Epunda ya Balamu yamabugha

Abaisraeli babya bapangire omo mbwarara ye Moabu, oko luhande lw’eyo eryuba rikasira lwe Yordani. Babya ibabiribugha hakuhi emyaka 40 omo mbwarara. Kandi babya ibabirihamba emiyi mingyi. Neryo endambi muyahika y’eryingira omo Kihugho Ekyalaghawa. Aliwe Balaki, omwami we Moabu, mwakwa obuba ati bakendibasaghula ekihugho kyabo. Neryo mwabirikira omulume oyukahulawa mo Balamu eryasa e Moabu erisyatakira Abaisraeli.

Aliwe Yehova mwabwira Balamu ati: ‘Isiwayatakira Abaisraeli.’ Neryo Balamu mwaghana erighenda. Omwami Balaki mwatasyamubirikira engendo ya kabiri n’erimulagha erimuha ekyosi-kyosi ekyo anganza. Kandi, Balamu mwaghana. Neryo oMungu mwabugha ati: “Ughende haghuma nabo. Aliwe ebinywa ebyo ngendikubwira bisa byo ukendibugha.”

Balamu mwasambira oko punda yiwe, amaghenda e Moabu. Mwanza eriyatakira Abaisraeli nomo Yehova abya iniabirimubwira ati isyakola atya. Omumalaika wa Yehova mwamuhulukira omo nzira ngendo isatu. Balamu mwatalangira omumalaika, aliwe epunda yiwe muyamulangira. Epunda muyakita erilua omo nzira, yamaya omo kisuki. Enyuma w’aho muyayayimumira oko luhimbo lw’amabwe, n’erihimatira ekisando kya Balamu. Engendo ya kasatu, epunda muyabundama ahisi omo kati-kati k’enzira. Esyongendo syosi esyo, Balamu abya akahunza epunda omo mutso wiwe.

Oko nduli, Yehova mwaha epunda y’obutoki bw’eribugha. Epunda muyabulya Balamu yiti: ‘Ukanihunza busanaki?’ Balamu mwabugha ati: “Wabirinzangamo. Nganilue n’omuyali omo byala byaghe, kumbe nabirikwita.” Epunda muyabugha yiti: ‘Wabirinyighenderako omo myaka mingyi. Ninenatakukolera nitya embere?’

Neryo Yehova mwaleka Balamu alangire omumalaika. Omumalaika mwabugha ati: ‘Yehova mwakakubwira ati isiwayatakira Abaisraeli.’ Balamu mwabugha ati: ‘Nabirikola erilolo. Uleke nisube eka waghe.’ Aliwe omumalaika mwabugha ati: ‘Wanganaya e Moabu, aliwe kumbe iwayabugha lisa ebyo Yehova akendikubwira ati ubughe.’

Omwatsi oyo mwanighisya Balamu y’esomo nyilebe? Iyehe. Enyuma w’aho, Balamu mwasondekania eritakira Abaisraeli bo ngendo isatu. Aliwe, obuli ngendo, Yehova abya akamukasa eribatsumula. Oko nduli, Abaisraeli mubalwa n’Abamoabu, bamita Balamu. Wanamalangira ngoko kyangabere kibuya Balamu iniahulikirira Yehova erilua oko nzuko?