Yosia mwanza Emighambo y’oMungu

Yosia abya n’emyaka 8 omughulu abya mwami we Yuda. Omo biro ebyo, abandu babya bakakola obukumu n’eriramya esyosanamu. Yosia abere ayira emyaka 16, mwigha eriramya Yehova omo nzira eyuwene. Abere ayira emyaka 20, mwatsuka eritsutsanga esyosanamu n’ebiherero ebyabya omo Yuda yosi. Abere ayira emyaka 26, mwahira h’endegheka ey’eritasyuwania ehekalu ya Yehova.

Omo hekalu, omuhereri mukulu ye Hilkia, mwabana mw’ekitabu ky’erilinga eky’abyamo Emighambo ya Yehova​. Alinga, ky’ekyahandikawa na Musa. Shafani omuhandiki w’omwami, mwaletera Yosia y’ekitabu ekyo n’eritsuka erisoma Emighambo eyo omo mulenge muli. Yosia abere anemuhulikirira, mwaminya ngoko abandu balue isibakyowa Yehova oko myaka mingyi. Omwami Yosia mwabugha na Hilkia ati: ‘Yehova abirituhitanako kutsibu. Ghenda ukanaye naye. Akenditubwira eky’erikola.’ Yehova mwasubirya erilabira omuminyereri w’obukali ye Hulda. Mwabugha ati: ‘Abandu be Yuda babirinyisighania. Bakendisyahabwa amalipizi, aliwe butsira omo mughulu ogho Yosia ni mwami, kundi iye abiriyikehya.’

Omwami Yosia abere abyowa omwatsi oyo, mwaghenda omo hekalu, amahindania abandu be Yuda bo haghuma. Neryo mwasomera ekihanda kyosi Emighambo ya Yehova omo mulenge muli. Yosia n’abandu mubayilagha eriowa Yehova n’emitima yabo yosi.

Ekihanda kye Yuda kyabya ikyabiribugha emyaka mingyi isikirisyakola Epasaka. Yosia abere asoma omo Mighambo ngoko ekiro eki kitolere ikyibukwa obuli mwaka, mwabwira ekihanda ati: ‘Tukendikolera Yehova y’Epasaka.’ Neryo Yosia mwateghekania amahere mangyi n’abimbi oko hekalu. Neryo abandu mubakola Epasaka, n’enyuma w’aho mubakola Ekiro Kikulu ky’Omukati Owatemo Levire, ekyabugha ebiro 7. Habya isihali hatabya Epasaka eyiri ng’eyo eritsuka omo biro bya Samweli. Kwenene Yosia mwanza Emighambo y’oMungu. Ukanatsemera erigha oko Yehova?