Ezekieli

16 Kandi ekinywa kya Yehova mukyanihikako kiti: 2 “Mughala w’omundu, uminyisaye e Yerusalema emikolere yayo eyikita nye. 3 Litolere iwabugha uti, ‘Yehova Omukama Mukulu oko Bosi akabwira e Yerusalema ati: “Walua omo kihugho kye Kanana kandi yo wabutirawa. Baba waghu abya Muamori na mama waghu abya Muhiti. 4 Oko bilebirye eributwa lyaghu, ekiro wabutawa, engundi yaghu muyitatwibwa. Mughutanabibwa omo maghetse utoke eryera. Mughutakurutwa omo munyu, kandi mughutahirwa omo syongyimba. 5 Muhatabya omundu oyukakukwira obulighe atoke erikukolera nibya n’omughuma w’oko myatsi eyi. Muhatabya oyukakusasira. Omo mwanya w’ekyo, muwaghuswa omoli, kusangwa muwaponwa* ekiro wabutawa.

6 “‘“Nabere nalaba hakuhi naghu, munakulangira ighunemuyighalya-ghalya omo musasi waghu. Neryo ighunaghotsere aho omo musasi waghu, munabugha niti: ‘Sighuhole!’ Inga ighunaghotsere aho omo musasi waghu, munakubwira niti: ‘Sighuhole!’ 7 Munakukanyirirya ng’ebiti ebikalasa omoli, neryo muwakula wamabya mukulu n’eryambala amapambo aghuwene kundu. Amabere waghu mwabya bisuna, n’esyonzwiri syaghu musyalasa; aliwe wabya ighukine ndumbu isiwambiteki.”’

8 “‘Nabere nalaba n’erikulangira, munalangira ngoko wabirikula, ngoko wamabibya w’erikanginibwa olwanzo. Neryo munakuhirako olukimba lwaghe, namaswika endumbu yaghu kandi namalapa n’erikola endaghane haghuma naghu,’ Yehova, Omukama Mukulu oko Bosi atya. ‘Neryo muwabya waghe. 9 Kandi munakunabya omo maghetse, namakulusyako omusasi waghu n’erikuhakabya amaghuta. 10 Neryo munakwambalya olukimba oludesire, namakuha ebiryato eby’engobi eyuwene.* Kandi munakuswika ekitani ekyuwene namakwambalya n’esyongyimba sy’obughuli. 11 Munakuhirako amapambo, namahira ebikomo oko byala byaghu, n’erihira esyenete omo bikya byaghu. 12 Kandi munahira embuka oko nindo yaghu, namahira amaningita oko matwi waghu, n’erihira embita oko mutwe waghu. 13 Kandi ighukayipamba omo horo n’efeza.* Esyongyimba syaghu syabya silukire omo kitani ekyuwene, ighukambala ebindu by’obughuli, n’esyongyimba esidesire. Eyisyano eyuwene, obuki, amaghuta byo byabya kalyo kaghu. Muwaghamba kutsibu, muwatolera eribya mughole.’”*

14 “‘Neryo erikumayira* lyaghu mulyatsuka eriyitwala* omo kati-kati k’ebihanda busana n’obubuya bwaghu, kusangwa obubuya bwaghu bwabya buhikene kundi munakuhirako olukengerwa lwaghe,’ Yehova Omukama Mukulu oko Bosi atya.

15 “Aliwe muwatsuka eriyiketera obubuya bwaghu, neryo muwabya mumbalaka busana n’erikumayira lyaghu. Muwabya ukakola obumbalaka bo bweghu-bweghu n’obuli mulabi, n’obubuya bwaghu mubwabya bwabo. 16 Muwimya oko syongyimba syaghu wamakokotya musyo mw’omwanya w’endata w’esyorangyi mbiriri-mbiriri, aho wakolera obumbalaka—emyatsi ng’eyo siyitolere ikabya kutse siyitolere ikasyasyakoleka. 17 Muwimya n’ebindu byaghu by’eriyipambamo* ebikokotibwe omo horo n’omo feza* eyo nakuha, wamayikokoterya mubyo mw’esyosanamu sy’obulume n’erikola nasyo obumbalaka. 18 Kandi muwimya esyongyimba syaghu esidesire, wamaswika esyosanamu esyo.* Kandi muwaherera esyosanamu esyo amaghuta waghe n’obukwa bwaghe. 19 N’omukati ogho nakuha—owakokotibwe omo yisyano eyiswererere,* amaghuta, n’obuki obo nakuha mo kalyo—nagho muwahereragho esyosanamu esyo mo kikumba ekyuwene. Ekyo ko kyanabya kitya,’ Yehova, Omukama Mukulu oko Bosi atya.”

