KITSWEKA 7

Ngoko wangakangirirya omwana waghu

“N’ebinywa ebyo ngakuhana munabwire, byasyabya omo mutima wawe, kandi wasyakangiriryabyo abana bawe.”—Eryibuka Ebihano 6:6, 7

Omughulu Yehova atsukisaya omwatsi w’obunyumba mwaha ababuti b’omubiri ow’erikangirirya abana. (Abanya Kolosayi 3:20) Ni mubiri wenyu inywe babuti erikangirirya omwana wenyu erianza Yehova n’eribya mundu oyuhwererere. (2 Timoteo 1:5; 3:15) Uyitsinge eriminya ebiri omo mutima w’omughala waghu kutse mwali waghu. Litolere abana baghu ibakuleberyako. Erikangirirya ekinywa kya Yehova kyo ndeke, litolere iwatsuka eringiryakyo omo mutima waghu.—Esyonyimbo 40:8.

1 UYITSINGE ABANA BAGHU ISIBABYA BAKASAGHA ERIKANIA NAGHU

EKYO EBIBLIA IKABUGHA: “Obuli mundu abye akowa luba, nikwa siabuge luba.” (Yakobo 1:19) Wanzire abana baghu ibayowa ko banganakania naghu bweghu-bweghu. Litolere ibaminya ngoko siwangabula eribahulikirira omughulu bakasonda erikania naghu. Usondaye akatambi akatolere akakendiwatikyabo erikania naghu. (Yakobo 3:18) Bamabikulangiramo mundu oyukalire n’oyukabatswera, banganabya bakakubisa emyatsi. Hulikirira abana baghu obuli kiro, kandi kanganayabo obuli kiro ngoko ubanzire.—Matayo 3:17; 1 Abanya Korinto 8:1.

EKYO WANGAKOLA:

Wanguhe omughulu abana baghu banzire erikania naghu
Beghere erikania n’abana baghu, butsira erikania nabo omughulu hali ebitaghendekire

2 TERISONDA ERIMINYA EKIRI OKO MUTIMA W’OMWANA

EKYO EBIBLIA IKABUGHA: “Oyukakenga ekinywa asyabana ebibuya.” (Emisyo 16:20) Oko sindi ndambi, litolere iwayikasa erisonda eriminya abana baghu nga bakasonda eribugha ki kandi nga bakayowa bati. Abalwana bangi babeghere erisehya emyatsi kutse eribugha ebite omo mutima wabo. “Oyukasubiraya ataliowa, ni bukiru n’esisoni busana naye.” (Emisyo 18:13) Isiwahitana luba.—Emisyo 19:11.

Mama anemukaramira omwali wiwe busana n’ebinywa ebyalya bugha

EKYO WANGAKOLA:

N’omo bana baghu bangabugha ki, uyitoke isiwabatwa kalimi kutse isiwalabukiranaya erihitana luba-luba
Ter’ibuka ngoko wabya ukayowa omughulu wabya ighukine mwana n’emyatsi wabya wanzire

3 MUBYE OMO BUGHUMA OMWIHANA OMWANA

EKYO EBIBLIA IKABUGHA: “Mugala wage, uhulikirire erikangirirya lya tata wawe, susiganaye erihana lya koyo wawe.” (Emisyo 1:8) Inywe babiri Yehova abiri baha ehamuli oko bana. Litolere imwakangirirya abana benyu eribasikya. (Abanya Efeso 6:1-3) Abana bangana minya ngoko ababuti babo ‘sibabohene omo malengekania maguma.’ (1 Abanya Korinto 1:10) Mutitalighirana, muyikase isimwakanganaya kyo embere sy’abana benyu kusangwa kyanganaleka ibatabasikya inywe babuti babo.

Baba anemukunga mwala wiwe omobubiso-biso n’omumama ane omo kindi kyumba n’oghundi mwana

EKYO WANGAKOLA:

Mukanaye n’erilighirana ngoko mwangahana abana benyu
Iwe na mwira waghu mwamabibya n’amalengekania mbiriri-mbiriri okwikangirirya omwana wenyu, uyitsinge eriminya amalengekania wa mwira waghu

4 MUPANGE EMYATSI

EKYO EBIBLIA IKABUGHA: “Ukangiriraye omwana omo nzira eyimutolere.” (Emisyo 22:6) Erikangirirya omwana yondeke siryangayibutukira. Litolere imwateghekania ebyerikangirirya omwana n’erihiramo esyonzira esyerikunga. (Esyonyimbo 127:4; Emisyo 29:17) Erikunga abana sibahunza lisa, nikwa rihiriremo eriwatikya abana baghu eriminya ekikaleka ibakungwa. (Emisyo 28:7) Kandi, ubakangiriraye eryanza ebinywa bya Yehova n’erilengekania oko syokanuni siwe. (Esyonyimbo 1:2) Eki kikandibawatikya eribya n’omutima owerire.—Abaebrania 5:14.

EKYO WANGAKOLA:

Hakikisaya ngoko abana baghu banalangire oMungu ko ni mundu oyuliho oyo bangayiketera
Uwatikayebo eriminya n’eriyiteya oko myatsi mibi, nge yikasungika oko enternete. Mukangirirayebo ngoko bangayiteya oko bandu abakakola ebibi oko bana balere

Omulwana anemukangiriribwa n’ababuti biwe erikolera Yehova, eritsuka om’obwana bwiwe erihika ok’olubatiso — “Ukangiriraye omwana omo nzira eyimutolere”