Omuteya w’engomo amaminya ekwenene

E Filipi, yabya omughombe w’obukali oyo wabyako embinga. Embinga eyo iyikakolesaya omumbesa oyo erilaghula, kandi abakama biwe ibakabana esyofanga nyingyi erilabira iye. Paulo na Sila babere bahika e Filipi, omumbesa oyo mwabakwama omo biro bingyi. Embinga muyaleka inialaka ati: “Abalume aba, ni baghombe b’oMungu Ow’endata Kutsibu.” Oko nduli, Paulo mwabwira embinga eyo ati: ‘Omo rina rya Yesu Kristo ngakubwira niti ulue omo mumbesa oyu!’ Neryo embinga eyo muyamuluamo.

Abakama b’omumbesa oyo babere baminya ngoko sibangatasyabana esyofranga erilabira iye, mubahitana kutsibu. Mubahamba Paulo na Sila bamabatwala eyiri abatsweri n’eribugha bati: ‘Abandu aba sibalisikaya emighambo kandi banemutsandya omuyi wosi!’ Abatsweri mubabugha bati Paulo na Sila bahunzawe n’erihirwa omo ngomo. Omuteya mwabaghusa omo kyumba ekirimo omwirimya munene n’eriboha ebisandu byabo omo kati-kati k’esyombagho ibiri.

Paulo na Sila mubimba esyonyimbo sy’eripipa Yehova, abandi ababya babohirwe nabo omo ngomo babya bakahulikirirabo. Kitsumbukirania, omo kati-kati k’ekiro, omusiki munene mwatsingya-tsingya engomo yosi. Emilango y’engomo muyakingukala n’eminyororo eyabya ibohire ababya omo ngomo muyalegha-legha. Omuteya mwatibita emwisi-mwisi w’engomo, ameya emilango iyabirikingukala. Mwalengekania ati abosi ababya omo ngomo babiritibita, neryo mwimya omuyali ati akayita.

Aho n’aho, Paulo mwabirikira ati: “Isiwayita! Itwe bosi tune hano!” Omuteya mwingiramo n’erikukama embere sya Paulo na Sila. Mwabulya ati: “Ritolere inakolaki nitoke erisabulwa?” Mubamubwira bati: ‘Iwe n’ekihanda kyaghu mutolere imwikirirya Yesu.’ Neryo Paulo na Sila mubabakangirirya ekinywa kya Yehova, neryo omuteya n’ekihanda kiwe kyosi mubabatisibwa.