20 “‘Muwimya abana baghu b’obulume n’ab’obukali abo wanibutira, wamahererabo oko syosanamu batoghotibawe. Emikolere yaghu y’obumbalaka siyiriyanatosa? 21 Muwakera abana baghe b’obulume, n’erihererabo mo buhere omw’ilabyabo omo muliro. 22 Omughulu wabya ukakola emikolere yaghu yosi eyikita nye n’obumbalaka, mughutibuka ebiro by’obulwana bwaghu omughulu wabya ndumbu kandi isighumbiteki, ighunemuyaghalya-ghalya omo musasi waghu. 23 ‘Obulighe, obulighe okw’iwe, busana n’ebibi byosi ebyo wabirikola,’ Yehova Omukama Mukulu oko Bosi atya. 24 Omo buli kibugha ky’abandu bangyi, muwayihimbiramo omwanya owayisumbire n’eriyikokoterya omwanya w’endata. 25 Muwahimba emyanya yaghu y’endata oko mwanya owakumayire kutsibu w’obuli nzira. Neryo muwayira obubuya bwaghu mo nye busana n’erikola obumbalaka* n’obuli mulabi, kandi muwakanyirirya emikolere yaghu y’obumbalaka. 26 Muwakola obumbalaka n’abana b’obulume be Misri, abahimbani* baghu abawite engumbu nene y’emyatsi y’engyingo, neryo wamanihitania busana n’obutaghanzika bw’emikolere yaghu y’obumbalaka. 27 Neryo lino, ngendikakya ebyala byaghe erikusuyira kandi ngendikehya aho ukalusaya akalyo kaghu n’erikuhira omo byala* by’abakali abakuponire, abali be Filistia, abakukubala busana n’emighendere yaghu eyikita nye.

28 Busana n’eritenditoseka lyaghu, muwakola obumbalaka n’abana b’obulume be Asiria, aliwe nibya n’enyuma sy’erikola obumbalaka haghuma nabo, wabya isighuli wanatoseka. 29 Neryo muwakanyirirya obumbalaka bwaghu omo kihugho ky’abahingania* n’oko Bakaldea, aliwe nibya naho, mughutatoseka.’ 30 Yehova, Omukama Mukulu oko Bosi ati, ‘Omutima waghu abya alwere* kundu* omughulu wakola emyatsi yosi eyi, ukayighendya ng’omumbalaka oyutekw’isoni. 31 Aliwe omughulu wahimba omwanya waghu owayisumbire omo mwanya owakumayire kutsibu w’obuli nzira n’eriyikolera omwanya w’endata omo buli kibugha ky’abandu bangyi, siwabya ng’omumbalaka, kundi ighukaghana erilihwa. 32 Uli mukali musingiri oyukimaya ab’ehandi omo mwanya w’iba wiwe! 33 Abandu bakaha abambalaka b’ebihembo, aliwe n’iwe wabya ukaliha abosi ababya bakayitsutsa iwe. Kandi muwahabo ekyutuliro base erilua oko mbande syosi erisyakola naghu obumbalaka. 34 Sighuli ng’abandi bakali abakakola obumbalaka. Sihali oyukakola obumbalaka nga we! Ukaliha abandi, aliwe ibo sibalikuliha. Obumbalaka bwaghu buyisosire.’

35 “Neryo iwe mumbalaka, uhulikirire ekinywa kya Yehova. 36 Yehova, Omukama Mukulu oko Bosi ati: “Kundi wabirikangania esyongumbu syaghu syo kutsibu, kandi kundi endumbu yaghu yabirilangirika omughulu wabya ukakola obumbalaka n’abakwanzire n’esyosanamu syaghu nyibi esikita nye, esyo waherera nibya n’omusasi w’abana baghu b’obulume, 37 busana n’ekyo ngakuma-kuma abaraghane bosi abo wabiritsemesya, abosi abo wanza n’abosi abo wapona. Ngendikuma-kumabo erilua oko mbande syosi base balwe naghu. Kandi ngendiswikulirabo endumbu yaghu, nabo bakendikulangira ighune ndumbu iwe wosi.

38 “‘Ngendikusuyira omw’isuyira eritolere abakali basingiri n’abakali abakuta omusasi. Ngendyuta omusasi waghu omo buhitane n’omo buha. 39 Ngendikuhira omo byala byabo, nabo bakenditerya emyanya yaghu eyiyisumbire, n’emyanya yaghu y’endata ikendisambulwa. Bakendikulusya esyongyimba syaghu, n’erimya ebindu byaghu by’eriyipambamo* ebighambire; ibakusigha ndumbu isiwambiteki. 40 Bakendikuletera ekikumula ky’abandu ikyalwa naghu. Bakendikwita omo mabwe n’erikukera omo miyali yabo. 41 Bakenditimya amanyumba waghu omo muliro, n’erikusuyira omo meso w’abakali bangyi; neryo ngendibughaho obumbalaka bwaghu, naghu ukendyumbya eriliha abakwanzire. 42 Ngenditulerya ekinigha ekyo niwite okw’iwe, n’obuhitane bwaghe bukendikuluako. Neryo ngenditulera, sinendisyasyabya n’obuhitane.’

