Rahabu mwabisa abapelelezi

Omughulu abapelelezi Abaisraeli baghenda omo muyi we Yeriko, mubikala omo nyumba y’omukali oyukahulawa mo Rahabu. Omwami we Yeriko mwaminya, neryo mwatuma abasuda b’ewa Rahabu. Rahabu mwabisa abapelelezi babiri omo lutwe lw’enyumba n’eribwira abasuda ati balabe omo yindi nzira. Mwabwira abapelelezi ati: ‘Ngendibawatikya kundi nabiriminya ngoko Yehova ali oko luhande lwenyu kandi ngoko mukendikinda ekihugho. Kisi mulape oko Yehova ngoko mukendisyalamya ab’oko kihanda kyaghe.’

Abapelelezi mubabwira Rahabu bati: ‘Twamakulagha tuti sihali n’omughuma omo nyumba yaghu oyukendisyakwa kindu.’ Kandi mubabugha bati: ‘Ubohere olukoba lw’erangyi y’omusasi olu oko lidirisa ryaghu, neryo ekihanda kyaghu kikendisyalamibwa.’

Rahabu mwaleka abapelelezi bakimire oko lukoba omo lidirisa. Embere basube eyiri Yosua, mubaghenda oko bitwa, bamabisamayo biro bisatu. Neryo Abaisraeli mubasoka Olusi lwe Yordani n’eriyiteghekania erikinda ekihugho ekyo. E Yeriko wo abya muyi w’erimbere owo Abaisraeli bakinda. Yehova mwababwira ati batimbe oko muyi oyo obuli kiro ngendo nguma omo biro 6. Oko kiro kye 7, mubatimba oko muyi ngendo 7. Neryo abahereri mubabuha omo mahembe wabo, n’abasuda mubabirikira omo mulenge muli ngoko bangatoka. Esyombimbo sy’omuyi musyatera! Aliwe enyumba ya Rahabu, eyabya oko luhimbo olo, muyitatera. Rahabu n’ekihanda kiwe mubasabuka kundi mubayiketera Yehova.