Mubataberererya eriyilagha ryabo

Yehova mwabwira Musa ati: ‘Uhetukire oko kitwa eyo niri eno. Ngendihandika emighambo yaghe oko bibambali by’amabwe n’erikuhabyo.’ Musa mwahetukira oko kitwa, amabughayo ebiro 40 omo musibo n’omo kiro. Inyane eyo, Yehova mwahandika Ebyalayiro 10 oko bibambali bibiri by’amabwe, neryo amahabyo Musa.

Habere halaba biro bilebe, Abaisraeli mubalengekania bati Musa abiribasighania. Mubabwira Haruni bati: ‘Twamalagha oko mundu oyukenditusondola. Utukokoteraye omungu!’ Haruni mwabugha ati: ‘Mumbe ehoro yenyu.’ Mwanuniayo, amakokotya mw’esanamu ey’ekyana ky’ende. Abandu mubabugha bati: ‘Ekyana ky’ende eki yo Mungu wetu oyo watulusaya e Misri!’ Mubatsuka eriramya ekyana ky’ende eky’ehoro, bamakola n’efete. Ekyo kyanabya kibi? Inga, kundi abandu babya ibabiriyilagha bati bakendisyaramya Yehova musa. Aliwe, mubataberererya eriyilagha lyabo eryo.

Yehova mwalangira ebyo bakakola, neryo mwabwira Musa ati: ‘Kima, ughende eyiri abandu. Babirighana erinisikya kandi banemuramya omungu w’amabehi.’ Musa mwakima oko kitwa, inianahekire ebibambali bibiri by’amabwe.

Omughulu ahika hakuhi n’ekambi yabo, Musa mwowa abandu ibanemwimba. Neryo mwalangira ibanemusata n’erikukamira ekyana ky’ende ekyo. Musa mwahitana kutsibu. Mwaghusa ebibambali ebyo by’ahisi, byamatulangika. Neryo mwalw’iniatulanga esanamu eyo. Neryo mwabulya Haruni ati: ‘Abandu mubakaleka bati iwaligha erikola ekibi kingaha n’eki?’ Haruni mwasubirya ati: ‘Sighuhitane. Siunasi ndeke abandu aba ngoko bali. Mubakalagha oko mungu, neryo mungahira ehoro yabo y’omo muliro, nayo yamalwa mo ekyana ky’ende eki!’ Haruni sy’abya w’erikola ekindu ng’ekyo. Musa mwasuba oko kitwa, amayalemba-lemba Yehova erighanyira abandu abo.

Yehova mwaghanyira ababya banzire erimwowa. Wanamalangira ngoko kyabya ky’omughaso Abaisraeli erikwama obusondoli bwa Musa?