Yosua n’Abagibeoni

Abandu be Kanana mubowa ebyalabika e Yeriko. Abami babo mubayisogha eriyighunga haghuma busana n’erilwa n’Abaisraeli. Aliwe Abagibeoni mubakola ekindi kindu. Mubambala esyongyimba esitulangikire, n’erighenda eyiri Yosua n’erimubwira bati: ‘Tukalua hali kutsibu. Mutwowa oko Yehova kandi n’ebyo abakolera e Misri ne Moabu. Mutulaghe ngoko simwendisyalwa netu, neryo tukendibya baghombe benyu.’

Yosua mwikirirya n’eriligha eritendilwa nabo. Enyuma w’ebiro bisatu, Yosua mwaminya ngoko mubatitalua omo kihugho kye hali, aliwe balua omo Kanana. Yosua mwabulya Abagibeoni ati: “Busanaki mumukatuteba?” Mubasubirya bati: ‘Twabya tukwire obuba! Mutwaminya ngoko Yehova Mungu wenyu akabalwira. Kisi, isimwatwita.’ Yosua mwaberererya endaghane yiwe, mwabaleka.

Ebiro bike enyuma sy’aho, abami batano, Abakanana n’abasuda babo mububahisya Abagibeoni. Yosua n’abasuda biwe mubaghenda omo bisando omo kiro kyosi busana n’eriyawatikya Abagibeoni. Amalwa mwatsuka omo tututu. Abakanana mubatibita kitya-kitya. Ehosi-hosi eyo batibitira, Yehova mwabita omo matsuku manene-manene. Neryo Yosua mwasaba Yehova ati eryuba rimane. Busanaki mwasaba Yehova y’ekyo kandi nibya isikirikyatabya? Kundi Yosua abya ayiketere Yehova. Eryuba mulitalenga omo kiro kyosi erihika aho Abaisraeli bakindira abami be Kanana n’abasuda babo.