Kornelio amahabwa ekirimu kibuyirire

E Kaisaria, yabya omukulu w’abasuda be Roma oyo wabya akahulwa mo Kornelio. Syabya Muyahudi, aliwe Abayahudi ibamusikirye. Iniakawatikaya abera. Kornelio mwikirirya Yehova kandi iniakamusaba buli kiro. Kiro kighuma, omumalaika mwamuhikira n’erimubwira ati: ‘OMungu abiriowa emisabe yaghu. Na lino utume abalume omo muyi we Yopa, eyo Petro ikere, n’eribugha uti ase ewaghu.’ Aho n’aho, Kornelio mwatuma e Yopa y’abalume basatu. E Yopa yabya oko bilometre hakuhi 50 oko luhande lw’eyikwa lwe Kaisaria.

Petro iniane e Yopa, mwalota enzoli. Mwalangira esyonyama esyo Abayahudi sibabya bahamulirwe erirya, neryo mwowa omulenge akamubwira ati, “ulye.” Petro mwaghana, mwabugha ati: ‘Sinirinatalya n’ekiro n’ekighuma enyama eyiterire.’ Neryo omulenge mwamubwira ati: ‘Isiwabugha uti esyonyama esi sisyerire. OMungu abiriryeryasyo.’ Kandi omulenge mwatasyabugha ati: ‘Abalume basatu bane oko mulango waghu. Ughende nabo.’ Petro mwaghenda oko mulango n’eribulya abalume abo ati nga bakasyendaki. Mubamusubirya bati: ‘Kornelio omukulu w’abasuda be Roma yulyatutuma. Ati ughende ewiwe e Kaisaria.’ Petro mwingiryabo omwiwe n’eribaha ah’erighotsera. Bwabere bwabikya, mwaghenda nabo e Kaisaria, haghuma n’Abakristo balebe be Yopa.

Kornelio abere alangira Petro mwawa oko bisandu biwe. Aliwe Petro mwabugha ati: ‘Hangana, naghe niri mundu nga we. OMungu mwakanibwira ati niase omo nyumba yaghu, nomo Abayahudi sibalyingira omo manyumba w’abandu b’ebihanda. Neryo nibwire ekiryaleka iwanyitumako abandu uti basyaniende.’

Kornelio mwabwira Petro ati: ‘Hamatalaba biro bini, nabya inine musaba oMungu, omumalaika mwanibwira ati nikutumeko omundu ayakwende. Kisi tukangiriraye ebinywa bya Yehova.’ Petro mwabugha ati: ‘Nabiriminya ngoko oMungu syawite akasololo. Akaligha obuli mundu oyukanza erimuramya.’ Petro mwabakangirirya emyatsi mingyi oko Yesu. Neryo ekirimu kibuyirire mukyahika oko Kornelio n’oko bosi ababya naye, n’abosi mubabatisibwa.