Zekaria
13 Ekiro ekyo, eribulu rikendisyatakulwa, ab’omo kihanda kya Daudi n’abikalani be Yerusalema babye bakayayereryamo batoke eriyilusyako amalolo wabo n’omutsafu wabo.
2 “Ekiro ekyo,” Yehova w’emilondo atya, “ngendisyazima omo kihugho mw’amena w’esyosanamu, abandu sibendisyasyibukagho; kandi ngendisyalusya omo kihugho mw’abaminyereri n’ekirimu ky’omutsafu. 3 Omundu amasyasyabugha obuminyereri, baba wiwe na mama wiwe, abamubuta, bakendisyamubwira bati: ‘Siwendibyaho, kundi mughukabugha amabehi omo rina rya Yehova.’ Neryo baba wiwe na mama wiwe, abamubuta, bakendisyamutobongola kundi mwakabugha obuminyereri.
4 “Ekiro ekyo, obuli muminyereri akendisyakwa esisoni busana n’enzoli eyo akabwira abandu omughulu akabugha obuminyereri. Abaminyereri sibendisyambala olukimba lw’obweya lw’omuminyereri batoke eriteba abandu. 5 Bakendisyabugha bati, ‘Sindi muminyereri. Niri mulimi, kundi omulume mughuma mwanighula omughulu nabya inikine mulwana.’ 6 N’omundu amabisyababulya ati, ‘Ibwa ebironda ebi ebiri omo kati-kati k’ebitigho byaghu* biryaluahi?’ bakendisyasubirya bati, ‘Ni bironda ebyo niryakwira omo nyumba y’abira baghe.’”*
7 “Iwe muyali, buka, ulwe n’omulisya waghe,
Ulwe n’omulikyaghe,” Yehova w’emilondo atya.
“Uhunze omulisya, neryo esyombuli* sipanzikane;
Neryo naghe ngendilwa n’abandu ba bule-bule.”
8 “Omo kihugho kyosi,” Yehova atya,
“Ebitswe bibiri by’abikalani ba mukyo bikendilusibwayo n’erihola;
N’ekitswe ky’akasatu kikendisyasighalayo.
9 Ngendisyalabya ekitswe ky’akasatu ky’omo muliro;
Ngendisyeryabo ngoko efeza* yikeribawa,
Kandi ngendisyalebya nga banuwene ngoko bakalebaya ehoro nga yinuwene.
Bakendisyabirikira erina ryaghe,
Naghe ngendisyasubiryabo.
Ngendisyabugha niti, ‘Ni bandu baghe,’
Nabo bakendisyabugha bati, ‘Yehova ni Mungu wetu.’”