Omwami w’erimbere we Israeli

Yehova abya iniabiriha Abaisraeli b’abatsweri abangabasondola, aliwe mubanza eribya n’omwami. Mubabwira Samweli bati: ‘Ebihanda byosi ebitutimbireko binawite abami. Netu twamalagha oko wetu.’ Samweli mwayowa omwatsi oyo nga syatolere, neryo mwasaba Yehova busana n’ekyo. Yehova mwamubwira ati: ‘Abandu aba siwe bakaghana. Ningye bakaghana. Ubabwire uti banganabya n’omwami, aliwe omwami oyo akendibasaba bingyi.’ Nomo byanabya bitya, abandu mubabugha bati: ‘Ekyo siki. Itwe tulaghire oko mwami!’

Yehova mwabwira Samweli ati omulume oyukahulawa mo Sauli yukendibya mwami w’erimbere. Omughulu Sauli ayalebaya Samweli e Rama, Samweli mwahira amaghuta oko mutwe wa Sauli atoke eribya mwami.

Enyuma w’aho, Samweli mwahindania Abaisraeli bo haghuma eribakangania omwami wabo muhya. Aliwe mubatabana Sauli. Unasi nga ni busanaki? Abya iniabiribisama omo miheke. Babere bamubana mubamuleta n’erimwimania omo kati-kati k’abandu bosi. Sauli abya muli oko bandu bosi kandi ini mubuya. Samweli mwabugha ati: ‘Mulebaye oyo Yehova abiribasombolera.’ Abandu mubabugha omo mulenge munene bati: “Omwami akote!”

Okw’itsuka, omwami Sauli mwahulikirira Samweli n’eriowa Yehova. Aliwe mwabinduka. Ng’eky’erileberyako, Sauli syabya atolere eriherera obuhere. Samweli omuminyereri wa Yehova abya iniabirimubwira ati amulinde. Aliwe Samweli mwatasa luba. Neryo Sauli mwayitswa amaherera obuhere. Samweli mwayowa ati? Mwamubwira ati: ‘Ulue utolere iwowa Yehova.’ Sauli mwanigha esomo?

Enyuma w’aho, Sauli abere akayalwa n’Abaamaleki, Samweli mwamubwira ati isyabalaya omundu n’omughuma. Aliwe Sauli mwatita omwami Agagi. Yehova mwabwira Samweli ati: ‘Sauli abirinileka, syatanyihulikirira.’ Samweli mwahitana kutsibu, n’eribwira Sauli ati: ‘Kundi wabirighana eriowa Yehova, Yehova akendisombola oghundi mwami.’ Samweli mwabya abibinduka akasonda erighenda, Sauli mwamakirira erikoti rya Samweli neryo lyamatulika. Neryo Samweli mwabwira Sauli ati: ‘Yehova abirikusaghula obwami.’ Yehova mwaha obwami obo b’oghundi mundu oyo w’angamwanzire n’erimwowa.