Yesu amalamya omulume omo kiro kye Sabato

Abafarisayo babya baponire Yesu kandi mubasondekania ekyangaleka ibamuhamba. Mubabugha bati syatolere erilamya abakoni omo kiro kye Sabato. Omo Sabato nguma, Yesu mwahindana n’omulume mughuma oyo wabutawa mo ndimetime iniane musabirirya oko nzira. Yesu mwabwira abigha biwe ati: ‘Mulangire ngoko obutoki bw’oMungu bukendiwatikya omulume oyu.’ Yesu mwatsumba ehyondo omo matande wiwe, neryo mwahirahyo oko meso w’omulume oyo. Yesu mwabwira omulume oyo ati: ‘Ughende uyanabe omo meso oko kiriba kye Siloamu.’ Omulume oyo mwayakola ekyo, neryo mwatsuka erilangira.

Abandu mubasweka. Mubabugha bati: ‘Oyu si y’omulume oyo wabya akikala n’erisabirirya, kutse ni ghundi oyumusosire?’ Omulume oyo mwabugha ati: ‘Ningye!’ Abandu mubamubulya bati: ‘Busanaki sighukiri ndimetime?’ Omulume oyo abere abibabwira ebiryabya, mubamutwala eyiri Abafarisayo.

Omulume oyo mwabwira Abafarisayo ati: ‘Yesu mwakahira ehyondo oko meso waghe n’erinyibwira ati nighende niyanabe omo busu. Mungakola ekyo, neryo lino nabirilangira.’ Abafarisayo mubabugha bati: ‘Yesu amabya iniakalamaya omo kiro kye Sabato, kwesi obutoki bwiwe isibulilua oko Mungu.’ Aliwe abandu mubabugha bati: ‘Obutoki bwiwe bwamabya isibulilua oko Mungu, syangatokire erilamya.’

Abafarisayo mubabirikira ababuti b’omulume oyo n’eribabulya bati: ‘Omwana wenyu akatoka ati erilangira lino?’ Ababuti biwe mubakwa obuba kundi Abafarisayo babya ibabiribugha bati oyukendisyikirirya Yesu akendisyahihwa omo sinagogi. Neryo ababuti mubabugha bati: ‘Sitwasi. Mumubulaye.’ Abafarisayo mubabulya omulume oyo y’amabulyo mangyi erihika aho abughira ati: ‘Nabiribabwira ebyo niasi. Busanaki mukinanyibulaya?’ Abafarisayo mubahitana, neryo mubamughusa ehihya.

Yesu mwayasunga omulume oyo n’erimubulya ati: ‘Unikirirye Masiya?’ Omulume oyo mwabugha ati: ‘Namabiminya nga nindi, ingendimwikirirya.’ Yesu mwamubwira ati: ‘Ingye indi Masiya.’ Oko kwenene Yesu mwamukolera ndeke. Mwatalamya omulume oyo lisa, aliwe kandi mwamuwatikya eribya n’obwikirirya.