.

YUDA

13. Busanaki Yuda angabya imwahangya-hangya baba wiwe akasonda erikania naye?

¹³ Enyuma sy’aho, Yakobo mwakania n’oghundi mughala wiwe, ye Yuda. Abere abyowa ebyo Yakobo amabibwira abakulu biwe, alinga Yuda mwahangya-hangya. Naye mwakola amakosa malebe awakalire. Simeoni na Lawi babere bita abalume be Shekemu, Yuda n’abandi baghala babo mubingira omo muyi we Shekemu n’eriheka ebindu by’omo muyi oyo. (Enz. 34:27) Mwayighunga oko baghala babo bakaghulya Yozefu n’eriteba baba wabo oko mwatsi oyo. (Enz. 37:31-33) Enyuma, mwaghotsera n’omwalyana wiwe ye Tamari, akalengekania ati alinga ni mumbalaka.​—Enz. 38:15-18.

14. Ni myatsi mibuya yahi eyo Yuda akola? (Enzuko 49:8, 9)

¹⁴ Aliwe Yakobo mwapipa Yuda n’erimulagha ati emyatsi mibuya ikendisyamuhikira iye n’ekihanda kiwe. (Soma Enzuko 49:8, 9.) Yuda mwakangania ngoko atsomene kutsibu tata wiwe oyukekeluhire. Kandi mwakwira obulighe mughala wabo mulere ye Benyamini.​—Enz. 44:18, 30-34.

15. Obuminyereri obulebirye Yuda mubwabererera omo nzira syahi?

¹⁵ Yakobo mwabugha ati Yuda yukendisyabya akasondola abaghala babo. Aliwe, muhalaba hakuhi emyaka 200 embere obuminyereri obu bubererere. Abaisraeli babere babilua e Misri n’erilaba omo mbwarara bakaya omo Kihugho Ekyalaghawa, ekihanda kya Yuda kyo kyabya ky’erimbere erihongoka, n’ebindi bihanda mubyakwamakyo. (Emig. 10:14) Emyaka mingyi enyuma, Yehova mwaha ekihanda kya Yuda ky’omubiiri w’eribya ky’erimbere eriyalwa n’Abakanana busana n’erisinga Ekihugho Ekyalaghawa. (Abat. 1:1, 2) Na Daudi yo wabya w’erimbere oko bami bangyi abasira omo kihanda kya Yuda. Aliwe obuminyereri obulebirye Yuda mubwaberera omo sindi nzira.

16. Obuminyereri obuli omo Enzuko 49:10 mubwabererera buti? (Ulebaye n’akasanduku “Obuminyereri obo Yakobo abugha akasonda erihola.”)

¹⁶ Yakobo mwabugha ati oyukendisyatabala abandu bosi asyaluira omo kihanda kya Yuda kandi asyatabala kera na kera. (Soma Enzuko 49:10 n’ebinywa by’eyikwa.) Omutabali oyo ni Yesu Kristo, oyo Yakobo ahula mo Shilo. Omumalaika mughuma mwabugha atya oko Yesu: “Yehova Mungu akendisyamuha ekitumbi ky’obwami kya tata wiwe Daudi.” (Luka 1:32, 33) Kandi Yesu akahulawa mo “esimba y’omo kihanda kya Yuda.”​—Erib. 5:5.

17. Twangakwama tuti eky’erileberyako kya Yehova omo nzira eyo tukalangiramo abandi?

¹⁷ Twamighaki? Yehova mwatsumula Yuda nomo anakola amakosa malebe awakalire. Aliwe alinga abaghala babo mubayibulya busanaki Yehova amatsumula Yuda. Nomo sitwasi ebyo balengekanaya, tunasi ngoko Yehova mwalangira ebyuwene omo Yuda kandi mwamutsumula busana nabyo. Twangakwama tuti eky’erileberyako kya Yehova? Omughulu Omukristo mulikyetu amahabwa omubiiri mulebe w’embaghane, twanganayibulya busanaki mwakahabawa omubiiri oyo twamabya itunasi obulema bwiwe. Aliwe litolere itwibuka ngoko oko kwenene Yehova akatsemera emibere yiwe mibuya. Akasondekanaya emibere mibuya omo baramya biwe. Netu tuyikase eribya tukakola tutya.

18. Busanaki tutolere eribya n’omutima w’erilindirira?

¹⁸ Eyindi somo eyo twangigha oko ebyahikira Yuda ry’eribya n’omutima w’erilindirira. Mughulu wosi Yehova akaberereraya esyondaghane siwe, aliwe mughulu wosi syalikola atya ngoko twanzire kutse oko ndambi eyo twanzire. Abana ba Yuda mubatalw’ibatsuka erisondola omo kati-kati k’abandu b’oMungu. Aliwe mubalola embere erisighika abo Yehova asombola erikola batya, angabya Musa Omulawi, Yosua Omuefraimu, kutse Omwami Sauli Omubenyamini. Netu tutolere itwasighika abo Yehova akasombola erisondola omo kati-kati ketu munabwire.​—Ebr. 6:12.

19. Obuminyereri obo Yakobo abugha akasonda erihola, bwamatwighisyaki oko Yehova?

¹⁹ Twamabighaki oko buminyereri obo Yakobo abugha oko baghala biwe bani akasonda erihola? Oko kwenene “oMungu syalilangira ngoko omundu akalangira.” (1 Sam. 16:7) Yehova akalindirira kutsibu kandi akaghanyira. Syalitsema omughulu tukakola emyatsi eyituwene, aliwe kandi syalitulindirirako erihika-hikana. Nibya anganatsumula abandu abakola amakosa awakalire kera bamabibindula omutima wabo ndeke-ndeke n’erikola ebyuwene. Omo mwatsi owakwamire, tukendisyalangira ebyo Yakobo abwira abandi baghala biwe 8.