Yesu amaholera e Golgota

Abakulu b’abahereri mubatwala Yesu omo kyaghanda ky’omuguvernere Pilato. Mwababulya ati: “Omundu oyu atwire lubanza lwahi?” Mubabugha bati: ‘Akayahula mo mwami!’ Pilato mwabulya Yesu ati: ‘Uli Mwami w’Abayahudi?’ Yesu mwasubirya ati: “Obwami bwaghe si bw’ekihugho kino.”

Neryo Pilato mwatuma Yesu ewa Herode, omutabali we Galilaya, erilebya ng’anemwendimubana kw’omwatsi wosi-wosi. Herode mwatabanagho, neryo mwamusubya ewa Pilato. Neryo Pilato mwabwira abandu ati: ‘Ingye na Herode situtabana oko mundu oyu k’omwatsi wosi-wosi. Ngendimubohola.’ Abandu mubabirikira omo mulenge munene bati: ‘Itawe! Itawe!’ Abasuda mubahunza Yesu y’omo mijeledi, bamamutwira kw’amatande, n’erimuha amangume. Mubamwambalya embita y’amahwa oko mutwe n’erimusekererya bati: “Kuti kwe Mwami w’Abayahudi!” Kandi Pilato mwabwira abandu ati: ‘Ingye omundu oyu sinetamubanako olubanza.’ Aliwe mubabugha omo mulenge muli bati: “Ahanikawe oko muti!” Neryo Pilato mwamulwikirabo bamwite.

Mubatwala Yesu ye Gologota, mubamukongomerera oko muti neryo bamatsimbagho omo kitaka. Yesu mwasaba ati: “Tata ughanyirebo, kusangwa sibasi ekyo bakakola.” Abandu mubasekererya Yesu bati: ‘Wamabya ighuli Mughala w’oMungu, yikimaye oko muti oyo! Yilamaye.’

Omughuma w’oko bakola-nabi ababya bahanikire hakuhi na Yesu mwabugha ati: “Unyibuke omughulu ukendisyasa omo Bwami bwaghu.” Yesu mwamulagha ati: “Ukendisyabya haghuma naghe omo Paradiso.” Omw’itungyi, ekihugho kyosi ekyo mukyabyamo omwirimya omo syosaha isatu. Abigha balebe, mubimana hakuhi n’omuti ogho Yesu abya ahanikireko, Maria mama wa Yesu, naye anabyaho. Yesu mwabwira Yohana ati atsunge Maria nga mama wiwe-wiwe.

Oko nduli, Yesu mwabugha ati: “Kyamabibererera!” Munamya omutwe wiwe neryo amahola. Oko ndambi eyo, muhalaba omusiki munene kutsibu. Erido erisikire eryabya righabire Ahabuyirire n’Ahabuyiyire Kutsibu omo hekalu, mulyatulika mo bihande bibiri. Omukulu w’abasuda mwabugha ati: “Kwenene oyu alue Mughala w’oMungu.”