ESOMO 23

Bamalagha Yehova y’omwatsi mulebe

Emisi ng’ibiri yabere yalaba Abaisraeli ibabirilua e Misri, mubahika oko Kitwa kye Sinai, neryo bamapanga aho. Yehova mwabirikira Musa. Neryo Musa mwahetukira oko kitwa ekyo. Yehova mwamubwira ati: ‘Mungasabula Abaisraeli. Bamabiniowa n’erikenga emighambo yaghe, ibakendisyabya basombolwa baghe.’ Musa mwandaghala oko kitwa amayabwira Abaisraeli ebyo Yehova alyamubwira. Mubasubirya batiki? Bati: ‘Twasyakola ebyosi ebyo Yehova amabugha ati tukole.’

Kandi Musa mwasuba oko kitwa. Eyo, Yehova mwabugha ati: ‘Omo biro bisatu, ngendikania naghu. Uhane abandu uti isibasa oko Kitwa kye Sinai.’ Musa mwandaghala amayabwira Abaisraeli ati bayiteghekanaye erihulikirira Yehova akakania nabo.

Abaisraeli bamalangira ehirabyo n’ekitu ekikinire oko Kitwa kye Sinai

Omo kiro kya kasatu, Abaisraeli mubalangira ehirabyo n’ekitu ekikinire oko kitwa. Mubowa n’omulumo munene n’omulenge w’engubi. Neryo Yehova mwakimira oko kitwa omo muliro. Abaisraeli mubakwa obuba bunene bamatsuka erititimana. Omusiki munene mwasuka-sukania ekitwa kyosi n’omuki amaswikakyo. Omulenge w’engubi mwalola embere erikanya kutsibu. Neryo oMungu mwabugha ati: ‘Indi Yehova. Isimwaramaya eyindi miungu.’

Musa mwasuba oko kitwa, neryo Yehova mwamuha emighambo ey’eriha abandu eyikanganaya ngoko bangabya bakaramya oMungu kandi ngoko bangayitambya. Musa mwahandika emighambo eyo, n’enyuma w’aho mwasomerayo Abaisraeli. Mubayilagha bati: ‘Twasyakola ebyosi ebyo Yehova amabugha ati tukole.’ Kwenene, mubalagha oMungu y’omwatsi mulebe, aliwe mubanaberererya eriyilagha lyabo eryo?

“Litolere iwanza Yehova Mungu waghu n’omutima waghu wosi, n’obuyingo bwaghu bosi, n’obulengekania bwaghu bosi.”—Matayo 22:37