Isiwayilangiramo w’omughaso munene kutsibu
ABANDU balebe bakalengekanaya bati batolere erikolerwa ndeke kulenga abandi. Nomo banganakolerwa omo nzira nyilebe aliwe bakanza bati ngambe balyakolerawa ndeke kwilaba kw’aho. Bakabya n’amalekengania ayo kundi bakayilangiramo b’omughaso munene kutsibu. EBiblia yabya iyabiribugha yiti abandu b’oko biro by’enduli ko bakendisyabya batya.—2 Tim. 3:2.
Oko kwenene, omubere w’eriyilangiramo w’omughaso munene kutsibu syatsukire munabwire. Ng’eky’erileberyako, Adamu na Eva mubanza eriyisombolera ekibi n’ekibuya, n’eriyisogha lyabo eryo linemuleka itwe bosi itwaghalwa. N’ekindi eky’erileberyako kye ky’Omwami we Yuda ye Uzia. Mwalengekania ati atolere inyahamulirwa erihisya obukwa omo hekalu, aliwe mwayiteba kutsibu. (2 Emya. 26:18, 19) Kutya Abafarisayo na Basadukayo, babya bakalengakania bati batolere erikolerwa ndeke kulenga abandi bandu kundi Abrahamu ni tata-kulu wabo.—Mat. 3:9.
Netu tutimbirweko n’abandu abakayilangiramo b’omughaso munene kulenga abandi, neryo netu twanganabya n’omubere oyo. (Gal. 5:26) Twanganatsuka erilengekania tuti tutolere erisikibwa kutsibu kutse erikolerwa omo nzira nyilebe y’embaghane. Ekyangatuwatikya eritendibya n’amalengekania awali ng’ayo niki? Litolere itwaminya amalengekania wa Yehova oko mwatsi oyo. Esyokanuni ibiri sy’omo Biblia sikendituwatikya.
Yehova yo wasi ekyo tutolere. Tulebaye eby’erileberako bilebe.
Omo kihanda omulume atolere inasikibwa n’omukali wiwe, n’omukali naye atolere inyanzwa n’omwira wiwe. (Efe. 5:33) Abatahenie batolere ibakanganania olwanzo olo abali omo ndwa bakakangananaya, sibatolere erikangania olwanzo olo oko ghundi mundu. (1 Kor. 7:3) Abana batolere erisikya abatuti babo n’ababuti nabo batolere ibanza abana babo, n’eritsomanabo.—2 Kor. 12:14; Efe. 6:2.
Omo syondeko, abasyakulu abakakola butsibu batolere ibasikibwa. (1 Tes. 5:12) Aliwe nabo, sibatolere eritabala abaghala n’abali babo.—1 Pet. 5:2, 3.
OMungu abiriha abatabali b’ekihugho ehamuli y’erilihisya ebitasi n’erisikibwa.—Rom. 13:1, 6, 7.
Omo lwanzo lwiwe Yehova abirituha ebingyi kulenga ebyo tutolere. Kundi tuli bakola nabi tutolere erihola. (Rom. 6:23) Aliwe, busana n’olwanzo lwiwe oluteleghula Yehova akatuha emihisa mingyi. (Esy. 103:10, 11) Obuli muyisa kutse olusunzo olo akatuha ni busana n’olukogho lwiwe lunene.—Rom. 12:6-8; Efe. 2:8.
EBYANGAKUWATIKYA ERITENDIYILANGIRAMO W’OMUGHASO KULENGA ABANDI
Uyiteghaye oko malengekania w’ekihugho. Butsir’iminya twanganatsuka erilengekania tuti tutolere erikolerwa ndeke kulenga abandi. Yesu mwakangania ngoko amalengekania awali ngayo anganasa omo mundu mo mweghu-bweghu. Mwateka eky’erileberyako ky’abahingyi ababya kabalihwa edinari nguma. Abahingyi balebe mubatsuka omubiiri omo tututu n’erikola omo musibo wosi omo ryuba erikalire; n’abandi mubakola oko saa nguma nyisa. Abatsuka omubiiri omo tututu mubalengekania bati bakendipokera sinene busana n’omubiiri ogho balyakola. (Mat. 20:1-16) Yesu akakolesya eky’erileberyako ekyo, abya akasonda erikangirirya abigha biwe ngoko batolere eritsemera ebyo Mungu akabaha.
Abahingyi abakola omo musibo wosi babya bakalengakania bati bakendilihwa omusahara munene
Ubye ukasima, subye ukalindirira erihabwa. (1 Tes. 5:18) Wighe eky’erileberako ky’omukwenda Paulo oyutasaba ebindu oko baghala babo abe Korinto nomo anabya n’ehamuli y’erisaba. (1 Kor. 9:11-14) Tutolere eribya tukasima oko buli kihembo ekyo tukabana n’eriyihighula oko mubere w’eribya tukasaba-saba.
Omukwenda Paulo mwatasaba esyofranga
Ubye ukayikehya. Omundu amabya akayilengekaniako kutsibu, anganatsuka erilangira ngatolere eribya n’ebingyi kulenga ebyo ali nabyo. Twamabya tukayikehya, ikyanganatuwatikya eriyihighula oko mubere mubi oyo.
Omuminyereri Danieli inyakayikehaya n’ekyo mukyaleka inyabya w’omughaso munene embere sya Yehova
Omuminyereri Danieli abya eky’erileberyako ekyuwene ky’eriyikehya. Danieli mwakulira omo kihanda ky’abateke, inyaghambire, kandi inyawite obwenge. Emyatsi eyo yendileka inyalangira ngatolere eribana amadaraka agho ahabawa n’eritendikolerwa ng’abandi. (Dan. 1:3, 4, 19, 20) Aliwe Danieli mwalola embere eriyikehya, n’ekyo mukyaleka inyabya mundu w’omughaso munene embere sya Yehova.—Dan. 2:30; 10:11, 12.
Kwesi, tuyihighule oko mubere mubi owaswire omo kihugho kino ow’eriyilangiramo b’omughaso kutsibu kulenga abandi. Omo mwanya w’ekyo, muleke tutsemere obuli muyisa ogho Yehova akatuha busana n’olukogho lwiwe lunene.