43 “‘Kundi mughutibuka ebiro by’obulwana bwaghu kandi muwanihitania omw’ikola emyatsi yosi eyi, ngendileta oko mutwe waghu kw’ebitsibu byosi ebikaluira omo ebyo ukakola,’ Yehova, Omukama Mukulu oko Bosi atya, ‘neryo ukendileka emighendere yaghu mibi n’emikolere yaghu yosi eyikita nye.

44 Lebaya! Obuli mundu oyukakolesaya ehisimo, akendisyakolesya akasimo kano okw’iwe: “Omwali akabya nga nyinya!” 45 Uli mwali wa mama waghu, oyo wapokaya iba wiwe n’abana biwe. Kandi uli mwali wabo bali benyu, abapokaya abiba wabo n’abana babo. Mama waghu abya Muhiti na baba waghu abya Muamori.’”

46 “‘Mwali wenyu, omukulu waghu, oyo wikere oko luhande lwaghu lw’endata,* ni Samaria n’abali* biwe, na mwali wenyu, omulere waghu, oyo wikere oko luhande* lwaghu lw’eyikwa, ni Sodomo n’abali biwe. 47 Mughutakwama lisa esyonzira syabo n’emikolere yabo eyikita nye, aliwe omo katambi kake, muwatsanda nibya kubalenga omo mighendere yaghu yosi. 48 Kundi kwenene ngoko niriho, Yehova, Omukama Mukulu oko Bosi atya, ‘Sodoma, omwali wenyu n’abali biwe, mubatakola ebyo wabirikola, iwe n’abali baghu.’ 49 Lebaya! Erilolo lya mwali wenyu Sodoma lya rino: Iye n’abali biwe babya n’emiyiheko kandi babya n’akalyo kanene, kandi babya omo mbolere kundu; aliwe mubatawatikya oyukaghalawa n’omwera. 50 Mubalola embere eriyiheka kandi mubataleka erikola emyatsi eyikita nye omo meso waghe, neryo munalangira ikitolere eribalusyaho.

51 “‘Nibya ne Samaria siyiriyatakola n’enusu y’amalolo agho wabirikola. Wabirikanyirirya emikolere yaghu eyikita nye kubalenga, neryo bali benyu ibabya nga batunganene busana n’emikolere yaghu yosi eyikita nye. 52 Neryo lino, litolere iwahemulwa kundi wabiriimira emighendere y’abali benyu. Kusangwa wabirikola erilolo ry’erikola emyatsi eyikita nye kubalenga, ibo batunganene kukulenga. Neryo uhemuke, wambale esisoni busana n’erileka abali benyu ibabya nga batunganene.’

53 “‘Kandi ngendisyahindania abanyewa babo, abanyewa be Sodomo n’abali biwe, n’abanyewa be Samaria n’abali biwe; kandi ngendisyahindania n’abanyewa baghu haghuma nabo, 54 utoke eriheka erihemuka lyaghu; kandi ukendisyahemuka busana n’ebyo wakola eribakirania. 55 Abali benyu, ni bugha ambu e Sodomo n’abali biwe, bakendisyasuba ngoko babya kera, na Samaria n’abali biwe, bakendisyasuba ngoko babya kera, naghu haghuma n’abali baghu mukendisyasuba ngoko mwabya kera. 56 Omo mighulu y’emiyiheko yaghu, mwali wenyu ye Sodomo, wabya isiwangatamwahula omo buno bwaghu, 57 embere obubi bwaghu ighuwene-wene bukanganibawe. Lino abali be Siria n’abahimbani bayo, bakakutsuma, n’abali b’Abafilistini, abosi abakutimbireko, bakakukolera omo kaghonero. 58 Ukendihikirwa n’ebitsibu ebikaluira omo mighendere yaghu mibi n’omo mikolere yaghu eyikita nye,’ Yehova atya.”

59 “Kusangwa Yehova, Omukama Mukulu oko Bosi ati: ‘Ngendikukolera erikwama n’ebyo wabirikola, kundi wabiripokya erilahirya ukabuna endaghane yaghe. 60 Aliwe ingyuwe-wene ngendiibuka endaghane eyo nakola haghuma naghu omo biro by’obulwana bwaghu, neryo ngendikola naghu endaghane ya kera na kera. 61 Ukendisyibuka emighendere yaghu, neryo ukendisyakwa esisoni omughulu ukendisyakokya bali benyu, abakulu okw’iwe n’abalere okw’iwe; naghe ngendisyakuhabo mo bali baghu, aliwe sikyendisyabya busana n’endaghane yaghu.’

62 “‘Naghe ingyuwene-wene ngendisyakola endaghane haghuma naghu; neryo ukendisyaminya ngoko indi Yehova. 63 Ukendisyibuka, neryo ukendisyakwa esisoni sinene sy’erikumbula obuno bwaghu busana n’erihemuka lyaghu, omughulu ngendisyakulihira embanulo nomo wanabirikola ebyosi ebi,’ Yehova, Omukama Mukulu oko Bosi atya.”