Omumalaika wa Yehova mwateya Hezekia

Obutabali bwe Asiria bwabya ibwabirihamba ebihanda 10 eby’obwami bwe Israeli. Neryo Senakeribu, omwami we Asiria mwanza erihamba n’ebihanda bibiri by’obwami bwe Yuda. Mwatsuka erihamba emiyi ye Yuda mo mughuma-mughuma. Aliwe, abya anzire kutsibu omuyi we Yerusalema. Senakeribu abya isyasi ngoko Yehova abya inianemuteya e Yerusalema.

Hezekia, omwami we Yuda, mwaliha Senakeribu y’esyofranga nene aleke e Yerusalema. Nomo Senakeribu animaya esyofranga esyo, mwataleka erituma abasuda biwe abakalire eriyahamba e Yerusalema. Abandu ababya omo muyi mubakwa obuba kundi Abaasiria babya ibanemuseghera hakuhi n’omuyi. Neryo Hezekia mwababwira ati: ‘Isimwakwa obuba. Abaasiria bawite akaghala, aliwe Yehova akendituha akaghala kanene kulenga ako bawiteko.’

Senakeribu mwatuma omukwenda wiwe, ye Rabshake, eriyasekererya abandu. Rabshake mwimana ehihya w’omuyi n’eribugha omo mulenge muli ati: ‘Yehova syendibawatikya. Hezekia isyabateba. Sihali oMungu oyo wangabateya okw’itwe.’

Hezekia mwabulya Yehova ng’akoleki. Yehova mwasubirya ati: ‘Isiwasagha busana n’ebyo Rabshake akabugha. Senakeribu syendihamba e Yerusalema.’ Enyuma w’aho, Hezekia mwabana esyobaruha erilua oko Senakeribu. Musyabugha siti: ‘Musumbe ebyala. Yehova syangabasabula.’ Hezekia mwasaba ati: ‘Kisi, Yehova, utulamaye obuli mundu aminye ngoko n’iwe Mungu w’ekwenene.’ Yehova mwamubwira ati: ‘Omwami we Asiria syendihika e Yerusalema. Ngenditeya omuyi waghe.’

Senakeribu iniakayibwira ati e Yerusalema ikendibya yiwe. Neryo omo kiro omo, Yehova mwatuma omumalaika aho abasuda biwe babya bakaghotsera ehihya w’omuyi. Omumalaika mwiita abasuda 185000! Omwami Senakeribu mwaherya abasuda biwe b’akaghala. Habya isihakiri eky’erikola, mwasuba ewiwe iniabirisingwa. Yehova mwateya Hezekia ne Yerusalema ngoko abya iniabirilagha. Ko wabya e Yerusalema, naghu wanendiyiketera Yehova?