Ezekieli
31 Oko mwaka we 11, oko mwisi w’akasatu, ekiro ky’erimbere ky’omwisi, kandi ekinywa kya Yehova mukyanihikako kiti: 2 “Mughala w’omundu, ubwire Farao omwami we Misri n’ekikumula kiwe uti,
‘Omo bukulu bwaghu uli nga ndi?
3 Kera habya Omuasiria, Omuerezi we Lebanoni,
Abya awite emitahi mibuyanga ng’ekitutu ky’akasitu, kandi inyayimolekire,
Omutwe-mutwe wagho abya omo bitu
4 Mwakula, amabya munene busana n’amaghetse, ehyusi muhyaleka amabya muli-muli.
Ehyusi ihitimbire aho aherire;
Ehighende hyahyo ihikanywisaya emiti yosi y’omoli.
5 Kyo kyaleka inyabya muli oko yindi miti yosi y’omoli.
Emitahi yagho minene-minene muyabya mingyi, n’emitahi yagho muyabya miri-miri
Busana n’amaghetse mangyi w’ehyusi hyagho.
6 Esyonyunyu syosi sy’omo kyanya musyahimba esyonyutu omo matahi wagho manene-manene
Esyonyama syosi sy’omoli musyabutira omo ndambi y’amatahi wagho
N’ebihanda byosi eby’abandu bangyi mubiikala omo kitsutsu kyagho.
7 Mwabya mukulu omo bubuya n’omo buli bw’amatahi wagho,
Kusangwa emirihi yagho yabya yindaghalire omo maghetse manene.
8 Omo ririma ly’oMungu, simwabya oghundi muti w’omuerezi owangalingiriranibwa nagho,
Sihali omuti w’ekilaghu owabya n’amatahi awali ng’aw’omuti oyo,
N’oko miti y’emiaramoni sihabya owangahika oko matahi wagho.
Omo ririma ly’oMungu simwabya oghundi muti owangahika oko bubuya bwagho.
9 Munayiragho mo mubuya, namahagho ebiti bingyi,
N’eyindi miti yosi y’omo Edeni, eririma ly’oMungu w’ekwenene, muyatsuragho.’
10 “Neryo Yehova, Omukama Mukulu oko Bosi ati: ‘Kusangwa omuti oyo mwabya muli, amasumbira omutwe-mutwe wagho omo bitu, n’eritsuka eriyiheka omo mutima busana n’obuli bwagho, 11 ngendihiragho omo byala by’omutabali w’ebihanda ow’amaka. Akendyaghalyagho, naghe ngendighanagho busana n’obubi bwagho. 12 N’ab’ehandi, abatsibu kutsibu omo bihanda, bakendikonderagho ahisi, kandi bakendisighagho oko bitwa. Ebiti byagho bikendiwa omo misya yosi, n’emitahi yagho ikendibugha-bughana ehyusi hyosi hy’ekihugho ekyo iyabiribunangika. Ebihanda byosi by’oko kihugho bikendilua omo kitutu kyagho, ibyasighaniagho. 13 Esyonyunyu syosi sy’ekyanya sikendiyira omughogho wagho mo bwikalo, n’esyonyama syosi sy’omoli sikendirya oko mitahi yagho. 14 Bikendibya bitya, omuti wosi-wosi owali hakuhi n’amaghetse akasyabya muli-muli kutse akasyasumbira omutwe-mutwe wagho omo bitu kandi isihabya n’omuti owakabana amaghetse mangyi owakakolaya obuli bwagho oko bitu. Kusangwa, oko kwenene emiti yosi ikendihola. Ikendindaghalira omo kitaka haghuma n’abaghala b’abandu, abakandaghalira omo kyuna.’*
15 “Yehova, Omukama Mukulu oko Bosi ati: ‘Ekiro akendisyandaghalira omw’Isinda,* ngendisyaleka ihabya ekiriro. Neryo ngendisyaswika emitobero y’amaghetse n’erikakirya ehyusi hyagho; neryo amaghetse mangyi inyakakiribwa. Busana nagho, gendisyaleta e Lebanoni y’omwirimya, n’emiti yosi y’omoli ikendisyuma. 16 Omulenge wagho w’eritera akendisyabya akowika, ngendisyaleka ebihanda ibyatitimana ngandaghaliryagho omw’Isinda* haghuma n’abosi abakandaghalira omo kyuna,* n’emiti yosi ye Edeni, emiti eyuwene kutsibu ye Lebanoni, eyosi eyikanywa amaghetse wo ndeke, ikendisyakiranibwa omo kihugho ky’eyikwa. 17 Yabirindaghalira haghuma naye omw’Isinda* eyiri abitawa omo muyali, haghuma n’ababya bakamuwatikya* ababya bikere omo kitsutsu kiwe omo bihanda.’
18 “‘Omo miti yosi y’omo Edeni, ni muti wahi owabya awite olukengerwa n’obukulu ng’obwaghu? Aliwe oko kwenene, ukendindaghaliribwa omo kihugho ky’eyikwa haghuma n’eyindi miti yosi ye Edeni. Ukendighotsera omo kati-kati k’abatabanibwe haghuma n’abitawa omo muyali. Eki kyo kikendihikira Farao n’abandu biwe bosi,’ Yehova, Omukama Mukulu oko Bosi atya.”