Zekaria

12 Bino ni binywa by’oMungu:

2 “Ngendiyira Yerusalema mo kikombe* ekikendileka abandu bosi abamutimbireko ibatsinga-tsinga; n’abasuda bakendisyatimba oko Yuda n’oko Yerusalema batoke erilwa nayo. 3 Ekiro ekyo, ngendisyayira Yerusalema mo ribwe erilitohire oko bandu bosi. Abakendisyasumbaryo sibendisyabula erihutala kutsibu; n’ebihanda byosi by’oko kihugho bikendisyayighunga haghuma bitoke erilwa naye. 4 Ekiro ekyo,” Yehova atya, “Ngendisyaleka obuli sabayiri* iyahandabuka n’erileka obuli mundu oyukaghenda kuyo iniabya musire. Sinendisyalusya eriso ryaghe oko Yuda, aliwe ngendisyayira esyosabayiri syosi sy’abandu mo ndimetime. 5 N’abakulu b’ebihanda bye Yuda bakendisyabugha omo mitima yabo bati, ‘Abikalani be Yerusalema ni kaghala kaghe busana na Yehova w’emilondo, oMungu wabo.’ 6 Ekiro ekyo, ngendisyayira abakulu be Yuda ng’enyungu eyiswiremo muliro eyiri omo kati-kati k’esyongwi, kandi ng’akati akaliko omuliro akali* omo milondo y’engano eyabiritwibwa. Kandi bakendisyahisya abandu bosi ababatimbireko, bangabya oko luhande lw’amali kutse olw’amalembe; n’abandu be Yerusalema bakendisyatasyikala omo muyi wabo,* omo Yerusalema.

7 “Esyohema sya Yuda syo Yehova akendisyatsuka erisabula; obubuya* bw’ekihanda kya Daudi, n’obubuya* bw’abikalani be Yerusalema bukendisyabya bunene kulenga obubuya bw’abandu be Yuda. 8 Ekiro ekyo, Yehova akendisyalwira oko bandu be Yerusalema. Ekiro ekyo, oyukendisyatwikala* omo kati-kati kabo akendisyabya nga Daudi. N’ekihanda kya Daudi kikendisyabya ng’oMungu, kikendisyabya ng’omumalaika wa Yehova, oyukababera embere. 9 Ekiro ekyo, sinendisyabula eritoghotya ebihanda byosi ebikendisyasyalwa ne Yerusalema.

10 “Ngendisyutulira oko kihanda kya Daudi n’oko bikalani be Yerusalema kw’ekirimu ky’olukogho n’eky’erilemba-lemba. Bakendisyasamalira oyo batobongola, bakendisyamulira ng’abandu abakalira ekyusa. Kandi bakendisyamulira kutsibu ng’abandu abakalira akambere. 11 Ekiro ekyo, omo Yerusalema mukendisyabya ekiriro kinene, ng’ekiriro ekyabya e Hadadrimoni, eyiri omo ribanda rye Megido. 12 Ekihugho kikendisyabya omo kiriro, obuli kihanda kikendisyalira bwakyo: Ekihanda kya Daudi kikendisyalira bwakyo, n’abakali b’omo kihanda ekyo bakendisyalira bwabo; ekihanda kya Natani kikendisyalira bwakyo, n’abakali bamo bakendisyalira bwabo; 13 ekihanda kya Lawi kikendisyalira bwakyo, n’abakali bamo bakendisyalira bwabo; ekihanda ky’Abashimei kikendisyalira bwakyo, n’abakali bamo bakendisyalira bwabo; 14 n’ebihanda byosi ebikendisyasighala, obuli kihanda kikendisyalira bwakyo, n’abakali bamo bakendisyalira bwabo.