Yesu amatandayira oko maghetse

Yesu mwatalamya abakoni n’erilubukya abaholi lisa, aliwe kandi abya n’obutoki oko kihunga n’oko mbula. Yesu abere abisabira oko kitwa, mwasamalira Engetse ye Galilaya, amalangira ikuli ekihunga kinene. Abakwenda biwe babya ibane omo bwato, mukyabakalako erighendya obwato busana n’ekihunga kinene. Yesu mwandaghala n’eritsuka eritandayira oko maghetse erilola eyiri obwato bwabo. Abakwenda babere balangira omundu akatandayira oko maghetse mubakwa obuba. Aliwe Yesu mwababwira ati: ‘Ningye. Simubahe.’

Petro mwabugha ati: ‘Mukama, wamabya kwenene in’iwe, unihamule niase eyo uli.’ Yesu mwabwira Petro ati: ‘Asa.’ Neryo omo kihunga, Petro mwalua omo bwato neryo amalola eyiri Yesu akatandayira oko maghetse. Aliwe abere akasonda erihika hakuhi na Yesu, Petro mwasamalira ekihunga neryo amubaha. Mwayowa inialimutsuka eritobera. Petro mwalaka ati: “Mukama, unilamaye!” Yesu mwahamba ebyala biwe, n’eribugha ati: ‘Busanaki mughukatika-tika? Obwikirirya bwaghu buli hayi?’

Yesu na Petro mubasambira omo bwato, n’ekihunga mukyalw’ikyatulera. Ukalengekanaya uti abakwenda mubayowa bati? Mubabugha bati: “Kwenene, uli Mughala w’oMungu.”

Eyi si y’engendo nguma nyisa eyo Yesu asondola emibere y’obutuku. Ekindi kiro, omughulu Yesu n’abakwenda biwe babya bakaghenda omo bwato oko musirya w’engetse, Yesu mwaghotsera enyuma omo bwato. Inianaghotsere, ekihunga kinene mukyasa. Ebisunda mubyingira omo bwato, neryo obwato mubusula mw’amaghetse. Abakwenda mubabukya Yesu n’eribirikira bati: ‘Mukangirirya, tukahola! Tuwatikaye!’ Yesu mwabuka n’eribugha n’engetse ati: “Huna!” Aho n’aho, ekihunga mukyatulera n’engetse yamahuna. Yesu mwabulya abakwenda ati: ‘Obwikirirya bwenyu buli hayi?’ Mubabwirana bati: “Nibya ekihunga n’engetse bikamwowa.” Abakwenda mubaminya ngoko, bamabiyiketera Yesu yo kundu, sihali ekyangabasaghisya.