Ezekieli
17 Kandi ekinywa kya Yehova mukyanihikako kiti: 2 “Mughala w’omundu, uteke endekerano kandi ubughe omusyo busana n’enyumba ya Israeli. 3 Litolere iwabugha uti, ‘Yehova, Omukama Mukulu oko Bosi ati: “Erisamba rinene, ery’ebipupa binene, n’ebyeya biri-biri, eryoswireko ebyeya by’esyorangyi mbiriri-mbiriri, mulyasa e Lebanoni, lyamimya ekasweswe k’omuti w’omuerezi. 4 Mulyatwa erisasa lyagho ery’oko mutwe-mutwe, lyamatwalyalyo omo kihugho ky’abahingania* n’erihiralyo omo muyi w’abahingania. 5 Neryo mulyimya oko mbuto y’omo kihugho, lyamaherayo omo ririma eririmo embolewa. Mulyaherayo ng’omuti w’omukimba* hakuhi n’amaghetse mangyi. 6 Nagho mwalasa, amabya muliki mukuhi w’omuzabibu owakalanda. Ebiti byagho mubyalolera emwisi, n’emirihi yagho muyalasa eyikwa kugho. Neryo mwabya muliki w’omuzabibu, amasako amasasa, n’eribyako emitahi.
7 “‘“Neryo muyasira erindi risamba ery’ebipupa binene-binene n’ebyeya biri-biri. Neryo omuliki w’omuzabibu oyo, n’engumbu nene mwalolerya emirihi yagho eyo riri, hali oko ririma eryo abya aheriremo. Mwalolerya ebiti byagho eyo riri, litoke eryutulira kubyo kw’amaghetse. 8 Abya inyabiriherwa omo lirima eryuwene hakuhi n’amaghetse mangyi, atoke eribyako amatahi n’eribyako amatunda, n’eribya muliki munene w’omuzabibu.”’
9 “Ubughe uti, ‘Yehova Omukama Mukulu oko Bosi ati: “Anemwendilasa kwehi? Omundu syendikula emirihi yagho n’erihondya amatunda wagho n’erileka amasasa wagho inyuma? Akendyuma kutsibu neryo isikyangasaba ebyala by’amaka kutse abandu bangyi erikulagho. 10 Nomo anakulawa n’eriherwa ehandi, anemwendilasa? Syendyuma ndeke-ndeke kwehi omughulu erihunga ly’eyo eryuba rikasira rikendibuhirira kugho? Akendyuma ndeke-ndeke omo ririma eryo alasamo.”’”
11 Kandi ekinywa kya Yehova mukyasyanihikako kiti: 12 “Ubwire enyumba y’abandu abakayisamambula uti, ‘Simwasi emyatsi eyi nga ikasonda eribugha itiki kwehi?’ Ubughe uti, ‘Mulebaye! Omwami we Babiloni mwasa e Yerusalema. Mwimya omwami wayo n’abanya-mwami bayo, amatwalabo e Babiloni. 13 N’ekindi, mwimya omundu mughuma w’omo mulala* w’obwami, amakola endaghane haghuma naye n’erimulapisya. Neryo mwaheka esyoseghu-seghu sy’omo kihugho, 14 obwami obo butoke erikimibwa, isibwangasyahangana; bwamabisikya endaghane yiwe imo bukendilola embere eribyaho. 15 Aliwe oko nduli omwami mwayisamambula okw’iye omw’ituma e Misri y’abakwenda atoke erihabwa esyosabayiri n’abasuda bangyi. Anemwenditoka? Omundu oyukakola emyatsi eyi anemwendibala okw’isuyirwa. Anganatwa endaghane kandi inyabala?’
16 “‘“Kwenene-kwenene ngoko niriho,” Yehova, Omukama Mukulu oko Bosi ati, “akendisyaholera e Babiloni, eyo omwami* oyo wamuyira mo mwami ikere, oyo apokaya erilapa liwe n’eritwa endaghane yiwe. 17 Omulondo munene w’abasuda bangyi ba Farao, syendisyawatikya okuki omo malwa, omughulu ebilundo by’omutaka by’eribambira bikendisyahirwaho n’omughulu esyombimbo sy’eribambira sikendisyahimbwa busana n’eriita abandu bangyi.* 18 Abiripokya erilahirya n’eritwa endaghane. Nomo anayilagha* abirikola emyatsi yosi eyi, neryo syendisyabala.”’
19 “‘Neryo Yehova, Omukama Mukulu oko Bosi ati: “Kwenene-kwenene ngoko niriho, ngendileta oko mutwe wiwe kw’ebitsibu by’eripokya erilahirya lyaghe n’eritwa endaghane yaghe. 20 Ngendimughusako obutimba bwaghe, naye akendihambwa omo butimba bwaghe bw’erihighamo. Ngendimutwala e Babiloni, n’eyo ngendimutswera busana n’erileghula liwe. 21 Abasayi bosi b’oko milondo yiwe y’abasuda, bakendiwa omo muyali; n’abakendisaka, bakendipanza-panzirwa oko mbande syosi.* Neryo bakendiminya ngoko ingyuwene-wene, ingye Yehova, nabiribugha.”’
22 “‘Yehova, Omukama Mukulu oko Bosi ati: “Ngendisyimya erisasa oko kaswe-swe k’omuti w’omuerezi owayimolekire neryo ngendisyaheralyo. Ngendisyatwa erisasa oko mutwe-mutwe w’amatahi wagho, neryo ngendisyaheralyo oko kitwa kiri, ekiyimolekire. 23 Ngendisyaheralyo oko kitwa kiri kya Israeli; n’amatahi walyo akendisyalasa, nalyo likendisyahetya amatunda n’eribya muti munene w’omuerezi. Esyonyunyu sy’emihanda yosi sikendisyikala ahisi syagho n’eriikala omo kitsutsu ky’ebisanza byagho. 24 N’emiti yosi y’omoli ikendisyaminya ngoko ingye Yehova nabirikimya omuti muli n’erihamya omuti mukuhi; nabiryumya omuti mubisi n’erileka omuti oghumire inyasako omusanga. Ingye Yehova, nabiribugha kandi nabirikolakyo.”’”