Obukristo bwamahika omo bihugho bingyi

Abakwenda mubakwama erihano rya Yesu ery’eritulaghania engulu mbuya oko bihanda byosi. Omo mwaka 47 M.W., abaghala betu be Antiokia mubatuma Paulo na Barnaba omo lughendo lw’eriyatulira. Abatuliri babiri aba b’omuhwa, mubaghenda omo Asia Nge yosi nge Derbe, Listra, ne Ikoniamu.

Paulo na Barnaba mubatulira obuli mundu, angabya muteke kutse mwera, omulere kutse mukulu. Abandu bangyi mubaligha ekwenene eyilebirye Kristo. Omughulu Paulo na Barnaba batulira ye Sergio Paulo, omuguvernere we Kipro, omuloyi mughuma mwanza eribakakirya. Paulo mwabwira omuloyi oyo ati: ‘Yehova akendikusuyira.’ Aho n’aho, omuloyi oyo mwabya ndimetime. Abere alangira ekyo, omuguvernere mwabya mwigha wa Yesu.

Paulo na Barnaba mubatulira ehosi-hosi, oko buli nyumba, omo syosoko, oko syonzira, n’omo syosinagogi. Babere balamya ekirema e Listra, abosi abalangira ekitiko-tiko ekyo mubalengekania bati ni miungu, neryo mubanza eribaramya. Aliwe Paulo na Barnaba mubaghaniabo n’eribugha bati: ‘Muramaye oMungu musa! Tuli bandu ng’inywe.’ Neryo Abayahudi balebe mubasa n’eribindula emitima y’abandu, bamabindukira Paulo n’erimughana. Abandu mubamughusako amabwe, n’erimukurira ehihya w’omuyi, n’erimusighayo bakalengekania bati abirihola. Aliwe, Paulo abya iniakineho! Aho n’aho, abaghala betu mubasyamuwatikya n’erimusubya omo muyi. Enyuma sy’aho, Paulo mwasuba e Antiokia.

Omo mwaka 49 M.W., Paulo mwatsuka olughendo lwiwe lwa kabiri lw’eriyatulira. Mwatsuka eriyalebya abaghala babo omo Azia Nge. Neryo mwayatula engulu mbuya yo hali, omo Bulaya. Mwaya e Atene, e Efeso, e Filipi, e Tesalonika, n’ehandi. Sila, Luka, n’omulwana mulere ye Timoteo mubayighunga oko Paulo omo lughendo lwiwe. Mubawatikania eritsukisya esyondeko n’eriwatikya abaghala babo eribya n’obwikiriria obuwatire. Paulo mwikala e Korinto omo mwaka mughuma n’enusu akasikya abaghala babo b’omo muyi oyo. Mwatulira, mwakangirirya, n’erihandikira esyondeko nyingyi sy’esyobaruha. Kandi mwakola n’omubiiri w’eriluka esyohema. Enyuma sy’aho, Paulo mwasuba e Antiokia.

Omo mwaka 52 M.W., Paulo mwatsuka olughendo lwiwe lwa kasatu lw’eriyatulira. Mwatsuka omo Azia Nge. Mwahetukira e Filipi, oko luhande lw’endata, neryo amandaghalira e Korinto. Paulo mwabugha e Efeso y’emyaka mingyi, akakangirirya, erilamya abakoni, n’eriwatikya esyondeko. Kandi obuli kiro iniakalabaya emikania omo kalasi. Abandu bangyi ibakamuhulikirira n’eribindula emibere yabo. Oko nduli, abere abitula engulu mbuya omo bihugho bingyi, Paulo mwaya e Yerusalema.