Yehova mwahanda omutima busana na Yona

Abandu ababya bikere e Asiria, omo muyi we Ninawi babya babi kutsibu. Yehova mwabwira omuminyereri Yona ati aghende e Ninawi eriyabakunga ati babindule emibere yabo. Aliwe Yona mwatibita amalaba omo yindi nzira. Mwasambira omo bwato amaya e Tarsisi.

Ibane omo bwato omo ngetse, ekihunga kinene mukyalaba, n’ababya omo bwato mubakwa obuba. Mubasaba oko miungu yabo n’eribugha bati: ‘Busanaki eki kyamatuhikira?’ Oko nduli, Yona mwababwira ati: ‘N’ingye w’olubanza. Ngatibita omubiiri ogho Yehova alyambwira ati nikole. Munyighuse omo ngetse, n’ekihunga kikendyumbya.’ Ababya omo bwato mubatanza erighusa Yona y’omo ngetse, aliwe mwabahatikana. Babere bamughusa omo ngetse, ekihunga mukyumbya.

Yona mwalengekania ati akendihola. Omughulu atsuka eritobera omo ngetse, mwasaba Yehova. Neryo Yehova mwatuma ekisamaki kinene. Mukyamera Yona, aliwe mukitamwita. Yona iniane omo nda y’akyo, mwasaba ati: ‘Ngakulagha niti nasyakowa mughulu wosi.’ Yehova mwateya Yona omo nda y’ekisamaki kinene ekyo omo biro bisatu. Neryo mukyamusalira oko musike oko kitaka ekyumire.

Kundi Yehova mwasabula Yona, ekyo ni bugha ambu syenditasyaya e Ninawi? Iyehe. Kandi Yehova mwabwira Yona ati aghende e Ninawi. Lero aho, Yona mwaligha. Mwayayo n’eribwira abandu babi abo ati: ‘Omo biro 40, e Ninawi yikenditoghotibwa.’ Neryo omwatsi ogho atabya ayilindirireko mwahuluka. Abandu be Ninawi mubowa n’eribindula emibere yabo. Omwami we Ninawi mwabwira abandu biwe ati: ‘Mulakire oMungu n’eribindula emitima yenyu. Kwamuhwa syenditutoghotya.’ Yehova abere alangira ngoko babiribindula emitima yabo, mwatatoghotya e Ninawi.

Yona mwahitana kundi omuyi mwatatoghotibwa. Lengekanaya hake: Yehova mwahanda omutima busana na Yona kandi mwamukwira obulighe, aliwe Yona mwataluka erihanda omutima busana n’abandu be Ninawi kandi mwatakwirabo obulighe. Mwaya eyihya w’omuyi amayikala omo kitsutsu ky’ekitina ky’olungu. Neryo olungu muluma, kandi Yona mwahitana. Neryo Yehova mwamubwira ati: ‘Wamatsomana ekitina ky’olungu olu kulenga abandu be Ninawi. Mungaghanyirabo, neryo bamalamibwa.’ Enzumwa yabya ki? Abandu be Ninawi babya b’omughaso munene kulenga omumeya wosi-wosi.