Obutubaha bwa Yehoyada

Yezebeli abya awite mwali wiwe oyukahulawa mo Atalia. Naye abya mubi nga mama wiwe. Atalia mwatahibwa n’omwami we Yuda. Iba wiwe abere abihola, mughala wiwe mwatsuka eritabala. Aliwe, mughala wiwe naye abere abihola, Atalia mwayiyira mo mutabali we Yuda. Mwanza eribughaho abosi abangabere bami omo mwanya wiwe. Neryo mwiita abana bosi bo bulume, nibya n’abitsikulu biwe. Obuli mundu mwamusagha.

Omuhereri mukulu Yehoyada na mukali wiwe Yehosheba, babya ibanasi ngoko ebyo Atalia akakola si byuwene n’ahake. Mubahira engebe yabo y’omo bwiko bamabisa omwitsikulu mughuma wa Atalia. Omwana oyo abya akahulwa mo Yehoashi. Mubamukulirya oko hekalu.

Yehoashi abere ayira emyaka 7, Yehoyada mwahindania abakulu bosi n’Abalawi n’eribabwira ati: ‘Mutsunge emilango y’ehekalu, kandi isimwalighira mundu wosi-wosi akingiramo.’ Yehoyada mwayira Yehoashi mo mwami we Yuda n’erimwambalya embita oko mutwe wiwe. Abandu be Yuda mubabirikira bati: “Omwami akote!”

Omwami-mukali Atalia mwowa efuyo y’abandu banene neryo amatibita omo hekalu. Abere alangira omwami muhyaka, mwalira ati: “Babirinihotera! Babirinihotera!” Abakulu mubahamba omwami-mukali mubi oyo, bamamutwala ehihya n’eriyamwita. Ibwa tubughe tutiki oko bubi obo abya iniabiringirya omo kihanda kyosi?

Yehoyada mwawatikya abakalani be Yuda erikola endaghane na Yehova, mubamulagha bati n’iye musa yo basyaramya. Yehoyada mwababwira ati bahimbule ebiherero bya Baali n’eritulanga esyosanamu. Mwaha abahereri n’Abalawi b’omubiiri w’erikolera oko hekalu abandu batoke eritasyaramiryako. Mwahira kw’abateya isimwingira omundu mubi. Neryo Yehoyada n’abakulu mubatwala Yehoashi y’omo nyumba y’obwami n’erimuhira oko kitumbi ky’obwami. Abandu be Yuda mubatsema. Mubakolera Yehova, isihakiri Atalia omubi n’eriramya lya Baali. Wanamalangira ngoko obutubaha bwa Yehoyada mubwawatikya abandu bangyi?