Yesu amasombola Saulo

Saulo abya Munya Roma oyo wabutirawa e Tarso. Abya Mufarisayo oyo wabya asi ndeke Emighambo y’Abayahudi kandi iniaponire Abakristo. Iniakingira kinyanganga omo manyumba wabo, iniakabuluta abalume n’abakali n’eribaghusa omo ngomo. Omughulu ekikumula ekyabya kihitene kita Stefano, omwigha wa Yesu, omo mabwe, Saulo abya inianeho akasamalira.

Aliwe Saulo mwanza erihamba n’eryaghalya Abakristo b’omo Yerusalema n’ab’omo yindi miyi. Mwasaba omuhereri mukulu y’ehamuli y’erighenda omo muyi we Damasko atoke eriyahamba n’Abakristo b’eyo. Saulo abere akasonda erihika omo muyi, ekyakakala mukyakolerya aho abya neryo amawa oko kitaka. Mwowa omulenge akabugha ati: “Saulo, busanaki ukaniaghalaya?” Saulo mwabugha ati: “Ulindi?” Mwasubirya ati: ‘Niri Yesu. Ughende e Damasko, kandi ukendiminya ebyo utolere iwakola.’ Aho n’aho, Saulo mwabya ndimetime. Kyabya kitolere ibamuhamba oko byala erimutwala omo muyi.

E Damasko, yabya Omukristo mutaleghula oyo wabya akahulwa mo Anania. Omo nzoli Yesu mwamubwira ati: ‘Ughende ewa Yuda, omo nzira eyikahulawa mo Eyilungukere, usondaye Saulo.’ Anania mwabugha ati: ‘Mukama, nabiryowa abandu bangyi bakabugha oko mulume oyo! Anemuhira abigha baghu b’omo ngomo!’ Aliwe Yesu mwabugha ati: ‘Ughende eyo ali. Nabirisombola Saulo eritula engulu mbuya oko bihanda bingyi.’

Neryo Anania mwabana Saulo n’erimubwira ati: ‘Saulo, mughala wetu, Yesu mwakanyituma okw’iwe erisyalibula ameso waghu.’ Aho n’aho, Saulo mwalangira. Mwigha oko Yesu kandi mwabya mwigha wiwe. Mwabatisibwa n’eritsuka eritulira omo syosinagogi haghuma n’abandi Bakrisito. Aliwe, Abayahudi mubasweka kutsibu omughulu balangira Saulo akakania oko Yesu! Mubabugha bati: ‘Oyu si y’omulume oyo wabya akakaghalya abigha ba Yesu?’

Omo myaka isatu, Saulo mwatulira abandu be Damasko. Abayahudi mubapona Saulo kandi mubasondekania ngoko bangamwita. Aliwe abaghala betu mubaminya oko mupango oyo, neryo mubamuwatikya eritibita. Mubamuhira omo kitiri n’erilabyakyo omo kyuna ky’oluhimbo lw’omuyi.

Saulo abere abihika e Yerusalema, mwasondekania abandi Bakristo b’eyo. Aliwe mubamusagha. Neryo omwigha mubuya oyo wabya akahulwa mo Barnaba mwaleta Saulo eyiri abakwenda. Mwabakangania ngoko kwenene-kwenene Saulo abiribinduka. Saulo mwatsuka eritula engulu mbuya n’omuhwa haghuma n’endeko ye Yerusalema. Enyuma sy’aho, mwahulwa mo Paulo.