Yakobo na Esau bamahiraho obuholo

Yehova mwalagha Yakobo ati akendisyamuteya ngoko anateghaya Abrahamu na Isaka. Yakobo mwikala omo kiharo ekikahulawa mo Harani, eyo atahiraya. Mwabya n’ekihanda kinene kandi mwabya muteke kutsibu.

Oko nduli, Yehova mwabwira Yakobo ati: ‘Usube omo kihugho ky’ewenyu.’ Neryo Yakobo n’ekihanda kiwe mubatsuka olughendo luli olw’erisubayo. Ibanemughenda, abaghombe ba Yakobo mubasa eyo ali n’eribugha bati: ‘Mughala wenyu Esau anemwasa, kandi ane n’abalume 400!’ Yakobo mwasagha ati Esau anzire erimukolera muhanda, iye n’ekihanda kiwe. Mwasaba Yehova ati: ‘Kisi, unisabule oko mughala wetu.’ Ekiro ekyakwama,Yakobo mwatumira Esau y’ekihembo eky’esyombuli nyingyi, esyombene, esyonde, esyongamiya, n’esyopunda.

Omo kiro Yakobo iniane iyuwene, mwalangira omumalaika! Omumalaika oyo mwatsuka erilwa naye. Mubalwa erihika omo tututu. Nomo Yakobo anahutala, mwataleka erilwa. Omumalaika mwabugha ati: ‘Leka nighende.’ Aliwe, Yakobo mwabugha ati: ‘Sinendikuleka ute wanitsumula.’

Oko nduli, omumalaika oyo mwatsumula Yakobo. Neryo Yakobo mwaminya ngoko Yehova syendilighira Esau erimukolera muhanda.

Omo tututu eyo, Yakobo mwalangirira Esau n’abalume biwe 400 bo hali. Yakobo mwanguha amabya embere sy’ekihanda kiwe n’eriyunamira mughala wabo ngendo 7. Esau mwatibita eyiri Yakobo, amamukumbatira. Abahasa aba mubalira, bamahiraho obuholo. Ukalengekanaya uti Yehova mwayowa ati akalangira enzira eyo Yakobo akolesaya eribughaho olubanza olo?

Enyuma w’aho Esau mwasuba ewiwe, na Yakobo mwalola embere n’olughendo lwiwe. Yakobo mwabuta abaghala 12. Ibakahulawa mo Rubeni, Simeoni, Lawi, Yuda, Dani, Naftali, Gadi, Aseri, Isakari, Zebuloni, Yozefu, na Benyamini. Omughuma w’okw’ibo​, ye Yozefu, mwakolesibwa na Yehova erisabula abandu biwe. Unasi nga mwakola ekyo kyo ati? Tulebaye.