Ekiriro
א [Aleph]
2 Iyooo! Yehova abiriswika mwali we Sioni omo kitu ky’erihitana riwe!
Abirilusya obubuya bwe Israeli bw’elubula n’erighusabo oko kihugho.
Mwatetibuka ekindu kiwe ky’erihirako ebisando omo kiro ky’erihitana riwe.
ב [Beth]
2 Yehova abirimera obwikalo bosi bwa Yakobo butsir’ikwa obulighe.
Mwakahimbula emyanya eyo mundu ate angahikamo bweghu-bweghu ya mwali we Yuda omo kinigha kiwe.
Mwakaghusa ahisi n’eritsandya obwami n’abakulu bamo.
ג [Gimel]
3 Mwakabughaho akaghala kosi* ka Israeli omw’ihitana riwe rinene.
Mwakalusayaho ebyala biwe by’amali omughulu enzighu yiryaseghera hakuhi,
Kandi omo Yakobo, mwakalola embere eryaka ng’omuliro owahisaya obuli kindu ekitimbire kugho.
ד [Daleth]
4 Mwakakondomaya* obuta* bwiwe ngoko enzighu yikakola, n’ebyala biwe by’amali bine tayari erilwa ng’enzighu.
Mwakabera eriita abosi abo abatsemesirye omo meso.
Kandi mwakuta ekinigha kiwe kinene ng’omuliro omo hema ya mwali we Sioni.
ה [He]
5 Yehova abiribya ng’enzighu;
Abirimera Israeli.
Abirimera ehileberyo hyamo hyosi;
Abiritsandya emyanya yamo yosi eyo mundu ate angahikamo bweghu-bweghu.
Anemulirira n’erisimbira kutsibu ewa mwali we Yuda.
ו [Waw]
6 Abiritsatsuhira oko kibanda, abirikolerakyo ng’akabalalayi akali omw’irima.
Abiritwa* ekiro kikulu kiwe.
Yehova abirileka ekiro kikulu n’esabato ibibiriranwa omo Sioni.
N’omw’ihitana riwe rinene, mwatitatsomana omwami n’omuhereri.
ז [Zayin]
7 Yehova abirilekerania ekiherero kiwe;
Abirighana omwanya wiwe owabuyirire.
Abirihira esyombimbo sy’ehileberyo hyamo ehyo mundu ate angahikamo bweghu-bweghu omo byala by’enzighu.
Abandu babiribungirya omo nyumba ya Yehova, ngoko bakabungaya omo kiro kikulu.
ח [Heth]
8 Yehova abiriyisogha eritsandya oluhimbo lwa mwali we Sioni.
Abirikakya ekamba y’eripimamo.
Mwatitakakirya ebyala biwe eritoghotya.*
Abirileka oluba n’oluhimbo ibyalira.
Ebibiri byosi byabirileghetsana.
ט [Teth]
9 Emilango yako yabiritobera omo kitaka.
Abiritsandya n’eritwa ebikale byako.
Omwami n’abakulu bamo bali omo kati-kati k’ebihanda.
Sihakiri omughambo;* nibya n’abaminyereri bamo sibelangira esyonzoli esikalua oko Yehova.
י [Yod]
10 Abasyakulu ba mwali we Sioni babirikala ahisi ho bukutu.
Banemughusa oko mitwe yabo k’olututu kandi bambite olukimba lw’esaki.*
Ababikira be Yerusalema babiryunama n’erihira obusu bwabo b’oko kitaka.
כ [Kaph]
11 Ameso waghe abiriluha busana n’eritoghongya emisonia.
Enda* yaghe yabiriluma kutsibu.
Amakindi waghe abiryutikira ahisi, kundi mwali* w’abandu baghe abiriwa ahisi.
Kundi abana n’esyomekeke babilekulira omo myanya y’abandu bosi y’omo muyi.
ל [Lamed]
12 Bakabera eribulya abomama wabo bati, “Akalyo n’eky’erinywa birihi?”*
Bakalekulira omo myanya y’abandu bosi y’omo muyi ng’omundu oyulyahutala,
Ibanemuholera omo byala by’abomama wabo mo bolo-bolo.
מ [Mem]
13 Nangabaha eky’erileberyako kyahi?
Kutse nangakusosekania naki, iwe mwali wa Yerusalema?
Nangakusosekania naki nitoke erikukirania, iwe mubikira we Sioni?
Kundi obuhanya bwaghu ni bungaha n’engetse. Nindi yo wangakulamya?
נ [Nun]
14 Esyonzoli esyo abaminyereri baghu bakulangirira syabya sy’amabehi kandi esitawite mughaso,
Musitaleka iwalangira ekosa yaghu ukasyaya omo bunyewa,
Aliwe mubabya bakakulangirira enzoli eyirimo ebinywa by’amabehi n’ebikaheraya.
ס [Samekh]
15 Abosi abakalaba omo nzira bakakubandira oko byala ibanemukusekererya.
Bakasughunda ibabirisweka, n’eritsingya emitwe yabo bakalangira omwali we Yerusalema. Bakabugha bati:
“Ono wona muyi ogho bandu babya bakabughako bati, ‘Obubuya bwagho sibuliko kahinira, akatsemesaya ekihugho kyosi’?”
פ [Pe]
16 Esyonzighu syaghu syosi sikakubughako muhanda.
Sikasughunda, sikakeregheta ameno, n’eribugha siti: “Twabirimutomera.
Kino ky’ekiro ekyo twabya tukalindirira! Kyabirihika, kandi twabiriyilangirirakyo!”
ע [Ayin]
17 Yehova abirikola ekyo abya anzire erikola; abiriberererya ebinywa biwe,
Ebyo abugha kera.
Abirihimbula butsir’ikwa obulighe.
Abirileka enzighu iyatsema busana n’erikusinga; abiriyira akaghala* k’esyonzighu syaghu mo kanene kulenga akaghu.
צ [Tsade]
18 Omutima w’abandu akalakira Yehova, iwe luhimbo lwa mwali we Sioni!
Emisonia yaghu yisende ng’olusi omo kiro n’omw’itungyi.
Isiwaluhuka, isiwaligha eriso ryaghu* rikaluhuka.
ק [Qoph]
19 Hangana! Ulake omo kiro, esaha emighulu mbiriri-mbiriri y’omo kiro ikatsuka.
Ekiri omo mutima waghu, utulirekyo embere sya Yehova ng’amaghetse.
Umusumbire ebyala byaghu busana n’engebe* y’abana baghu.
Abakalekulira oko buli ngonde* y’enzira busana n’enzala.
ר [Resh]
20 Yehova, samalira abandu abo ulyakolera omo butsibu.
Abakali bakendibera eribya bakalya abana babo, abana babo ababutawa ibane ndeke?
Abahereri n’abaminyereri bakenditibwa batya omo mwanya owabuyirire wa Yehova?
ש [Shin]
21 Abalwana n’abasyakulu babiriyighalika ahisi omo syonzira ibabirihola.
Ababikira* n’abalwana baghe babiritibwa omo muyali.
Omo kiro ky’erihitana ryaghu, muwita, muwakera butsir’ikwa obulighe.
ת [Taw]
22 Ukabirikira ebikasaghisaya bilue ehosi-hosi, nga bikasa oko kiro kikulu.
Omo kiro ky’erihitana rinene rya Yehova, sihali oyukendisyabala kutse erilama.
Enzighu yaghe muyikabughaho abandu abo nabuta* n’erikulya.